نۇر-سۇلتانعا كەلگەن اۋە جولاۋشىلاردىڭ بىرىنەن كوروناۆيرۋس انىقتالدى, دەپ حابارلايدى Egemen.kz اكىمدىكتىڭ ءباسپاسوز قىزمەتىنە سىلتەمە جاساپ.
پتر سىناعىنان وتكەنى تۋرالى سەرتيفيكاتى جوق اۋە جولاۋشىلارىن كارانتين ستاتسيونارىنا جەدەل جەتكىزۋ شارالارىنىڭ ارقاسىندا ەلوردانىڭ مەديتسينا قىزمەتكەرلەرى تۇرعىندار اراسىندا ينفەكتسيانىڭ تارالۋىن بولدىرماي, ناۋقاسقا ۋاقتىلى كومەك كورسەتتى.
30 جاستاعى ەر ادام ماسكەۋدەن پتر سىناعىنىڭ سەرتيفيكاتىنسىز كەلگەن. اۋەجايدان بىردەن ول كارانتين ستاتسيونارىناجەتكىزىلىپ, قاجەتتى زەرتحانالىق تەكسەرۋلەردەن ءوتتى.
اۋرۋحانا باسشىلىعىنىڭ ايتۋىنشا, ناۋقاستىڭ ناتيجەلەرى اناليز العان سوڭ 4 ساعاتتان كەيىن دايىن بولعان. جولاۋشىدان اۋرۋدىڭ سيمپتومسىز ءتۇرى انىقتالىپ, ءۇي جاعدايىنداعى كارانتينگە جابىلدى. ناۋقاستىڭ جاعدايى قاناعاتتانارلىق, شاعىمسىز. ەر ادامدى تۇرعىلىقتى جەرىندەگى ەمحانالاردىڭ مەديتسينالىق ماماندارى باقىلايدى.