زاماناۋي تەحنولوگيانىڭ, سونىڭ ىشىندە ۇشاتىن كولىكتەردىڭ قولدانىسقا ەنگەنىنە ءبىراز بولدى. الايدا كوپشىلىكتىڭ باس شايقاپ, تاڭىرقايتىن دۇنيەلەرى كوپ-اق. وسىعان وراي ۇشقىشسىز ۇشاتىن اۋە كولىكتەرى جايلى ءبىراز اقپارات لەگىن اقتارىپ كورەلىك.
امەريكالىق Ansys تەحنولوگيالىق كومپانياسى جاھان تۇرعىندارىنىڭ اراسىندا ارنايى ساۋالداما جۇرگىزگەن بولاتىن. ناتيجەسىندە, ۇشقىشسىز ۇشاتىن كولىكتى پايدالانۋعا رەسپوندەنتتەردىڭ 64%-ى دايىن ەكەن. بۇعان ءۇندىستاننان (92%), قىتايدان (86%) جانە جاپونيادان (57%) تۇرعىندار ۇلكەن قىزىعۋشىلىق تانىتىپ وتىرعان جايى بار.
بۇل رەتتە ساۋالداماعا جاۋاپ بەرگەندەردىڭ 86%-ى كولىكتىڭ جاڭا تۇرلەرى تەحنيكالىق اقاۋلارعا جانە كۇردەلى جوندەۋلەرگە ءالى دە دايىن ەمەستىگىن, سويتە تۇرا تىڭ جاڭالىقتى قولدانعىسى كەلەتىندەردىڭ كۇن ساناپ ارتىپ كەلە جاتقانىن تىلگە تيەك ەتتى.
جۋىردا اۋستريانىڭ لينتس قالاسىندا قوعامدىق كولىك جۇيەسى اەروتاكسيمەن, ياعني اۋەدە ۇشاتىن رەيستىك كولىكتەرمەن تولىقتىرىلادى. بۇل ينفراقۇرىلىم 2021 جىلى قولدانۋعا بەرىلمەك. اەروتاكسي تەك جولاۋشىلاردى تاسىمالداپ قانا قويماي, جۇك تيەمەلەرىن دە جەتكىزەتىن بولادى. سىناقتان وتكىزۋ بارىسى حالىق قونىستانباعان ايماقتا جانە جولاۋشىلارسىز تاجىريبەدەن وتەدى. العاشقى تىكۇشاق ايلاعى دۋنايدىڭ ەكى جاعالاۋىندا پايدا بولادى دەپ جوسپارلانىپ جاتىر.
لينتس قالاسى – اۋسترياداعى تۇرعىندار سانى بويىنشا ءۇشىنشى ورىندا. وندا 200 مىڭنان استام حالىق شوعىرلانعان. تۇرعىنداردىڭ باسىم كوپشىلىگى قالا ماڭىندا قونىستانعان. جوبا ۇيىمداستىرۋشىلارىنىڭ پىكىرىنشە, اەروتاكسيدى سىناقتان وتكىزۋ ءۇشىن وسى ايماق قولايلى.
لينتستە پايدا بولاتىن EHang 216 اەروموبيلدەرىن اۋستريالىق جانە قىتايلىق ينجەنەرلەر بىرلەسىپ ازىرلەدى. كابينادا ەكى جولاۋشىعا ارنالعان ورىن بار. سونداي-اق اەروتاكسي 260 كيلو جۇك تيەي الادى. ال ديزاينى الىپ كۆادروكوپتەرگە ۇقسايدى. اەروتاكسي ساعاتىنا 150 شاقىرىمعا دەيىن جىلدامدىقپەن ۇشادى. 2019 جىلى ۆەنا ورتالىعىنداعى فۋتبول الاڭىندا EHang 216-نىڭ العاشقى سىناعى بولعان ەدى. سول كەزدە اەروتاكسي جولاۋشىلارمەن بىرگە اۋەگە كوتەرىلىپ, ستاديوندى اينالىپ ۇشقان.
سونىمەن قاتار تۇركيانىڭ Baykar Defense كومپانياسى Cezeri-ءدىڭ «ۇشاتىن كولىگىن» سىناقتان ءساتتى وتكىزدى. تىكۇشاقتىڭ سىرتقى بولىگى الىپ درونعا ۇقسايدى. كولىكتىڭ 230 كيلو بولاتىن تۇپنۇسقاسى 10 مەتر بيىكتىككە كوتەرىلگەن. وسىلايشا كومپانيا وكىلدەرى تۇپنۇسقالاردىڭ بىرنەشە ءتۇرىن قۇراستىراتىنىن جانە بورتتى اداممەن بىرگە ۇشىراتىنىن حابارلادى.
بولجامدارعا سايكەس «ۇشاتىن كولىكتى» ساعاتىنا 100 شاقىرىمعا دەيىنگى جىلدامدىقپەن دامىتا وتىرىپ, 2 مىڭ مەترگە دەيىن بيىكتىككە كوتەرىلە الاتىنداي ەتىپ قۇراستىرۋ. الايدا نارىققا شىعارۋ ءۇشىن تاعى 10-15 جىل قاجەت بولاتىنىن ەسكە سالدى. سونداي-اق «ۇشاتىن كولىككە» XII عاسىردىڭ ايگىلى مۇسىلمان ينجەنەرى جانە ەرۋديتى يسمايل ءال-ءدجازاريدىڭ (Ismail al-Jazari) ەسىمى بەرىلگەن.
بۇدان بولەك, الەمگە ايگىلى Lilium ستارتاپ كومپانياسى 2025 جىلى ۇشاتىن تاكسيدى قولدانىسقا شىعارۋدى جوسپارلاپ وتىر. العاشقى كەڭ كولەمدى ۇشاتىن قۇرىلعىنى سىناقتان وتكىزگەن ستارتاپەرلەر Gett جانە Airbus مەنەدجەرلەرىمەن بىرلەسە جۇمىس ىستەۋدە. Gett-تاكسي كومپانياسىنىڭ ەۋروپا بولىگىنە جاۋاپتى ديرەكتورى رەمو گەربەر: ء«بىزدىڭ كومپانيا ۇجىمى ءاردايىم ەرەكشە دۇنيە جاساۋعا اتسالىسىپ كەلەدى. جوبامىزدىڭ باستاپقى نۇسقاسى دا دايىن. وعان قوسا, Lilium ستارتاپەرلەرى – وتە بىلىكتى ماماندار. جولاۋشىلارعا ارنالعان اەروتاكسي قۇرىلعىسىن جالعاستىرا بەرەمىز», دەيدى.