پاندەمياعا بايلانىستى الەمدەگى قۇندىلىقتار كۇرت وزگەرىپ, داعدارىستىڭ قاتاڭ كەزەڭى باستالعان ساتتەن بەرى 7 ايعا جۋىق ۋاقىت ءوتتى. الەمدىك كارانتين شارالارى, ءوزىن ءوزى وقشاۋلاۋ, توتەنشە جاعداي رەجىمى تۇتىنۋشىلار ءۇشىن عانا ەمەس, بيزنەس ءۇشىن دە قالىپتى ءومىر سالتىنا اينالىپ كەتتى. جاعدايعا تەز بەيىمدەلگەن ءارتۇرلى سالاداعى كومپانيالار ونلاين-جارناما قۇرالدارىن بەلسەندى قولدانۋعا كوشكەن. دەسە دە, كورونا-داعدارىس ينتەرنەت-ماركەتينگ يندۋسترياسىنىڭ اياقتان تىك تۇرۋىنا مۇمكىندىك بەردى دەۋگە بولا ما؟
ءىجو, كارانتين جانە تۇتىنۋشىلىق سۇرانىس
شەكتەۋ شارالارى مەن ىشكى جالپى ءونىم ء(ىجو) اراسىندا تىكەلەي بايلانىس بار ەكەندىگى بەلگىلى. بۇرىن دۇكەن ارالاپ ساۋدا جاسايتىن جۇرتتىڭ ۇيدەن شىعۋى مۇڭعا اينالدى. ەسەسىنە, ۇيدە وتىرىپ «ساتىپ الۋ» دەگەن باتىرماعا بايلانعاندار سانى كۇرت وسكەن دەيدى ماماندار. Google, Allianz Research, Qualified.One, ياندەكس, Otonomo, Apple, Euler Hermes ىزدەۋ جۇيەلەرىندە بۇل ءسوز بىرنەشە ايدىڭ ىشىندە ەڭ كوپ قولدانىلعان سوزدەر قاتارىنا كىردى. بۇل – تۇتىنۋشىلىق سۇرانىستىڭ تولىق دەرلىك ينتەرنەتكە كوشكەنىن كورسەتكەنىمەن, الەمدىك ەكونوميكانى داعدارىسقا دەيىنگى كەزەڭدە ۇستاپ تۇرۋ ءۇشىن ءالسىز بولىپ وتىر.
اقپاراتتىق سۇراۋ جۇيەسى
COVID-19 ادامداردىڭ ۇرەيىن ۇشىرسا, كارانتيندىك وقشاۋلانۋ رەجىمى ولاردى ىزدەۋ, ىزدەنۋ شارالارىنا بەيىمدەي باستادى. جاھان جۇرتشىلىعى تاراپىنان اقپاراتتىق سۇرانىس ارتا تۇسكەن. ماسەلەن, ءساۋىر ايىنان باستاپ الەمدىك سەگمەنتتە «نەگە؟», «قالاي؟» جانە «نە؟» دەگەن سوزدەردى قامتيتىن ۆەب-ىزدەۋ سۇراۋلارىنىڭ سانى ناۋرىز ايىمەن سالىستىرعاندا 1,6 ەسەگە ءوسىپتى. قازىر كۇزدىڭ العاشقى ايى ەكەنىن ەسكەرسەك, بۇل كورسەتكىش تاعى 4 ەسەگە ارتقان.
جارناما جانە ماركەتينگ
جاھاندىق وزگەرىستەردەن كەيىن بيزنەس ماركەتينگتىك ستراتەگيالاردى بەيىمدەۋگە ءماجبۇر بولدى. جالپى, بۇل وزگەرىستەر ادەتتەگى جارنامالىق ارنالاردان ينتەرنەتكە اۋىسۋ ءۇردىسىن جيىلەتتى دەۋگە نەگىز بار. Digital-اگەنتتىكتەرىمەن جانە جارناما اگەنتتىكتەرىمەن بايلانىستى ىزدەۋ سۇراۋلارىنىڭ كولەمى Google جانە Qualified.One جۇيەلەرىندە كۇرت وسكەن. بۇل كلاسسيكالىق جارناما اگەنتتىكتەرىنىڭ تانىمالدىلىعى تومەندەسە, كەرىسىنشە, تسيفرلى قىزمەتتەر بارعان سايىن تانىمال بولا باستاعانىن بىلدىرەدى. ماسەلەن, اقش نارىعىندا ەڭ تانىمال ونلاين-ارنا SEO 2020 جىلدىڭ تامىزىندا 2019 جىلعا قاراعاندا 2,6 ەسە ءجيى ىزدەلگەن. بۇل جىلىنا 160% ءوسىمدى كورسەتىپ وتىر.
ينتەرنەت ماركەتينگ جايلى ايتقاندا, جارناما اگەنتتىكتەرىنەن بولەك, الەۋمەتتىك جەلىنى دە ۇمىتۋعا بولمايدى. ويتكەنى مازمۇندى ماركەتينگكە دەگەن سۇرانىس ءبىر جىلدا 33%-عا وسكەن. ال Google Adwords جانە Facebook جەلىلەرىندەگى ماقساتتى جارنامالارى 21-22%-عا تانىمال بولدى.