قازاق ەلىنىڭ بولاشاعى ءۇشىن كۇرەسكەن ءبىرتۋار تۇلعا, الاش قايراتكەرى س.ج.اسفەندياروۆتىڭ تۋعانىنا 131 جىل تولۋىنا وراي, جىلداعى قالىپتاسقان ءداستۇر بويىنشا ۋنيۆەرسيتەتتە ەسكە الۋ ءىس-شاراسى ءوتتى. اتالعان ءىس-شارا جاستار ساياساتى باسقارماسى, اسكەري كافەدراسىنىڭ ۇيىمداستىرۋىمەن رەكتورات عيماراتىندا ورنالاسقان س.ج.اسفەندياروۆتىڭ ءبيۋستى ەسكەرتكىشى الدىندا ءوتتى.
ۋنيۆەرسيتەتتىڭ ءباسپاسوز قىزمەتىنىڭ مالىمەتى بويىنشا, ءىس-شارا ەسكەرتكىش الدىنا گۇل سەبەتىن قويۋدان باستالدى. جيىنعا ۋنيۆەرسيتەت اكىمشىلىگى, مەكتەپ دەكاندارى, وقىتۋشىلار جانە ۋنيۆەرسيتەتتە وتكىزىلەتىن ءىس-شارالاردىڭ بارلىعىنا ماتەريالدىق جاعىنان قولداۋ كورسەتىپ, دەمەۋشىلىك كورسەتەتىن قازۇمۋ جەرگىلىكتى جۇمىسشىلار كاسىپوداعىنىڭ قىزمەتكەرلەرى قاتىستى. جيىندا كورپوراتيۆتىك دامۋ جونىندەگى پرورەكتور ۋ.م.داتحاەۆ العى ءسوز سويلەپ, جيىندى اشىپ بەردى. پرورەكتور وقۋ-ورنىمىزدا وتكەن كۇننىڭ تاريحىنا قۇرمەت كورسەتىپ, تانىمال تۇلعالاردى ەسكە الۋ ءىس-شارالارىنىڭ ۇنەمى ءداستۇرلى تۇردە وتكىزىلىپ وتىراتىندىعىن جانە تاريحىمىزدى ساراپتاپ وتىرۋ جاستارعا تاربيە بەرۋدە, ۇرپاق ساباقتاستىعىن جالعاستىرۋدا ۇلكەن ورىن الاتىنىن ايتىپ ءوتتى. ۋنيۆەرسيتەتىمىزدىڭ تاريحىن جيناقتاۋدا ءوزىنىڭ قىزمەتكەرلەرىمەن بىرگە ۇلكەن جۇمىستار اتقارىپ جاتقان مۇراجاي باسشىسى ا.س.ساپاروۆا تاريحشى-عالىمنىڭ ومىرىندەگى نەگىزگى وقيعالارعا قىسقاشا توقتالىپ ءوتتى. سونىمەن قاتار, تاريحشىلار اتىنان قازاقستان تاريحى جانە الەۋمەتتىك-گۋمانيتارلىق پاندەر كافەدراسىنىڭ وقىتۋشىسى ع.مالىك ءسوز سويلەدى. ەلىمىزدىڭ جارقىن بولاشاعى ءۇشىن كۇرەسكەن, وزدەرىنىڭ بار كۇش جىگەرلەرىن, ومىرلەرىن سارپ سارپ ەتكەن ازاماتتاردى, الاش زيالىلارىن ەسكە الىپ, قۇرمەت كورسەتۋ, ەل ءۇشىن جاساپ كەتكەن ەڭبەكتەرىن ايتىپ وتىرۋ ۇرپاققا ۇلگى.
الماتى