كاسىپتىڭ ءتىلىن تابا العان ادام ونىڭ تاسىن ورگە دومالاتا الادى. كاسىپتى باستاماس ءۇشىن الدىمەن قوعامعا قانداي نارسە قاجەت, ونى جاساي الۋ مۇمكىندىگىم قانشالىقتى دەگەن ساۋالداردى وي تەزىنەن تەرەڭىرەك وتكىزۋ ماڭىزدى. كاسىپ باستاۋعا تالپىنىپ, بۇگىندە ءىسىنىڭ جەمىسىن ءوزى دە, وزگەلەر دە كورىپ وتىرعان كوپبالالى انا – گۇلزيا قويلىعۇلوۆا.
مۇنايلى اۋداندىق اكىمدىگى ءباسپاسوز قىزمەتى بەرگەن اقپاراتقا سۇيەنسەك, 29 جاستاعى كوپبالالى انا گۇلزيا قويلىعۇلوۆا اتالعان اۋدانداعى ماڭعىستاۋ-1 اۋىلىندا تۇرادى. ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسىنىڭ بيزنەس يدەيانى ىسكە اسىرۋ باعىتى بويىنشا وقۋعا قاتىسقان ول باستاپقىدا بالالارعا ارنالعان اتتراكتسيون اشۋدى ويلادى. الايدا وقۋ بارىسىندا ماركەتينگتىك تالداۋ, سۇرانىس دەگەن ۇعىمداردى ۇيرەنىپ ويىن كۇرت وزگەرتەدى. ول كۇندەلىكتى شىعىنى قاي نارسەگە كەتەتىنىن انىقتاي كەلە كىر سابىن جاساۋ بيزنەسىنە توقتالعان. ويىن ابدەن بەكىتىپ, تاۋەكەلگە بەل بۋعان گۇلزيا كوپ كەشىكپەي قاجەتتى قۇرال-جابدىقتارىن الىپ, سابىندى دايىندايتىن جانە كەسەتىن قۇرىلعىلاردى ساتىپ الادى.
گۇلزيا قازىرگى تاڭدا اتامەكەن اۋىلىندا ورنالاسقان كىشىگىرىم تسەحتا كۇنىنە 2 مىڭعا جۋىق كىر سابىن دايىندايدى. كاسىپ يەسى شيكىزاتقا «KFC», «بارحان بۋرگەر», «كاسپي گريل» تەز تاماقتانۋ ورتالىقتارمەن بىرلەسكەن كەلىسىمشارت نەگىزىندە قول جەتكىزەدى. ال دايىن ونىمدەرىن اۋداننىڭ ورتالىق بازارىنا, اقتاۋداعى سۋپەرماركەتتەرگە جەتكىزىپ, ساۋدا سورەلەرىنە ورنالاستىرادى.
– مەنىڭ ءبىر ايداعى تازا تابىسىم 100 مىڭ تەڭگەگە دەيىن جەتەدى. ەندىگى جوسپارىم – كىر سابىندى كەپتىرەتىن جانە سىرتىن قاپتاپ شىعاراتىن قۇرىلعىلاردى الۋ. «باستاۋ بيزنەس» جوباسىنىڭ ەرەكشە ءارى قاجەتتى كاسىپتىڭ اشىلۋىنا سەپتىگىن تيگىزگەنىنە ريزامىن, بىلىكتى ماماندارىمىزدىڭ كاسىپتىڭ نەگىزدەرىنە ۇيرەتىپ, باعىت بەرگەنى قۋانتادى, – دەيدى كاسىپكەر گۇلزيا قويلىعۇلوۆا.
تانىس-ءبىلىس وتباسىندا اياۋلى انا, سۇيىكتى جار بولا العان جانە وتباسىنىڭ قىم-قۋىت تىرلىگى تاساسىندا قالىپ قويماي, كاسىپتىڭ ۇرشىعىن يىرگەن جاس انانىڭ تاباندىلىعىنا ءتانتى.
ماڭعىستاۋ وبلىسى