ازەربايجان رەسپۋبليكاسى سىرتقى ىستەر مينيسترلىگى رەسمي مالىمدەمە جاسادى. وندا 2020 جىلعى 17 قازانعا قاراعان ءتۇنى, شامامەن ساعات 01: 00-دە ارمەنيا قارۋلى كۇشتەرى ازەربايجاننىڭ گيانجا قالاسىنا بالليستيكالىق زىمىراندارمەن شابۋىلداعانى تۋرالى ايتىلعان دەپ حابارلايدى Egemen.kz ازەربايجان رەسپۋبليكاسىنىڭ قازاقستان رەسپۋبليكاسىنداعى ەلشىلىگىنە سىلتەمە جاساپ.
"بۇل ارمەنيانىڭ ازەربايجانعا قارسى جاڭا اگرەسسياسىن باستاعاننان كەيىن ازەربايجاننىڭ مايدان شەبىنەن الىس ورنالاسقان ەكىنشى ءىرى قالاسىنا جاسالعان جانە بەيبىت تۇرعىنداردىڭ اۋىر شىعىنىنا اكەلگەن جانتۇرشىگەرلىك ءۇشىنشى شابۋىلى. كامەلەتكە تولماعان 2, بارلىعى 12 بەيبىت تۇرعىن قازا تاپتى, 40-تان استام ادام جاراقات الدى.
ارمەنيانىڭ بەيبىت تۇرعىندارعا قاساقانا جانە ەشكىمدى اجىراتپاي جاساعان شابۋىلدارى حالىقارالىق قۇقىق نورمالارى مەن قاعيدالارىن, ونىڭ ىشىندە حالىقارالىق گۋمانيتارلىق قۇقىقتى, سونداي-اق جاريالانعان گۋمانيتارلىق ماقساتتا اتىستى توقتاتۋ ەرەجەلەرىن ورەسكەل بۇزىپ, بەيبىت تۇرعىنداردى قاساقانا ءولتىرۋى دە اسكەري قىلمىس جانە ادامزاتقا قارسى جاسالعان قىلمىس بولىپ تابىلادى. بۇل قىلمىستىڭ جاۋاپكەرشىلىگى تولىعىمەن ارمەنيا باسشىلىعىنىڭ موينىندا.
ارمەنيانىڭ توقتاۋسىز اگرەسسياسىن, بەيبىت تۇرعىندارعا جاسالعان قاتىگەز شابۋىلدارىن توقتاتۋ كەرەك. حالىقارالىق قاۋىمداستىق ارمەنيانىڭ ازەربايجان حالقىنا قارسى ادامگەرشىلىككە جاتپايتىن ارەكەتتەرىنە كوز جۇمباۋى كەرەك.
ءبىز ارمەنيانىڭ ازەربايجاننىڭ بەيبىت تۇرعىندارىنا جاساعان جاۋىزدىق شابۋىلدارىن قاتاڭ تۇردە ايىپتايمىز. اگرەسسياشىل مەملەكەتتى اسكەري قىلمىستارىن توقتاتۋعا شاقىرامىز.
ارمەنيانىڭ اسكەري-ساياسي باسشىلىعى تەرروردى مەملەكەتتىك ساياسات رەتىندە قولدانا وتىرىپ, بەيبىت تۇرعىندارعا راكەتالىق شابۋىل جاساۋ تۋرالى بۇيرىق بەرۋگە جاۋاپتى. ازەربايجان رەسپۋبليكاسى وسى قىلمىستى جاساعانداردىڭ ۇلتتىق جانە حالىقارالىق قۇقىق مەحانيزمدەرى نەگىزىندە جاۋاپقا تارتىلاتىندىعىن مالىمدەيدى", دەلىنگەن رەسمي حابارلامادا.