كوپىردەن سەكىرگەن ايەلدى قۇتقاردى

وقيعا 26 قازان كۇنى تۇسكە تامان بولعان. ۇلتتىق ۇلاننىڭ "باتىس" قولباسشىلىعىنا قارايتىن 5517 اسكەري ءبولىمىنىڭ قىزمەتكەرى اعا سەرجانت اسقار نۇرعاليەۆ كەزەكشىلىكتەن ءوز كولىگىمەن قايتىپ كەلە جاتىپ شاعان وزەنىنەن الدەكىمنىڭ سەكىرىپ كەتكەنىن بايقاپ قالادى. اسقار بىردەن قۇتقارۋ قىزمەتىنە ءمان-جايدى بايانداي سالا, كولىگىن جول جيەگىنە توقتاتادى. ويلانباستان كيىمىن شەشىپ, مۇزداي سۋعا ول دا سەكىرەدى.

"سول مەزەتتە نە بولىپ, نە قويعانىن ءوزىم دە تولىق سەزىنبەدىم. بار ماقساتىم ادامدى قۇتقارۋ بولدى. ايەلدىڭ ۇستىندە قارا ءتۇستى قالىڭ ءتۇبىت كۇرتەسى بولدى. وزەن اعىسى دا قاتتى ەكەن. كۇرتەدەن تارتىپ, ءجۇزىپ, قىزدى جاعاعا جەتكىزدىم. بۇل ءىسىمدى ەرلىك سانامايمىن. مەنىڭ ورنىمدا بولعان كەز كەلگەن ادام وسىلاي جاسار ەدى. ويتكەنى ادامدى ولىمنەن قۇتقارۋ – ءاربىر جاننىڭ ازاماتتىق بورىشى عوي", - دەيدى اعا سەرجانت.

اسقار قىزدى جاعاعا الىپ شىققان كەزدە پوليتسيا جاساعى دا, قۇتقارۋشىلار توبى دا جەتىپ ۇلگەرگەن بولاتىن. زارداپ شەگۋشىنى بىردەن "جەدەل جاردەم" الىپ كەتتى. ازىرگە ونىڭ 32 جاستا ەكەندىگى عانا بەلگىلى بولدى. ومىرىنە ءتونىپ تۇرعان قاۋىپ جوق.

وقىس وقيعا كەزىندە ابدىراماي, ەرلىك پەن كاسىبي شەبەرلىك كورسەتىپ, سۋعا كەتكەن ادامدى قۇتقارعان اعا سەرجانتتى "باتىس" قولباسشىلىعى ماراپاتقا ۇسىندى.

ايتا كەتەيىك, اسقار تەمىرتاي ۇلى باتىس قازاقستان وبلىسى بوكەي ورداسى اۋدانىنىڭ بيسەن اۋىلىندا تۋىپ وسكەن. 2015 جىلدان بەرى «ۇلتتىق ۇلان» ساپىندا قىزمەت ەتەدى.

باتىس قازاقستان وبلىسى