قازاقستاندا بەتوننان توسەلگەن قانشا جول بار

بۇگىنگى تاڭدا قازاقستانداعى بەتوندى جولداردىڭ ۇزىندىعى 1,6 مىڭ شاقىرىمدى قۇرايدى. مۇنداي جابىندى "نۇر-سۇلتان-شورتاڭدى", "نۇر-سۇلتان-ەرەيمەنتاۋ-شىدەرتى", "الماتى-شەلەك-قورعاس", "الماتى-تالدىقورعان", "الماتى-تاراز-شىمكەنت-تاشكەنت", "شىمكەنت-تۇركىستان", "نۇر-سۇلتان-قاراعاندى" تاسجولدارىنىڭ ۋچاسكەلەرىندە بار.

جولشىلار تسەمەنتبەتوندى "قاتتى جول كيىمى" دەپ اتايدى. ايتۋلارىنشا, اتالعان جابىندى 30 جىلعا دەيىن قىزمەت كورسەتەدى. 

"بەتوننان جاسالعان جولدار 25-30 جىلعا دەيىن شىداس بەرەدى. اسفالتبەتون جابىندىسى بولسا, 9-20 جىلعا دەيىن قىزمەت كورسەتەدى. بەتون جولدار, نەگىزىنەن اۋىرجۇكتاسىعىش كولىكتەردىڭ ءجۇرىسىن قامتاماسىز ەتۋ ءۇشىن سالىنادى. مىسالى, قازاقستان رەسپۋبليكاسىندا "باتىس ەۋروپا – باتىس قىتاي" حالىقارالىق كولىك ءدالىزىنىڭ جارتىسى تسەمەنتبەتوننان توسەلگەن. ويتكەنى اتالعان جول اۋىرجۇكتى كولىكتەردىڭ ۇزاق مەرزىمدى قوزعالىسىنا ارنالعان. سول ءۇشىن اتالعان كۇرە جولدىڭ قۇرىلىسىندا تسەمەنتبەتون قولدانىلدى", دەيدى "قازجولعزي" اق پرەزيدەنتى, پروفەسسور باعدات تەلتاەۆ.

كوپ جىلدار بويى قىزمەت كورسەتۋگە قاۋقارلى, توزۋعا ءتوزىمدى ءارى بەرىك بەتون تاسجولدارى ۇنەمى جوندەۋدى قاجەت ەتپەيدى. وسىلايشا ءوزىنىڭ قۇرىلىسىن اقتايدى. مامانداردىڭ سوزىنشە, اتالعان ماتەريالدىڭ تاعى ءبىر ماڭىزدى باسىمدىعى – جارىق شاعىلىستىراتىن قاسيەتى بار. بۇل وسىنداي جولدى جارىقتاندىرۋعا قاجەتتى شىعىنداردى 15%-عا دەيىن قىسقارتۋعا مۇمكىندىك بەرەدى.

بەتوننان توسەلگەن كۇرە جولدار ءبىزدىڭ ەلگە كليماتتىق جاعدايلارى ۇقساس مەملەكەتتەردە, اتاپ ايتساق, كانادا, شۆەتسيا, اقش, گەرمانيا, كورەيا مەن قىتايدا ۇزاق جىلدار بويى پايدالانىلىپ كەلەدى.

تاۋ ەتەكتەرىندەگى اۋدانداردىڭ بەتوننان توسەلگەن جولدارى كوكتايعاققا بەيىم بولادى. سول ءۇشىن دە قۇم-تۇزدى قوسىندىدان بولەك, ءتۇرلى تۇزدى قۇرامدار سەبىلەدى. ولار نەبارى 10 مينۋتتىڭ ىشىندە كوكتايعاقتان ارىلۋعا كومەكتەسەدى. بۇدان بولەك, تسەمەنتبەتوندى جابىندى بار ۋچاسكەلەردە ەمۋلسيا-مينەرالدى قوسپالاردان تۇراتىن جىڭىشكە توزۋ قاباتتارى توسەلەدى. "سلارريسيل" نەمەسە "ميكروسيۋرفەيسينگ" قوسپالارىن قولدانۋ شينالاردىڭ ءىلىنىسۋ كورسەتكىشتەرىن ارتتىرىپ, جول جامىلعىسىنىڭ بۇزىلۋىنا جول بەرمەيدى.