سيقىرلى سازى سالقار دالانى تۇتاس تەربەگەن كورنەكتى سازگەر نۇرعيسا تىلەنديەۆ شىعارمالارى حالقىنىڭ ماڭگىلىك مۇراسىنا اينالعالى قاشان. ۇلى كومپوزيتوردىڭ 95 جىلدىعىنا وراي جاس دومبىراشىلار مەن انشىلەر اراسىندا ۇيىمداستىرىلعان «القيسسا» بايقاۋى مارەگە جەتتى.
بايقاۋ قورىتىندىسى مادەنيەت جانە سپورت مينيسترلىگىنىڭ ۇيىتقى بولۋىمەن اسەم فەستيۆالعا ۇلاسىپ, كوزى تىرىسىندە نۇرعيسا اتاباي ۇلىنىڭ ءوزى قۇرعان «وتىرار سازى» وركەسترى دارىن يەسىنىڭ ەڭ تانىمال كومپوزيتسيالارىن اۋەلەتە ورىندادى.
ءبىر ايعا سوزىلعان رەسپۋبليكالىق ءان مەن كۇي سايىسىنا قاتىسۋعا نيەت بىلدىرگەن جاستاردىڭ دەنى كاسىبي مۋزىكانتتار. سوندىقتان دا باق سىناعان ونەرپازداردىڭ اراسىنان كىل مىقتىنى انىقتاۋ وڭايعا سوقپاعان. قازىلار القاسىنىڭ شەشىمىمەن تىلەنديەۆ شىعارمالارىن ناقىشىنا كەلتىرە ورىنداعاندار ءبىر تۋردان كەلەسى تۋرعا جولداما الىپ وتىرعان. فەستيۆال اياسىنداعى بارلىق ءىس-شارالار ونلاين فورماتتا وتكەندىكتەن قاتىسۋشىلار ءوز ونەرلەرىن بەينەبايان تۇرىندە پاش ەتتى.
قازىلار القاسىنىڭ شەشىمى بويىنشا, «دومبىرا» اتالىمىنداعى 1-ورىن داستان قازكەنوۆتىڭ, 2-ورىن ەراسىل ريناتوۆ پەن ارسەن تۇرسىنوۆتىڭ, ال جۇلدەلى ءۇشىنشى ورىن راۋان جەكسەمبى مەن ەرتىس سايىرحان ەسىمدى جاس كۇيشىلەردىڭ ەنشىسىنە بۇيىردى.
«ۆوكال» اتالىمىندا گۇلدانا الدادوسوۆا مەن ايگەرىم التىنبەك توپ جارسا, ەكىنشى ورىنعا تولەگەن راحىمباەۆ, دىنمۇحامەد كوشكىنباەۆتار يە بولدى. ايتۋلى بايقاۋدىڭ ءۇشىنشى تۇعىرىنان كورىنگەن قوس ونەرپاز اسەم اۋباكىروۆا مەن سىمبات تاسبەرگەنوۆا كوپشىلىكتىڭ ىقىلاسىنا بولەندى. سونداي-اق تىلەنديەۆتەر وتباسى تاعايىنداعان ارنايى سىيلىق نۇرداۋلەت ساعاتبەككە تابىستالدى.
ءان مەن كۇيدىڭ ايدىنى شالقىعان دوداعا قازاقستاننىڭ ەڭبەك سىڭىرگەن ءارتىسى جەكسەمبەك نۇرجاۋوۆ, قازاقستاننىڭ ەڭبەك سىڭىرگەن قاي̆راتكەرلەرى ەرمۇرات ۇسەنوۆ, ءجاميلا باسپاقوۆا, دينا حامزينا, ءدىنزۋحرا تىلەنديەۆا سىندى ونەر مايتالماندارى قازىلىق ەتتى.
جەڭىمپازداردىڭ قاتىسۋىمەن وتكەن گالا-كونتسەرتتى كورەرمەندەر جامبىل اتىنداعى قازاق مەملەكەتتىك فيلارمونياسىنىڭ You Tube ارناسىنان تاماشالادى.
– ءبىز بۇل فەستيۆالگە ۇزاق ۋاقىت دايىندالدىق. باستاپقىدا رەسپۋبليكا سارايىندا, وپەرا تەاترىندا وتكىزەمىز دەپ ويلاعان ەدىك. بىراق پاندەمياعا بايلانىستى ونلاي فورماتتا وتكىزۋگە تۋرا كەلدى. ۆوكال مەن دومبىرا اتالىمدارى بويىنشا ۇيىمداستىرىلعان بايقاۋ جوعارى دەڭگەيدە سالتانات قۇردى دەپ ايتا الامىز. ال قورىتىندى كونتسەرتتىك باعدارلامادا اكەمنىڭ حالىققا كەڭىنەن تانىمال ەمەس تۋىندىلارىن كوبىرەك ورىنداۋعا تىرىستىق. ارينە, تانىمال تۋىندىلارى دا شىرقالدى, – دەيدى «وتىرار سازى» وركەسترىنىڭ باس ديريجەرى ءدىنزۋحرا تىلەنديەۆا.
ايتۋلى بايقاۋ وسكەلەڭ ۇرپاقتى كومپوزيتوردىڭ شىعارماشىلىعىمەن سۋسىنداتۋ, ۇلتتىق مۋزىكالىق مۇراعا دەگەن ىنتالارىن وياتۋ ماقساتىندا قولعا الىنعانىن ايتقان جامبىل اتىنداعى مەملەكەتتىك فيلارمونيانىڭ ءباسپاسوز حاتشىسى مانار اليەۆا, جىل سوڭىنا دەيىن ونەر ۇجىمى تىلەنديەۆ مۇراسىنا ارنالعان بىرنەشە جوبانى جۇزەگە اسىرۋدى جوسپارلاپ وتىرعانىن جەتكىزدى.
الماتى