وسكەمەن قالاسىنىڭ اكىمى جاقسىلىق ومار Instagram جەلىسىندەگى جەكە پاراقشاسىنداعى جازباسىنا پىكىر قالدىرعان جەلى قولدانۋشىسىنا نە سەبەپتى "وسى ءسوزىڭ ءۇشىن جاۋاپ بەرەسىڭ" دەپ حابارلاما جازعانىن ءتۇسىندىردى, دەپ حابارلايدى Egemen.kz قازاقپاراتقا سىلتەمە جاساپ.
Sandra_ouz بۇركەنشىك ەسىمدى ازامات وسكەمەن قالاسى اكىمىنىڭ "وسى ءسوزىڭ ءۇشىن جاۋاپ بەرەسىڭ" دەپ حابارلاما جازعانىن سكرينشوتقا ءتۇسىرىپ جەلىگە جاريالادى.
ونىڭ ايتۋىنشا, تانىسىنا شاھار باسشىسى جازباسىنا سىني پىكىر قالدىرعانى ءۇشىن وسىنداي حابارلاما جىبەرگەن. كوپ ۇزاماي جاقسىلىق ومار نە سەبەپتى سولاي جازعانىن ءتۇسىندىردى.
"كەشە الەۋمەتتىك جەلىدە مەنىڭ جەكە باسىما قاتىستى ەشقانداي فاكتىلەرگە سۇيەنبەي, قۇر ەموتسيامەن جازىلعان پىكىردى كوردىم. مەنى قالا باسشىسى رەتىندە ەكىجۇزدى دەپ ايىپتاۋ قورلىق دەپ سانايمىن. ارينە, ءوزىمنىڭ ار-نامىسىما تيگەن مۇنداي دالەلسىز ءسوزدى ەلەۋسىز قالدىرا المايمىن. ونىڭ ۇستىنە, سول ادامعا بىرەۋدى قورلاۋدىڭ جاۋاپكەرشىلىگى بولاتىندىعى تۋرالى ەسكەرتكەنىمدە, ول مۇنى قورقىتۋ دەپ قابىلدادى. مەن ءاردايىم دالەلدى, نەگىزى بار تالاپتاردى تىڭداۋعا دايىنمىن. بىراق بارلىقتارىڭىز سياقتى جەكە باسىما قاتىستى قورلىققا شىدامايمىن", دەدى ول.
اكىم ءوز سوزىندە جازباسىنا پىكىر قالدىرعان ازاماتتى زاڭ اياسىندا جاۋاپقا تارتقىسى كەلەتىندىگىن جەتكىزدى.
"مۇنداي قورلىق اتقارۋشى بيلىك پەن تۇرعىندار اراسىنداعى ءتيىمدى ديالوگقا جات. سىزدەر بۇل وقيعاعا تۇسىنىستىكپەن قاراپ, وبەكتيۆتى باعا بەرەدى دەپ سەنەمىن", دەدى جاقسىلىق ومار.