شىعىس قازاقستاندا قاتتى تۇرمىستىق قالدىقتاردى بولەك جيناۋدىڭ ينفراقۇرىلىمىن دامىتۋ جونىندەگى جوبا تانىستىرىلدى. كەلەر جىلى سەمەي مەن وسكەمەندە زاماناۋي سۇرىپتاۋ جەلىسىن ىسكە قوسۋ كوزدەلىپ وتىر. سونداي-اق قوس قالاعا قوقىس تاسيتىن كولىكتەر ساتىپ الۋ, قالدىقتى بولەك تاستاۋعا ارنالعان كونتەينەرلەر ورناتۋ جوسپارلانعان.
وبلىس ورتالىعى مەن سەمەيدە قالدىقتى ءۇش فراكتسيادا جيناۋ جۇزەگە اسىرىلاتىن بولادى: «جەڭىل» قايتا وڭدەلەتىن قايتالاما شيكىزات (پلاستيك, قاعاز, مەتالل), «اۋىر» – بۇل شىنى جانە «دىمقىل» قايتا وڭدەلمەيتىن قالدىقتار (تاماق قالدىقتارى جانە ت.ب.)
اتالعان جوبانى جۇزەگە اسىرۋعا 3,9 ملرد تەڭگە شاماسىندا قاراجات ءبولىندى. وكم وپەراتورى تاراپىنان وسكەمەن قالاسى ءۇشىن ماكۋلاتۋرا مەن پلاستيكتى بولەك جيناۋعا ارنالعان سارى ءتۇستى 760 پلاستيك كونتەينەر جانە شىنى قالدىقتارىنا ارنالعان قوڭىراۋ ۇلگىسىندەگى 514 كوك ءتۇستى كونتەينەر ساتىپ الىنىپ, اكىمدىككە بەرىلەدى. سەمەيدە قايتالاما شيكىزاتتى جيناۋعا ارنالعان 1 050 تورلى جانە شىنى ىدىسقا ارنالعان 532 كونتەينەر ورناتۋ جوسپارلانۋدا. سونىمەن قاتار وكم وپەراتورى شىعىس قازاقستاننىڭ ەكى قالاسى ءۇشىن 12 بىرلىك ارنايى تەحنيكانى ساتىپ الۋعا دا قاراجات ءبولدى.
سەمەي مەن وسكەمەن قالالارىندا قاتتى تۇرمىستىق قالدىقتاردى بولەك جيناۋدىڭ ينفراقۇرىلىمىن ۇيىمداستىرۋ بويىنشا جۇمىستار 2021 جىلى جالپى وندىرىستىك قۋاتى جىلىنا 200 مىڭ توننا قاتتى تۇرمىستىق قالدىقتاردى سۇرىپتايتىن ەكى جاڭا قوقىس سۇرىپتاۋ جەلىسىن ىسكە قوسۋدان باستالادى. قازىرگى ۋاقىتتا وكم وپەراتورى قاجەتتى وندىرىستىك جابدىقتاردى ساتىپ الۋ ءراسىمىن جۇرگىزۋدە.
جەرگىلىكتى بيۋدجەتتىڭ جانە قوقىس شىعاراتىن ۇيىم قاراجاتى ەسەبىنەن تاماق قالدىقتارىن جيناۋعا ارنالعان كونتەينەرلەردى جاڭارتۋ, قابىلداۋ پۋنكتتەرىن ورناتۋ جانە سۇرىپتاۋ جەلىسىن ورنالاستىرۋعا ارنالعان عيمارات سالۋ جاعى قاراستىرىلادى. بۇل كەشەندى جۇمىس وڭىردەگى قالدىقتاردى قايتا وڭدەۋ كورسەتكىشىن ۇلعايتۋعا, قاتتى تۇرمىستىق قالدىقتاردى بولەك جيناۋ ينفراقۇرىلىمىن دامىتۋعا, سونداي-اق جاڭا جۇمىس ورىندارىن اشۋعا مۇمكىندىك بەرەدى دەپ كۇتىلۋدە. جەرگىلىكتى اتقارۋشى ورگان ءوز كەزەگىندە قالدىق وڭدەۋ كولەمىن 2021 جىلى 30%-عا دەيىن جەتكىزۋدى قولعا الادى.
اتالعان جوبانى جۇزەگە اسىرۋعا ارنالعان كەڭەيتىلگەن وتىرىس وسى جىلدىڭ قاراشا ايىندا وتەدى دەپ جوسپارلانىپ وتىر. وعان شىعىس قازاقستان وبلىسى اكىمدىگى, ەكولوگيا, گەولوگيا جانە تابيعي رەسۋرستار مينيسترلىگى جانە وكم وپەراتورى قاتىساتىن بولادى.
ايتا كەتەلىك, شىعىس قازاقستان وبلىسىندا 430 پوليگون بار. ونىڭ ىشىندەگى 32 پوليگون ەكولوگيالىق جانە سانيتارلىق تالاپتار مەن نورمالارعا ساي كەلەدى (رۇقسات بەرۋ قۇجاتتاماسى بار). رۇقسات ەتىلمەگەن قوقىستاردى جويۋ ءۇشىن جەرگىلىكتى بيۋدجەت جىل سايىن 10 ملن تەڭگەدەن استام قاراجات شىعارادى.