بۇگىن, نۇر-سۇلتان قالاسى قازاقستان حالقى اسسامبلەياسى قازاقستان رەسپۋبليكاسى دەنساۋلىق ساقتاۋ مينيسترلىگىنىڭ ترانسفۋزيولوگيا عىلىمي-وندىرىستىك ورتالىعىمەن بىرلەسە وتىرىپ "قان تاپسىر - ءومىر سىيلا!" قايىرىمدىلىق اكتسياسىن ۇيىمداستىردى, دەپ حابارلايدى Egemen.kz
سانيتارلىق تالاپتارعا ساي, قان الۋ دوستىق ءۇيىنىڭ اۋلاسىندا ءوتتى. ورتالىقتىڭ ارنايى مامانداندىرىلعان اۆتوبۋسىندا دونورلارعا ساي بارلىق جاعداي جاسالىندى. اكتسيانىڭ بارلىق قاتىسۋشىلارى ەڭ الدىمەن دەنساۋلىعى مەن COVID-19 ساۋالناماسىن تولتىرىپ, الدىن الا تەكسەرىسكە جىبەرىلدى. ماسكالىق رەجيم مەن اراقاشىقتىقتى ساقتاي وتىرىپ كەلۋشىلەردىڭ دەنە تەمپەراتۋراسى, قان قىسىمى ولشەندى.
بەلگىلەنگەن ۋاقىتقا دەيىن 30 ادام دونور اتانىپ, اربىرەۋى 450 مل-دەن قان تاپسىردى. گەموگلابين جانە دەنە سالماعىنىڭ تومەن بولۋىنا بايلانىستى 10 ادام تەكسەرىستەن وتپەدى.
"ەكىنشى جىل قاتارىنان تۇراقتى تۇردە قان تاپسىرىپ كەلەمىن. بۇگىنگى اكتسيادا دونورلار ءۇشىن بارلىق جاعداي جاسالعان. ەكى كۇن بويى دەنساۋلىعىما قاراپ, مايلى ءارى ىستالعان تاعامداردى جەمەدىم. وزگەنىڭ ءومىرىن ساقتاپ قالۋعا ات سالىسقانىم ءۇشىن ءوزىمدى باقىتتى سەزىنەمىن", دەيدى قالا تۇرعىنى ي.شاريپوۆا.
ايتا كەتەيىك, اتالمىش قايىرىمدىلىق اكتسياسى قر دەنساۋلىق ساقتاۋ مينيسترلىگىنىڭ ترانسفۋزيولوگيا عىلىمي-وندىرىستىك ورتالىعىمەن اتقارىلعان ءۇشىنشى قايىرىمدىلىق شاراسى.