ءماجىلىستىڭ جۇمىس توپتارىندا جاڭا زاڭ جوبالارى بويىنشا جۇمىس جالعاسۋدا. كارانتين جاعدايىندا جۇمىس توپتارىنىڭ وتىرىستارى بەينەكونفەرەنتسيا بايلانىس رەجيمىندە وتكىزىلەدى. زاڭنامالىق جاڭالىقتاردى تالقىلاۋعا ءماجىلىس دەپۋتاتتارىمەن قاتار قوعامدىق جانە ۇكىمەتتىك ەمەس ۇيىمدار مەن مەملەكەتتىك ورگانداردىڭ وكىلدەرى قاتىسۋدا. بۇل تۋرالى ءماجىلىستىڭ ءباسپاسوز قىزمەتى حابارلادى.
مىسالى, ءماجىلىستىڭ قارجى جانە بيۋدجەت كوميتەتى «2021 – 2023 جىلدارعا ارنالعان رەسپۋبليكالىق بيۋدجەت تۋرالى» جانە ۇلتتىق قوردان كەپىلدەندىرىلگەن ترانسفەرت تۋرالى زاڭ جوبالارىمەن جۇمىس جۇرگىزۋدە. سونداي-اق, ەكولوگيا ماسەلەلەرى جانە تابيعاتتى پايدالانۋ كوميتەتىنىڭ جۇمىس توبىندا قوعام وكىلدەرى «ەكولوگيالىق كودەكس» جوباسىن بەلسەندى تالقىلاۋدا. الەۋمەتتىك سالاعا قاتىستى زاڭ جوبالارىن ءماجىلىستىڭ الەۋمەتتىك-مادەني دامۋ كوميتەتى قاراستىرۋدا. اتاپ ايتقاندا, بالا قۇقىقتارىن قورعاۋعا, وتباسىلىق-تۇرمىستىق زورلىق-زومبىلىققا قارسى ءىس-قيمىلعا, وتباسىلىق-گەندەرلىك ساياساتقا, دەنە شىنىقتىرۋ مەن سپورتقا, ءبىلىم بەرۋگە, اقپاراتقا جانە قارىزدىق ەڭبەكتى رەتتەۋگە قاتىستى زاڭ جوبالارى بار.
سونىمەن قاتار, زاڭناما جانە سوت-قۇقىقتىق رەفورما كوميتەتىنىڭ مۇشەلەرى «نوتاريات تۋرالى» زاڭ جوباسىنا دەپۋتاتتىق تۇزەتۋلەردى, ادۆوكاتتىق قىزمەت جانە زاڭ كومەگى ماسەلەلەرى جونىندەگى جانە نورما شىعارۋدى جەتىلدىرۋ ماسەلەلەرىنە قاتىستى زاڭ جوبالارىن, ال, ەكونوميكالىق رەفورما جانە وڭىرلىك دامۋ كوميتەتى مەملەكەتتىك ساتىپ الۋ, تەحنيكالىق رەتتەۋ جانە ت.ب. سالاداعى زاڭ جوبالارىن قارايتىن بولادى. «ەرەكشە تاۋارلاردى باقىلاۋ تۋرالى» زاڭ جوبالارى مەن كاسپي تەڭىزىندە قىزمەتتى جۇزەگە اسىرۋعا بايلانىستى تۇزەتۋلەردى ءماجىلىستىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ مۇشەلەرى تالقىلايدى. اگرارلىق ماسەلەلەر كوميتەتىنىڭ شەڭبەرىندە جۇمىس توپتارى ۆەتەريناريا جانە اسىل تۇقىمدى مال شارۋاشىلىعى ماسەلەلەرىنە قاتىستى زاڭ جوبالارى بويىنشا قورىتىندىلار دايىندايدى.