الا دوپ جانكۇيەرى اسىعا كۇتكەن فۋتبولدان ەۋروكۋبوك باسەكەلەرىنىڭ كۇزگى ماۋسىمى باستالدى. چەمپيوندار ليگاسىندا ونەر كورسەتەتىن كوماندالار باستاپ بەرگەن توپتىق كەزەڭنىڭ ءبىرىنشى تۋر ويىندارى اسا تارتىستى ءوتتى.
ءتۋرنيردى تەڭ ويىندار شەرۋى اشىپ بەردى. ناقتىلاپ ايتار بولساق, ە توبىنداعى ەكى كەزدەسۋدە دە جەڭىمپاز كوماندا انىقتالمادى. «چەلسي» مەن «سەۆيليا» ويىنشىلارى ءبىر-ءبىرىنىڭ قاقپاسىنا گول سوعا الماسا, توپتىق كەزەڭگە تۇڭعىش رەت قاتىسىپ جاتقان «كراسنودار» سىرت الاڭدا «رەننمەن» تەڭ ءتۇستى (1:1). F توبىندا «لاتسيو» ريمدە «بورۋسسيا» دورتمۋندتى (3:1) سەنىمدى تۇردە جەڭدى. ال «زەنيت» سوڭعى مينۋتتا قاقپاسىنا گول وتكىزىپ الىپ, «بريۋگگەدەن» جەڭىلىپ قالدى.
G توبىندا ونەر كورسەتەتىن «بارسەلونا» «فەرەنتسۆاروشتىڭ» (5:1) تاس-تالقانىن شىعاردى. كاتالونيالىقتاردان مەسسي, فاتي, كوۋتينو, دەمبەلە جانە پەدري مەرگەندىگىمەن كوزگە ءتۇستى. «يۋۆەنتۋس» كيەۆتە موراتانىڭ ءدۋبلى ارقاسىندا 3 ۇپاي ولجالادى. ن توبىندا «مانچەستەر يۋنايتەد» سىرت الاڭدا پسج كلۋبىمەن وتكەن ويىندا 2:1 ەسەبىمەن جەڭىستى ج ۇلىپ السا, توپتاعى ەكىنشى ويىندا «لەيپتسيگ» «ىستانبۇل» (2:0) كومانداسىنان باسىم ءتۇستى.