ءۇش جىل قاتارىنان قايتىس بولعان اتاسىنىڭ زەينەتاقىسىن الىپ جۇرگەن قاراعاندى تۇرعىنى زاڭ الدىندا الاياقتىعى ءۇشىن جاۋاپ بەرمەك, دەپ حابارلايدى Egemen.kz
الاياقتىق فاكتىسى بويىنشا قىلمىستىق ءىس قازىبەك بي اۋداندىق سوتىندا قارالدى. سوتقا دەيىنگى تەرگەۋ مالىمەتتەرى بويىنشا, 34 جاستاعى قاراعاندى قالاسىنىڭ تۇرعىنى 2017 جىلدىڭ ساۋىرىندە قايتىس بولعان اتاسىنىڭ زەينەتاقىسىن ءۇش جىل بويى الىپ وتىرعان. جاۋاپكەر بانكتىڭ كاسساسى ارقىلى قىزمەتكەرلەرگە اتاسىنىڭ اتىنان سەنىمحات بەرە وتىرىپ اقشا العان.
بەلگىلى بولعانداي, سوتتالۋشىعا جىبەرىلگەن سەنىمحاتتى شىنىمەن دە اتاسى بەرگەن جانە نوتاريۋس كۋالاندىرعان. الايدا, سەنىمحاتقا قول قويىلعاننان كەيىن كوپ ۇزاماي زەينەتكەر جۇرەك جەتكىلىكسىزدىگىنەن قايتىس بولدى. نەمەرەسى اتاسىنىڭ قايتىس بولعانىن تىركەمەگەن. مۇنىڭ ورنىنا ول ءوزىنىڭ ەسەپشوتىنان زەينەتاقىسىن الا بەردى. ءۇش جىل ىشىندە سوت 3,7 ميلليون تەڭگەنى يەمدەنگەن.
شىندىق وسى جىلدىڭ ءساۋىر ايىندا زەينەتاقى الۋشىلاردىڭ بازاسىن مەديتسينالىق ۇيىمدار ۇسىنعان قايتىس بولعاندار تىزىمىمەن سالىستىرۋ كەزىندە بايقالعان.
سوت وتىرىسى بارىسىندا سوتتالۋشى ءوز كىناسىن تولىعىمەن مويىنداپ, اتاسىنىڭ قايتىس بولۋ فاكتىسىن تىركەۋ قاجەتتىلىگى تۋرالى بىلمەيتىندىگىن مالىمدەدى. ول ءوزىن باس بوستاندىعىنان ايىرماۋدى جانە كەلتىرىلگەن زياندى وتەۋگە ۋاقىت بەرۋىن سۇرادى.