ەلوردا پوليتسياسى ءبىر تاۋلىكتىڭ ىشىندە كارانتين رەجيمىن بۇزۋدىڭ 65 فاكتىسىن انىقتادى, دەپ حابارلايدى Egemen.kz
نۇر-سۇلتان قالالىق پوليتسيا دەپارتامەنتىنىڭ مالىمەتىنشە, كارانتين رەجيمىن ءجيى بۇزاتىن ءدامحانا, مەيرامحانا, كاراوكە, بار, ساۋدا ورتالىقتارى ەرەكشە نازار الىنعان. پوليتسيا قىزمەتكەرلەرى كاسىپكەرلىك سۋبەكتىلەرىنە كۇندەلىكتى تۇنگى جانە كۇندىزگى رەيدتەر جۇرگىزىپ, كارانتين رەجىمىن بۇزۋشىلاردى انىقتاپ, ولاردى جاۋاپكەرشىلىككە تارتادى.
سونىمەن قاتار كوڭىل كوتەرۋ ورىندارىنا بارىپ, ولاردىڭ يەلەرىنە كارانتين شارالارىنىڭ قولدانىستا ەكەندىگىن ەسكەرتىپ وتىرادى.
"نۇر-سۇلتان پوليتسياسىنىڭ قىزمەتكەرلەرى تاۋارلار مەن كورسەتىلەتىن قىزمەتتەردىڭ ساپاسىن جانە قاۋىپسىزدىگىن باقىلاۋ باسقارماسى وكىلدەرىمەن بىرگە ءبىر تاۋلىكتىڭ ىشىندە 195 كاسىپكەرلىك نىسانىن تەكسەرىپ, كارانتين رەجيمىن بۇزۋدىڭ 65 فاكتىسىن انىقتادى. اتاپ ايتقاندا, تۇران كوشەسىندە ورنالاسقان "ZOLOTO" مەيرامحاناسىندا ساعات 23:01 كەزىندە شامامەن 100 قوناق بولعان. مەيرامحانا الەۋمەتتىك اراقاشىقتىقتى ساقتاماي قىزمەت كورسەتكەن. كورشى ۇستەلدەردىڭ شەتكى ورىندارى اراسىندا كەمىندە 2 مەتر الەۋمەتتىك قاشىقتىقتى ساقتاي وتىرىپ جانە ءبىر ۇستەلگە 4-6 ادامنان اسپايتىنداي ەتىپ وتىرعىزىپ, كۇشەيتىلگەن سانيتارلىق-پروفيلاكتيكالىق ءىس-شارالاردى ساقتاۋمەن, جۇمىس كۇندەرى جانە دەمالىس كۇندەرى ساعات 9:00-دەن 22:00-گە دەيىن جۇمىس كەستەسىن ورىنداماعان", دەپ اتاپ وتەدى دەپارتامەنتتەن.
سونىمەن قاتار, تۇنگى ساعات 02:00 شاماسىندا 102 ارناسىنا قوناەۆ كوشەسىندەگى ءۇيدىڭ تۇرعىندارىنان "CABERA" ءدامحانا-بارىندا مۋزىكا داۋىسى قاتتى شىعىپ تۇرعانى تۋرالى شاعىم تۇسكەن. شاقىرتۋ ورنىنا جەدەل اتتانعان پوليتسيا قىزمەتكەرلەرى ءدامحانادا كارانتينگە قاراماستان مۋزىكا داۋىسىن قاتتى قويىپ, بيلەپ جۇرگەن ادامداردى انىقتادى.