Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك ۇستازدار قاۋىمىن ءتول مەرەكەسىمەن قۇتتىقتاپ, Facebook پاراقشاسىندا جازبا جاريالادى, دەپ حابارلايدى Egemen.kz
"قادىرلى ۇستازدار!
سىزدەردى Nur Otan پارتياسى جانە ءوز اتىمنان ءتول مەرەكەلەرىڭىزبەن شىن جۇرەكتەن قۇتتىقتايمىن! بۇل كۇن ۇستاز الدىن كورگەن, ءتالىم-تاربيەسىن العان بارشا ازاماتتىڭ جۇرەگىنە ەرەكشە ىستىق.
ادامزات ءۇشىن ۇستاز – دۇنيەدەگى ەڭ اياۋلى دا ارداقتى ەسىمدەردىڭ ءبىرى. مەملەكەتتىڭ يدەولوگياسى, قوعام قۇندىلىقتارى, عىلىم مەن ونەردىڭ اسىل مۇراسى ۇستازدىڭ ءتالىم-تاربيەسى ارقىلى ۇرپاقتان-ۇرپاققا جول تارتىپ كەلەدى.
"ادامنىڭ ادامگەرشىلىگى جاقسى ۇستازدان بولادى" دەپ ۇلى اباي ايتقانداي, جاس ۇرپاقتى ازامات ەتىپ تاربيەلەۋدەگى ۇلەستەرىڭىزدى ايرىقشا اتاپ وتكىم كەلەدى. ۇرپاق بولاشاعى, مەملەكەتىمىزدىڭ كەلەشەگى – سىزدەردىڭ قولدارىڭىزدا.
قازىر ەلىمىزدەگى ءبىلىم سالاسىندا جارتى ميلليوننان استام ادام ەڭبەك ەتۋدە. ءبىزدىڭ پارتيا مۇشەلەرىنىڭ 30% – پەداگوگتەر. پارتيا ۇستازداردىڭ مۇددەسىن قورعاپ, الەۋمەتتىك جاعدايىن جاقسارتا ءتۇسۋ باعىتىندا جۇيەلى جۇمىس جاساپ جاتىر. ەلباسى, Nur Otan پارتياسىنىڭ توراعاسى نۇرسۇلتان نازارباەۆتىڭ تاپسىرماسىنا سايكەس "پەداگوگ مارتەبەسى تۋرالى" زاڭ جوباسى ازىرلەنىپ, قابىلداندى. بۇل مۇعالىم ماماندىعىنا دەگەن قىزىعۋشىلىقتى ارتتىرۋعا, الەۋمەتتىك كەپىلدىك جۇيەسىن ودان ءارى جەتىلدىرۋگە جاعداي تۋعىزدى. تاۋەلسىزدىك جىلدارى ەلباسى باسشىلىعىمەن 2 مىڭعا جۋىق جاڭا مەكتەپ سالىندى, سوڭعى بەس جىل ىشىندە عانا پارتيانىڭ 2016-2020 جىلدارعا ارنالعان سايلاۋالدى باعدارلاماسىن ىسكە اسىرۋ اياسىندا 3 مىڭنان استام بالاباقشا اشىلىپ, بۇل مەكتەپ جاسىنا دەيىنگى بالالاردى قامتۋ كولەمىن 86%-دان 98,5%-عا دەيىن ۇلعايتۋعا مۇمكىندىك بەردى.
مەملەكەت باسشىسى قاسىم-جومارت توقاەۆتىڭ باستاماسىمەن ءتورت جىل كولەمىندە پەداگوگتەردىڭ جالاقىسى 2 ەسە كوبەيەتىن بولدى. بۇنىڭ بارلىعى – ەلباسى مەن پرەزيدەنت ساياساتى ساباقتاستىعىنىڭ ناتيجەسى, ۇستاز مارتەبەسىن كوتەرۋ ءۇشىن جاسالىپ جاتقان شارالاردىڭ ناقتى كورسەتكىشى.
پاندەميا كەزىندە مەكتەپتەردىڭ ءبارى قاشىقتان وقىتۋعا كوشكەندە بالانى تاربيەلەۋ مەن وعان ءبىلىم بەرۋدە مۇعالىمنىڭ ماڭىزى قانشالىقتى زور ەكەنىنە بارشانىڭ كوزى جەتتى. وسىعان بايلانىستى تۋىنداعان كەيبىر قيىندىقتارعا قاراماستان, ۇستازدارىمىز ءوز ىسىنە جاۋاپكەرشىلىكپەن قاراپ, زامان تالابىنا ساي مىندەتتەرىن ابىرويمەن اتقارۋدا. سوندىقتان دا ءبىز شاكىرتتەرىنىڭ ساناسىنا ءبىلىم ءنارىن قۇيىپ جۇرگەن ۇستازدارىمىزدى ءاردايىم ماقتان تۇتامىز.
بارشاڭىزعا زور دەنساۋلىق, باق-بەرەكە, شىعارماشىلىق تابىس تىلەيمىن!", دەدى باۋىرجان بايبەك.