قوستاناي قالاسىنىڭ ورتالىعىنداعى تۇرعىن ۇيلەردىڭ ماڭىنان ءوزىمىز كوپ وقىپ, ءجيى ەستىپ جۇرگەن كادىمگى اۋپىلدەك قۇس تابىلدى. ءبىر قاناتى قايىرىلىپ, ۇشا الماي قالعان سيرەك كەزدەسەتىن جىل قۇسىن قالاداعى پاتەر يەلەرىنىڭ تۇتىنۋشى كووپەراتيۆىنىڭ جۇمىسشىسى ۇستاپ العان. ءبىر اپتادان بەرى كووپەراتيۆ ۇجىمى اۋپىلدەككە پانا بولاتىن ورىن ىزدەپ اۋرە.
قالاداعى «قۇرىلىسشى-2» پاتەر يەلەرى كووپەراتيۆىنىڭ قىزمەتكەرلەرى اۋپىلدەكتىڭ ءاربىر قيمىلىن قىزىقتاپ, ادەمى ۇلپىلدەك قاۋىرسىندارىن سيپاپ كورىپ, مۇنداي قۇستى ءبىرىنشى رەت كورىپ تۇرعاندارىن تامسانىپ ايتادى. بەيباق قۇس وتكەن جۇمادا گوگول كوشەسىنىڭ بويىنداعى 146-شى ءۇيدىڭ ماڭىنان تابىلىپتى.
– تاپسىرىستى ورىنداپ بولىپ, ەسەپ بەرۋ ءۇشىن كەڭسەگە قاراي كەلە جاتىر ەدىم, الدەبىر قۇستىڭ جەر باۋىرلاپ ۇشىپ بارا جاتقانىن بايقادىم. كوپ ۇزاماي اناداي جەرگە بارىپ قوندى دا, ءبىر قاناتىن سۇيرەتىپ ءبىر-ەكى اتتاپ بارىپ كىلت توقتاي قالدى. جانىنا جاقىنداپ بارىپ ەدىم, قاشۋعا شاماسى جوق, ابدەن السىرەپ قالىپتى. ءاپ-ادەمى, ۇكىدەي جۇمساق ۇلبىرەگەن قۇس ەكەن. قوينىما قىسىپ, كوتەرىپ ۇيگە الىپ كەلىپ, كۇتىم كورسەتە باستادىم, – دەيدى كووپەراتيۆ سلەسارى گريگوري كۋليچەنكو.
دەمالىس كۇندەرى گريگوريدىڭ ۇيىندە بولعان اۋپىلدەك ءال جيناپ العان سوڭ, ءۇي يەسىنە ايبات شەگە باستاعان. سوندىقتان قۇستى كووپەراتيۆ كەڭسەسىنە كوشىرىپ, جۇمىس كابينەتىندەگى شكافتىڭ ىشىندە ۇستاۋعا تۋرا كەلگەن.
– قازىر ادامداردىڭ كوبى ەكزوتيكالىق قۇس, جانۋارلاردى ۇستاۋمەن اۋەستەنەدى. بۇل اۋپىلدەكتى بالكىم سولاردىڭ ءبىرى بوساتىپ جىبەرە سالۋى مۇمكىن. بۇگىندە جانۋارلاردى قورعاۋمەن اينالىساتىن ەرىكتىلەر قوعامى كوپ. ەندى سونداي ۇيىمداردىڭ بىرىنەن كومەك كۇتەمىز. ويتكەنى جابايى قۇستى ۇستاپ, باعىپ-قاعۋ قۇستىڭ ءتىلىن تۇسىنەتىندەي ارنايى ءبىلىمدى كەرەك ەتەدى. ورنيتولوگ ماماندار قولۇشىن سوزىپ قالار دەپ ۇمىتتەنەمىز, – دەدى «قۇرىلىسشى-2» پاتەر يەلەرى كووپەراتيۆىنىڭ زاڭگەرى ەلنار جارماعامبەتوۆ.
مامانداردىڭ ايتۋىنشا, اۋپىلدەك اققۇتاندار تۇقىمداسىنا جاتادى ەكەن. تابيعاتتا سيرەك كەزدەسەتىن ءارى جويىلىپ بارا جاتقان قۇستار ساناتىنداعى بۇل قۇس وزەن-كولدەردىڭ جاعاسىنداعى قالىڭ قامىستىڭ ءىشىن مەكەندەيدى. توبىل جاعالاۋىنا كوكتەمدە كەلىپ, ۇيا سالىپ, بالاپانداپ, قازاننىڭ سوڭىنا قاراي جىلى جاققا ۇشىپ كەتەدى ەكەن. قوستانايدان تابىلعان اۋپىلدەكتىڭ تاعدىرى قالاي بولاتىنىن, قازىرشە, بولجاۋ قيىن. بىراق وبلىستىق ورمان شارۋاشىلىعى جانە جانۋارلار الەمى ينسپەكتسياسىنىڭ ماماندارى كووپەراتيۆكە حابارلاسىپ, قۇستى ءوز قامقورلىقتارىنا الاتىندارىن ايتىپتى.
قوستاناي وبلىسى