وكپە قابىنۋىنا پتر تەستىلەۋ ارقىلى انىقتالماعان جاڭا كوروناۆيرۋس سەبەپ بولدى. بۇل جايىندا ءماجىلىس دەپۋتاتتارىنىڭ ساۋالىنا وراي قر دەنساۋلىق ساقتاۋ ءمينيسترى الەكسەي تسويدىڭ جاۋابىندا ايتىلعان, دەپ حابارلايدى Egemen.kz
"قازاقستاندا اۋىر پنەۆمونيالاردىڭ (قوزدىرعىشتاردىڭ تابيعاتى) دامۋىنا تۋدىراتىن سەبەپتەردى انىقتاۋ ماقساتىندا كوۆيد ءتارىزدى پنەۆمونيانىڭ ەتيولوگياسىن, ونىڭ ىشىندە اعزاعا باسقا مۇمكىن قوزدىرعىشتاردىڭ – ۆيرۋستار مەن باكتەريالاردىڭ بولۋىن انىقتاۋ ماقساتىندا پيلوتتىق زەرتتەۋ جۇرگىزىلدى. بۇل رەتتە, نۇر-سۇلتان, الماتى, شىمكەنت, اقتوبە, قاراعاندى, پاۆلودار قالالارىندا كومپيۋتەرلىك توموگرافيادا COVID-19 كلينيكالىق بەلگىلەرى بار ەكىجاقتى اۋرۋحانادان تىس پنەۆمونياسى بار ادامدار تەكسەرىلدى", دەدى الەكسەي تسوي.
ونىڭ ايتۋىنشا, زەرتتەۋدىڭ الدىن-الا ناتيجەلەرى بويىنشا پنەۆمونيامەن اۋىراتىن ناۋقاستاردان الىنىپ سىنالعان ۇلگىلەردىڭ ەشقايسىسى ا جانە ۆ تۇماۋىنىڭ ۆيرۋستارىنا, سونداي-اق تۇماۋ ەمەس ينفەكتسيالارعا وڭ ناتيجە كورسەتپەگەنى انىقتالدى.
"وسىلايشا پنەۆمونياعا پتر تەستىلەۋ ارقىلى انىقتالماعان جاڭا كوروناۆيرۋس سەبەپ بولدى. ورتاشا جانە اۋىر پنەۆمونيامەن اۋىراتىن ناۋقاستاردىڭ شامامەن ۇشتەن بىرىندە پنەۆمونيامەن بايلانىستى بەلگىلى ءبىر باكتەريالار انىقتالدى. سونىمەن قاتار, باكتەريالىق ينفەكتسيانىڭ بولۋى اۋرۋدىڭ اۋىرلىعىنا بايلانىستى بولدى. اۋرۋدىڭ اۋىر تۇرىمەن اۋىراتىن ناۋقاستاردىڭ ءبىر بولىگىندە باكتەريالىق ينفەكتسيا اۋرۋدىڭ اعىمىن اۋىرلاتاتىن جاڭا كوروناۆيرۋسپەن ينفەكتسياعا قوسىلادى (سترەپتوكوككتار, ستافيلوكوككتار, كلەبسيەللالار جانە ت.ب.)", دەدى مينيستر.
ايتا كەتەيىك, ەلىمىزدە كوروناۆيرۋسقا بايلانىستى تۇرعىندار اراسىندا وكپە قابىنۋى ارتىپ كەتكەن بولاتىن.