قازاقستان پرەزيدەنتى قاسىم-جومارت توقاەۆ كۋۆەيت مەملەكەتىنىڭ ءامىرى شەيح ناۋاف ءال-احماد ءال-دجابەر اس-ساباحتىڭ اسا جاۋاپتى لاۋازىمعا تاعايىندالۋىنا بايلانىستى قۇتتىقتاۋ جەدەلحاتىن جولدادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
ء"سىزدى تاققا وتىرعىزۋ تۋرالى شەشىمدى كۋۆەيتتىڭ وركەندەۋىنە جانە مۇددەسىن قامتاماسىز ەتۋگە ۇزاق جىلدان بەرى ءسىڭىرىپ كەلە جاتقان رياسىز قىزمەتىڭىزگە اۋلەتىڭىز بەن وتانداستارىڭىزدىڭ بەرگەن جوعارى باعاسى ءارى ەلىڭىزدىڭ يگىلىگى جولىنداعى بولاشاق جەڭىستەرىڭىزگە دەگەن نىق سەنىمىنىڭ ايعاعى دەپ بىلەمىن. قازىرگى تاڭدا كۋۆەيت – ىرگەسى بەرىك, ەكونوميكاسى الەۋەتتى, حالقىنىڭ ءال-اۋقاتى جىلدان جىلعا ارتىپ وتىرعان ەل, سونداي-اق ونىڭ حالىقارالىق قاۋىمداستىقتاعى مەرەيى دە ۇستەم. وسى رەتتە ءسىزدىڭ باسشىلىعىڭىزبەن كۋۆەيت مەملەكەتىنىڭ دامۋى باياندى بولىپ, يگى ماقسات-مۇراتتارعا جەتە بەرۋىنە تىلەكتەسپىن", دەلىنگەن جەدەلحاتتا.
قاسىم-جومارت توقاەۆ قازاقستان مەن كۋۆەيت حالىقتارىنىڭ يگىلىگى ءۇشىن ەكى ەل اراسىنداعى شىنايى دوستىق پەن ءوزارا قولداۋعا نەگىزدەلگەن ءارتۇرلى سالاداعى ىنتىماقتاستىقتى ورىستەتۋگە, بىرلەسە كۇش-جىگەر جۇمساۋعا دايىن ەكەنىن راستادى.
مەملەكەت باسشىسى شەيح ناۋاف ءال-احماد ءال-دجابەر اس-ساباحتىڭ اسا جاۋاپتى قىزمەتىنە مول تابىس, ال دوستاس كۋۆەيت حالقىنا قۇت-بەرەكە تىلەدى.