قوستاناي وبلىسىنىڭ وڭىرلىك كوممۋنيكاتسيا قىزمەتى ورتالىعىندا وتكەن ءباسپاسوز جيىنىندا وبلىستىق ءدىن ىستەرى باسقارماسىنىڭ باسشىسى جانبولات ۇمبەتوۆ ايماقتا ءدىن سالاسىنداعى مەملەكەتتىك ساياساتتىڭ جۇزەگە اسىرىلۋ بارىسىن باياندادى.
باسقارما باسشىسىنىڭ ايتۋىنشا, بۇگىندە وڭىردە 10 ءتۇرلى كونفەسسياعا قاتىستى 110 ءدىني بىرلەستىك قىزمەت اتقارادى. ولاردىڭ 31-ءى يسلام, 33-ءى پراۆوسلاۆ, 4-ەۋى كاتوليك, 41-ءى پروتەستانت, بىرەۋى كريشنايت دىنىنە جاتادى. ءدىني بىرلەستىكتەردىڭ ءبارى ادىلەت ورگاندارىندا تىركەلگەن جانە قولدانىستاعى زاڭناما نورمالارى شەڭبەرىندە ارەكەت ەتەدى.
– وبلىس اۋماعىندا 99 ءدىني نىسان جۇمىس ىستەيدى. 35 مەشىت, 30 پراۆوسلاۆيە شىركەۋى, 4 كاتوليك كوستەلى, 30 ناماز ءۇيى بار. ال قالعان ءدىني بىرلەستىكتەر جالعا الىنعان پاتەرلەردە ءوز ءىس-شارالارىن وتكىزەدى. سونىمەن قاتار ميسسيونەرلىكپەن اينالىساتىن 11 ادام بار. ءبارى تۇركيا, پولشا, رەسەي, قىرعىزستاننان كەلگەن شەتەلدىك ازامات. ولار قازاقستان رەسپۋبليكاسىنىڭ زاڭ تالاپتارى شەڭبەرىندە جۇمىس ىستەپ ءجۇر. وڭىردە دەسترۋكتيۆتى ءدىني بىرلەستىكتەر, سونداي-اق شەتەلدە ءدىني نەگىزدە اسكەري قاقتىعىستارعا قاتىسقان تۇرعىندار تىركەلمەگەن, – دەدى ج.ۇمبەتوۆ.
بيىل ءدىن ىستەرى باسقارماسى مەن پوليتسەيلەر ءدىن سالاسىنداعى زاڭناما نورمالارىن بۇزۋدىڭ 9 فاكتىسىن انىقتاپ وتىر. زاڭعا قايشى ارەكەت ەتكەندەرگە سوت قاۋلىسىمەن جالپى سوماسى 1 ملن 374 مىڭ 355 تەڭگەنىڭ ۇستىندە ايىپپۇل سالىنعان.
وبلىستاعى ءدىن ساياساتىنا جاۋاپتى مەكەمە جىل باسىنان بەرى ۇكىمەتتىك ەمەس ۇيىمداردىڭ كومەگىمەن كونفەسسياارالىق جانە ەتنوسارالىق كەلىسىمدى قامتاماسىز ەتۋگە, ءدىني ساۋاتتىلىق پەن تولەرانتتى سانانى ارتتىرۋعا, مەملەكەت دامۋىنىڭ زايىرلى قاعيداتتارىن نىعايتۋعا, ءدىني ەكسترەميزم مەن تەرروريزمنىڭ الدىن الۋعا باعىتتالعان 849 ءىس-شارا وتكىزگەن. بيىل وبلىستا مەملەكەتتىك الەۋمەتتىك تاپسىرىس بويىنشا ءدىني ەكسترەميزم مەن تەرروريزمنىڭ الدىن الۋدى جانە دەسترۋكتيۆتىك ءدىني اعىمداردىڭ قىزمەتىنەن زارداپ شەككەندەرگە كومەك كورسەتۋدى كوزدەيتىن 2 جوبا قولعا الىنعان. العاشقى جوبانى «سوتسيۋم&يا» قوعامدىق بىرلەستىگى, ال ەكىنشىسىن «قوستاناي وبلىسىنىڭ پسيحولوگتەر قاۋىمداستىعى» قوعامدىق قورى جۇزەگە اسىرىپ جاتىر. بۇل جوبالار ءدىني ەكسترەميزم مەن تەرروريزم يدەيالارىنىڭ الدىن الۋعا, حالىقتىڭ ءدىني ساۋاتتىلىعىن ارتتىرۋعا, دەسترۋكتيۆتى ءدىني ۇيىمداردىڭ قىزمەتىنەن زارداپ شەككەن ادامدارعا ۋاقتىلى جانە ساپالى كونسۋلتاتسيالىق, پسيحولوگيالىق, زاڭگەرلىك كومەك كورسەتۋگە باعىتتالعان.
ايماقتا بىلتىرعى ءساۋىر ايىنان بەرى اقپاراتتىق قاۋىپسىزدىكتى قامتاماسىز ەتەتىن «كيبەر باقىلاۋ» جۇيەسى جۇمىس ىستەيدى. ءدىنتانۋ ساراپتاماسىنىڭ قورىتىندىسى بويىنشا اتالعان جۇيە ارقىلى تەكسەرىلگەن 7 مىڭنان استام ماتەريالدىڭ 6466-سى ەكسترەميستىك ماتەريال دەپ تانىلىپ وتىر.
باسقارما باسشىسىنىڭ ايتۋىنشا, جالپى, قوستاناي وبلىسىندا كونفەسسياارالىق سالاداعى جاعداي تۇراقتى, مەملەكەتتىك-كونفەسسيالىق جانە كونفەسسياارالىق قاتىناستار قالىپتى دامۋدا. ءدىني فاكتورلارعا بايلانىستى اشىق قاقتىعىستار مەن تەرەڭ قايشىلىقتار جوق.
قوستاناي وبلىسى