ۇستىمىزدەگى جىلعى 10 قاراشا كۇنى استاناداعى «استانا-ارەنا» سپورت كەشەنىندە قاراعاندىنىڭ «شاحتەر» جانە تارازدىڭ «تاراز» كوماندالارى اراسىندا فۋتبولدان قازاقستاننىڭ 2013 جىلعى كۋبوگى ءۇشىن فينالدىق ويىن بولىپ ءوتتى. وندا 1:0 ەسەبىمەن جەڭىسكە جەتكەن كەنشىلەر كومانداسى كۋبوكقا قول جەتكىزدى. قاراعاندىلىقتارعا بۇل جۇلدەنى ماتچتى ارنايى كەلىپ كورگەن مەملەكەت باسشىسى نۇرسۇلتان نازارباەۆ تابىس ەتتى.
«شاحتەر» كەزدەسۋدىڭ باسىنان بىردەن شابۋىلعا شىقتى. كوماندانىڭ بۇل ماتچتان كوپ ءۇمىت كۇتەتىنى باس جاتتىقتىرۋشى ۆيكتور كۋمىكوۆتىڭ ۇستانعان تاكتيكاسىنان بايقالدى. ول ەلىمىزدىڭ چەمپيوناتىندا ءوز شاكىرتتەرىنىڭ جۇلدەلى ورىنداردان كورىنە المايتىنى بەلگىلى بولا باستاعان كەزدە بار كۇش-جىگەردى بىردەن ەۋروپا فۋتبول الاڭدارىنداعى شايقاستارعا اۋدارىپ جىبەردى.
ۇستىمىزدەگى جىلعى 10 قاراشا كۇنى استاناداعى «استانا-ارەنا» سپورت كەشەنىندە قاراعاندىنىڭ «شاحتەر» جانە تارازدىڭ «تاراز» كوماندالارى اراسىندا فۋتبولدان قازاقستاننىڭ 2013 جىلعى كۋبوگى ءۇشىن فينالدىق ويىن بولىپ ءوتتى. وندا 1:0 ەسەبىمەن جەڭىسكە جەتكەن كەنشىلەر كومانداسى كۋبوكقا قول جەتكىزدى. قاراعاندىلىقتارعا بۇل جۇلدەنى ماتچتى ارنايى كەلىپ كورگەن مەملەكەت باسشىسى نۇرسۇلتان نازارباەۆ تابىس ەتتى.
«شاحتەر» كەزدەسۋدىڭ باسىنان بىردەن شابۋىلعا شىقتى. كوماندانىڭ بۇل ماتچتان كوپ ءۇمىت كۇتەتىنى باس جاتتىقتىرۋشى ۆيكتور كۋمىكوۆتىڭ ۇستانعان تاكتيكاسىنان بايقالدى. ول ەلىمىزدىڭ چەمپيوناتىندا ءوز شاكىرتتەرىنىڭ جۇلدەلى ورىنداردان كورىنە المايتىنى بەلگىلى بولا باستاعان كەزدە بار كۇش-جىگەردى بىردەن ەۋروپا فۋتبول الاڭدارىنداعى شايقاستارعا اۋدارىپ جىبەردى.
سونىڭ ارقاسىندا ونىڭ جىگىتتەرى قازاقستان كوماندالارى اراسىنان ءبىرىنشى بولىپ ەۋروپا ليگاسىنىڭ توپتىق كەزەڭىندە ونەر كورسەتۋ دەڭگەيىنە دەيىن جەتتى. ال جاساقتىڭ توپتىق كەزەڭدە كەلەسى اينالىمعا شىعا الماسىن بىلگەسىن, قازاقستان كۋبوگى ءۇشىن ايقاستى ءبىرىنشى كەزەككە شىعارا قويدى. ءسويتىپ, ول بۇدان بىرقاتار ۋاقىت بۇرىن كارى قۇرلىق كوماندالارى دوداسىنىڭ جاۋاپتى ماتچتارى الدىندا قالاي پرەمەر-ليگا ويىندارىنا كەنشىلەردىڭ ەكىنشى قۇرامىن شىعارسا, وسىدان بىرنەشە كۇن بۇرىن گوللانديادا وتكەن توپتىق كەزەڭنىڭ كەزەكتى ويىنىنا دا قوسالقى قۇرامىن سالا قويدى. بۇل ارالىقتا نەگىزگى قۇرام رەسپۋبليكا كۋبوگى ءۇشىن كەزدەسۋگە قىزۋ دايىندالىپ جاتتى.
