ەلوردادا جاڭا ءورت ءسوندىرۋ دەپوسى اشىلدى

"توتەنشە جاعدايلاردىڭ الدىن الۋ جانە جويۋ مەملەكەتتىك جۇيەسى قالىپتاسۋىنىڭ 25 جىلدىعى قارساڭىندا جاڭا ءورت ءسوندىرۋ دەپوسىن قابىلداپ وتىرمىز. وسى جىل ەلىمىز ءۇشىن ەكونوميكالىق احۋالعا, پاندەمياعا بايلانىستى اۋىر بولىپ تۇر. دەگەنمەن, ءبىزدىڭ ۇجىم جەرگىلىكتى اتقارۋشى ورگاندارمەن بىرلەسكەن ءىس-قيمىلداردىڭ ارقاسىندا توتەنشە جاعدايلاردىڭ الدىن الۋ جانە جويۋدا ءادىل ءارى لايىقتى قىزمەت اتقاراتىن بولادى. مەملەكەتتىڭ, جەرگىلىكتى اتقارۋشى ورگانداردىڭ قولداۋىنىڭ ارقاسىندا جىلدان جىلعا ءورت ءسوندىرۋ قىزمەتىنىڭ جاراقتاندىرىلۋى جاقسارىپ, جاڭا بولىمدەر اشىلىپ جاتىر. ازاماتتارىمىزدىڭ ءومىرى مەن دەنساۋلىعى بىزگە بايلانىستى. سوندىقتان ءادىل ءارى قۇتقارۋشى دەگەن مارتەبەلى اتاققا لايىق بولىڭىزدار", دەدى سالتاناتتى شارادا ءسوز سويلەگەن قر توتەنشە جاعدايلار ءمينيسترى يۋري يلين.

ال التاي كولگىنوۆ اكىمدىك ورتكە قارسى قىزمەت نىساندارىنىڭ قۇرىلىسىنا جانە ازاماتتىق قورعاۋ ورگاندارى ءۇشىن اپاتتىۇ-قۇتقارۋ تەحنيكاسىن ساتىپ الۋعا كومەك كورسەتىلىپ جاتقانىن اتاپ ءوتتى.

"مەرەكەلەرىڭىزدىڭ قارساڭىندا حالىققا قىزمەت ەتەتىن, ءورت قاۋىپسىزدىگىن ساقتاپ, ازاماتتاردىڭ ۇيقىسى تىنىش, ءومىرى قاۋىپسىز بولۋ ءۇشىن قىزمەت ەتەتىن ءورت ءسوندىرۋ دەپوسى پايدالانۋعا بەرىلىپ وتىر. نۇر-سۇلتان قالاسى كۇننەن كۇنگە ءوسىپ كەلەدى. ەلباسىمىزدىڭ كەزىندەگى تاريحي شەشىمىنىڭ ارقاسىندا ەلوردامىز الەمگە تانىمال ۇلكەن قالاعا اينالدى. قالا وسكەن سايىن حالىق سانى كوبەيەدى. سوندىقتان ولاردىڭ قاۋىپسىزدىگىن قامتاماسىز ەتۋ كەرەك. وسى ورايدا قۇتقارۋشىلار - سىزدەر ازاماتتار ۇيىقتاپ جاتقاندا نەمەسە مەرەكە كەزدەرىندە ايانباي ەڭبەك ەتەسىزدەر. سىزدەرگە تۇسەر سالماق ۇلكەن. ونى ابىرويمەن اتقارىپ كەلەسىزدەر. سول ءۇشىن اكىمدىك اتىنان ريزاشىلىعىمدى بىلدىرەمىن", دەدى ەلوردا اكىمى.

سونداي-اق شارا بارىسىندا يۋري يلين مەن التاي كولگىنوۆ ەلوردالىق جەدەل دەن قويۋ جانە توتەنشە جاعدايلاردا شۇعىل مەديتسينالىق كومەك كورسەتۋ ءۇشىن گارنيزونعا ءورت تەحنيكاسى مەن رەانيموبيلدەردىڭ كىلتىن سالتاناتتى تۇردە تابىس ەتتى. سونىمەن قاتار, قىزمەتكەرلەرگە جاڭا ءورت ءسوندىرۋ دەپوسىنىڭ جوباسى اياسىندا جۇزەگە اسىرىلعان قىزمەتتىك تۇرعىن ءۇيدىڭ كىلتتەرى بەرىلدى. جوعارى كورسەتكىشتەرى مەن كاسىپقويلىعى ءۇشىن كوزگە تۇسكەن قىزمەتكەرلەر ۆەدومستۆولىق ناگرادالارمەن ماراپاتتالدى. مۇنان بولەك, مينيستر مەن اكىم اراسىنداعى نۇر-سۇلتان قالاسىنىڭ قاۋىپسىزدىگىن قامتاماسىز ەتۋ بويىنشا ءوزارا ىنتىماقتاستىق تۋرالى مەموراندۋمعا قول قويىلدى. جاڭا ءتورت قاباتتى ءورت ءسوندىرۋ دەپوسىنىڭ عيماراتى نۇر-سۇلتان قالاسىنىڭ الاش اۋدانىندا سالىندى. ءورت ءسوندىرۋ ءبولىمىنىڭ جالپى اۋدانى - 4 مىڭ شارشى مەتر, 6 ماشينا ورنى بار.

دەپونىڭ سوڭعى قاباتتارىندا ەلوردالىق گارنيزون قىزمەتكەرلەرى ءۇشىن جاتاقحانا قاراستىرىلعان, وندا 27 تۇرعىن بولمە مەن جايلى پاتەرلەر ورنالاسقان. ءورت ءسوندىرۋ دەپوسى بايقوڭىر اۋدانىنىڭ اۋماعىنا قىزمەت كورسەتەدى. ءورت ءسوندىرۋ دەپوسىنىڭ قىزمەت كورسەتۋ ايماعىنا تىرشىلىكتى قامتاماسىز ەتۋ, ساۋدا نىساندارى, ونەركاسىپتىك بازالار مەن قويمالار, ساياجاي الاپتارى كىرەدى.​سونىمەن قاتار, اقمولا گارنيزونىمەن ءوزارا ءىس-قيمىل جوسپارىنا سايكەس تج-نى جويۋ كەزىندە كومەك رەتىندە بۇل ءبولىم قوياندى, سوفيەۆكا تۇرعىن ءۇي الاپتارىنا بارادى.