پوليتسيا قىزمەتكەرلەرى ينتەرنەتتەگى الاياقتىق فاكتىلەرىنىڭ 35% اشادى. بۇل تۋرالى نۇر-سۇلتان قالاسى پوليتسيا دەپارتامەنتىنىڭ كريمينالدىق پوليتسيا باسقارماسىنىڭ ءبولىم باستىعى تالعات بولەگەنوۆ ايتتى, دەپ حابارلايدى Egemen.kz
"ينتەرنەت الاياقتىقتىققا قاتىستى قىلمىستى اشۋ وڭاي ەمەس. قىلمىسكەر الەمنىڭ كەز كەلگەن نۇكتەسىندە وتىرىپ, ينتەرنەت الاياقتىق جاساي الادى. قىلمىستى اشۋدىڭ قيىندىعى دا وسىندا. قازىرگى ۋاقىتتا مۇنداي قىلمىس ءتۇرىن اشۋ 35%-دان جوعارى. بيىل 9 اي ىشىندە 1300 تۇرعىن پوليتسيا دەپارتامەنتىنە ينتەرنەت-الاياقتىقتىڭ قۇربانى بولعانى تۋرالى ارىز ءتۇسىردى", دەيدى كريمينالدىق پوليتسيا باسقارماسىنىڭ ءبولىم باستىعى تالعات بولەگەنوۆ. ونىڭ ايتۋىنشا, كوروناۆيرۋس ىندەتى باستالعان ناۋرىز ايىنان بەرى ينتەرنەتتەگى الاياقتىق فاكتىلەرى كوبەيگەن.
"ينتەرنەت الاياقتىق بىلتىرعى جىلمەن سالىستىرعاندا 15% ارتىپ وتىر. ەلوردالىق تۇرعىنداردىڭ كوبى ينتەرنەت ارقىلى ساۋدا جاسايدى, بۇل قىلمىس ءتۇرىنىڭ ارتۋى وسىعان بايلانىستى بولۋى مۇمكىن", دەيدى ول.
ينتەرنەت-الاياقتىعىنا قاتىستى ءار فاكتىدە اقشا شەتەلدىك بانكتەردىڭ سايكەستەندىرىلمەگەن ەلەكتروندىق ءامياندارىنا نەمەسە كارتا شوتىنا كەتەدى.
ء"بىز ەكىنشى دەڭگەيلى بانكتەردىڭ بارىمەن جۇمىس ىستەيمىز. ولار بىزگە بانك تۋرالى اقپارات الۋعا كومەكتەسەدى, سودان كەيىن ينتەرنەت-رەسۋرستاردىڭ اكىمشىلىگىمەن تىعىز بايلانىستامىز", دەيدى تالعات بولەگەنوۆ.
كيبەر قىلمىسپەن كۇرەس ءبولىمىنىڭ اعا جەدەل ۋاكىلى سايات دۇيسەنباەۆ شەتەلدە وتىرىپ ينتەرنەت الاياقتىقپەن اينالىسقان 12-گە جۋىق جاعداي انىقتالعانىن ايتتى.
"قازىرگى ۋاقىتتا الەۋمەتتىك جەلىلەردە وتىراتىن ينتەرنەت-الاياقتار وتە كوپ. شەتەلدە وتىرىپ ينتەرنەت-الاياقتىقپەن اينالىسقان 12-گە جۋىق الاياقتى انىقتادى. اتاپ ايتار بولساق, ولار ۋكراينا مەملەكەتىندە انىقتالدى. قازىرگى ۋاقىتتا ءبىز بۇل ءىستى قر باس پروكۋراتۋراسىنا جولدادىق. ودان كەيىن الاياقتىڭ كىم ەكەنىن, قاي جەردە جۇرگەنىن انىقتاۋ ءۇشىن حالىقارالىق جەكە تاپسىرمانى ۋكراينا مەملەكەتىنە جولدايمىز. حالىقارالىق جەكە تاپسىرمالارعا سۇيەنە وتىرىپ قىلمىستىق ءىستىڭ تەرگەۋ امالدارى جۇرگىزىلۋدە", دەيدى ول.