ءوزىن وسىنداي تاكتيك رەتىندە تانىتقان ۆيكتور كۋمىكوۆتىڭ كومانداسى فينالدىق ويىننىڭ بارىسىندا قارسىلاسىنا قاراعاندا تىڭ كورىندى. ونىڭ ماتچتاعى قيمىلىنا قاراپ, بيىل ءۇش مايداندا قاتار شايقاسقان كوماندانىڭ ساربازدارىن كورگەندەي بولا الماعانىمىزدىڭ ءبىر سەبەبى, الگىندەگىدەي ونى وسى كۇنگە باپتاپ جەتكىزگەن باپكەردىڭ ەڭبەگىندە جاتىر ەدى. سوندىعىنان بولار, ءبىرىنشى تايم تولىق قاراعاندىلىقتاردىڭ بەلسەندىلىگىندە قالدى. ارا-تۇرا تارازدىقتاردىڭ شولعىن جاساپ تۇرعاندارى بولماسا, نەگىزىنەن باسىمدىق سولاردىڭ تىزگىنىندە تۇردى. الايدا, كەزدەسۋدىڭ ءبىرىنشى بولىگىندە ەكى جاق تا ەسەپ اشا الماي, تەڭ تارقاستى.
ەكىنشى تايمدى تاعى دا «شاحتەر» شابۋىلمەن ءوربىتىپ اكەتتى. ونىڭ ويىنشىلارى قارسى جاققا قىسىمدى بۇرىنعىدان بەتەر كۇشەيتە ءتۇستى. اقىرى 53-مينۋتتا ولار سول باسىمدىلىقتى گولعا دا اينالدىرىپ ۇلگەردى. ايتاتىنى جوق, ول كەرەمەت ءبىر ۇيلەسىمدىلىككە قوسا دالدىكتى تانىتاتىنداي بولىپ سوعىلدى. وسى جەردە كەنشىلەردىڭ «ەۋروپانى كورگەندەرى» انىق اڭعارىلىپ قالدى. ونى ايىپ الاڭىنا لىپ ەتىپ جەتىپ كەلگەن دوپقا ءوزىن قورشاعان ەكى قورعاۋشىنىڭ اراسىنان سىتىلىپ شىعىپ, اياعىن تيگىزىپ ۇلگەرگەن سەرگەي حيجنيچەنكو ءتۇسىردى. دوپتىڭ ۇشىپ كەلىپ, ونىڭ اياعىنا ءتيۋى مەن ودان قايتا سەرپىلىپ بارىپ, قاقپانىڭ تورىنا گۇمپ ەتىپ تۇسە قالۋى قۇددى ءبىر بيلياردتىڭ شارىن ناعىز قاس شەبەرى كەرىمى كەلىسكەن كيمەن ۇرعانىنداي ادەمى اسەر قالدىردى.
قاراعاندى فۋتبولشىلارى بۇدان كەيىن دە ەسەپتى ۇلعايتاتىن مۇمكىندىكتەردى تالاي رەت جىبەرىپ الدى. مۇنداي اتتەگەنايدى الەكساندر سيمچەۆيچ پەن سەرگەي حيجنيچەنكو باستارىنان كەشىپ ءوتتى. بىراق ولار راميل نۇرمۇحامەتوۆتى قاپى قالدىراتىنداي ايلا تاپپادى. كەنشىلەر بۇدان كەيىن دە بىرنەشە رەت ەسەپتى ەسەلەۋگە شاق قالدى. سونىڭ بارىندە تارازدىقتار سوڭعى ساتتەردە قاقپالارىن گولدان امان الىپ قالىپ جاتتى. سوعان قاراماستان, «شاحتەر» سوڭعى ساتكە دەيىن شابۋىلداۋدان قايتقان جوق. ءسويتىپ, جوعارىداعى حيجنيچەنكو سالعان جالعىز دوپ كۋبوكتىڭ تاعدىرىن شەشىپ كەتتى.
ايتا كەتۋ كەرەك, بۇل ماتچتى ەلىمىزدىڭ پرەزيدەنتى نۇرسۇلتان نازارباەۆپەن بىرگە ۋەفا پرەزيدەنتى ميشەل پلاتيني, ونىڭ ورىنباسارى, ۋكراينا فۋتبول فەدەراتسياسىنىڭ بۇرىنعى پرەزيدەنتى گريگوري سۋركيس, رەسەي فۋتبول وداعىنىڭ باسشىسى نيكولاي تولستىح تاماشالادى.
تاعى ءبىر ايتا كەتەتىنىمىز, بۇل «شاحتەردىڭ» قازاقستان كۋبوگى فينالىنداعى ءبىرىنشى جەڭىسى بولىپ تابىلادى. ول بۇعان دەيىن ەكى رەت – 2009 جانە 2010 جىلدارى اقتىق ايقاستا ۇتىلىپ قالعان ەدى. وسى جەڭىسى ارقىلى قاراعاندىلىقتار ەۋروپا ليگاسىنا كەلەسى جىلعا جولداما دا الىپ قويدى.
سوڭعى قوسارىمىز, «شاحتەردى» 2011, 2012 جىلدارى قازاقستاننىڭ چەمپيونى دەگەن اتاققا جەتكىزگەن ۆيكتور كۋمىكوۆ بيىل وعان ەلىمىزدىڭ كۋبوگىن دا الىپ بەردى. ال مۇنداي جەتىستىككە جەتكەن جاتتىقتىرۋشىلار بىزدە ونشالىقتى كوپ ەمەس.
دامير قوجامقۇل.