شىنىقتىرۋدىڭ شەبەرى

باۋىرجانمەن بىرەر اپتا بۇرىن گازەتكە كەزەكتى ءبىر ماتەريالدى ازىرلەۋ بارىسىندا تانىستىق. Instagram جەلىسى ار­قىلى ونلاين-جات­تىعۋ جۇر­گىزەتىنىن كورىپ قال­عانى­مىز بار-تىن. سوزگە تارتتىق. دەنە دايىندىعىنا, فيتنەس-ين­دۋس­ترياعا قاتىستى ايت­قان تۇ­شىم­دى ويلارى ۇنادى. سويتسەك, ول وسى سالانى ءبىر كىسى­­دەي مەڭ­گەر­گەن كاسىبي مامان ەكەن.

ادەتتە, ءىرى فيتنەس-كلۋبتاردا بۇلشىق ەتى بۇلتيىپ, نۇس­قاۋ بەرىپ جۇرەتىن جاتتىق­تىرۋ­شىلاردىڭ ىشىنەن قازاق جىگىتتەرىن سيرەك كەزدەستىرەمىز. سوندىقتان بولار, باۋىرجان­نىڭ بۇل سالاداعى جەتىستىگىنە كادىمگىدەي قۋانىپ قالدىق. ال ونىڭ پاندەميا كەزىندە قازاق­ستاندا العاش بولىپ ونلاين-جاتتىعۋ ۇيىمداستىرعانىن ەستىگەندە «بارەكەلدى!» اۋزى­مىز­دان قالاي شىققانىن اڭدا­ماي قالدىق.

باۋىرجان رىسبەك – سەمەي­دىڭ تۋماسى. شىمكەنتتە ءوسىپ, ەر جەتكەن. بوكستان حالىق­ارا­لىق دارەجەدەگى سپورت شەبەرى. 12 جىل قۇقىق قورعاۋ ورگاندارىندا ەڭبەك ەتكەن. پرەزيدەنت اكىمشىلىگىندە قىزمەت اتقا­رىپ­تى. 2014 جىلى سپورت سا­لا­سىنا اۋىسىپ, شەگەگە ىل­­گەن قولعابىن 13 جىلدىق ۇزى­­لىس­تەن كەيىن قايتا كيىپ, جات­تىعۋعا كىرىسكەن. كەزىندە ۇلت­تىق قۇرامانىڭ ەكىنشى, ءۇشىن­شى ءنومىرلى جىگىتتەرىمەن بىر­گە جاتتىققان باۋىرجان ءۇشىن سپورتتىق بابىنا ورالۋ اسا قيىنعا سوقپاپتى.

– ءبىر جىل جاتتىعىپ, قال­پىما كەلدىم. قايتادان ۇلت­تىق قۇراماعا ءىلىندىم. وليم­پيادا ويىندارىنا قا­تىسقىم كەلدى. بىراق, قۇرامانىڭ سول كەزدەگى باس باپكەرى مىر­زا­عالي ايتجانوۆ وڭاشا ءبىر وتىر­عاندا جولدى جاستارعا بەرۋ كەرەكتىگىن ەسكەرتتى. ۇلكەننىڭ سوزىنە توقتاعان ەلمىز عوي, قار­سىلىق بىلدىرمەدىم. ىلە كاسىپ­قوي بوكسقا اۋىسۋ تۋرالى دا ۇسىنىس ءتۇستى. الايدا قۇ­قىق قورعاۋ ورگاندارىندا قىز­مەت اتقارعاندىقتان, قۇپيا مالى­مەتتەردىڭ يەسى رەتىندە بەس جىل شەتەلگە شىعۋىما بول­ماي­­تىن ەدى. ءسويتىپ بوكستى دو­­عا­رىپ, سپورتشىلاردى في­زي­كا­­لىق تۇرعىدان شىنىق­تى­رۋ­­دى قولعا الدىم, – دەيدى ول.

بۇگىندە قىرىقتى القىم­داپ قالعان باۋىرجان فيتنەس-ترەنەر بولىپ جۇمىس ىستەيدى. اتاپ وتكەنىمىزدەي, ريو وليمپياداسىندا مەرەيى ۇس­تەم بولعان بىرقاتار سپورت­شىنى شىنىقتىرعان. ءان­شى ءارى بوكسشى يبراگيم ەسكەن­دىردى شىنىقتىرعان دا وسى باپكەر. قازىر كاسىپ­قوي بوكس­تاعى قوس وعلان ما­ديار اشكەەۆ پەن ايدوس ەر­بو­سىن­ ۇلىنىڭ فيزيكالىق دا­يىن­دىعىمەن اينالىسىپ ءجۇر. سپورتتىق بابىندا ءجۇرۋدى ءجون كورەتىن وليمپيادا چەمپيونى باقتيار ارتاەۆتى دا شىنىقتىرادى. بۇدان بولەك, Instagram جەلىسىنىڭ تىكەلەي ەفيرى ارقىلى ونلاين-جاتتىعۋ ۇيىمداستىرادى.

– قازاقستاندا كارانتين رەجىمى ەنگىزىلگەن ساتتە-اق Instagram ارقىلى ونلاين-جات­­تىعۋ وتكىزۋگە كوشتىم. ال­عاش­قى اپتادا 7-8 ادام كىرىپ, قاداعالاپ وتىردى. ودان كە­يىنگى اپتادا تۇراقتى كو­رەر­مەن­دەردىڭ سانى 25-كە جەت­تى. كەيىن ءبىر ساتتە 50 ادام­دى جات­تىقتىراتىن بولدىم. ناۋرىز, ءساۋىر, مامىر ايلارىندا وسىلاي جۇمىس ىستەدىك. كەيىن اشىق الاڭداردا جاتتىعۋ جۇرگىزۋگە رۇقسات بەرىلدى. مەنەن كەيىن ونلاين-جاتتىعۋعا كوشكەندەر كوپ بولدى, – دەيدى ول.

ومىرىمىزگە كوپ وزگەرىس ەنگىزگەن پاندەميا فيتنەس-يندۋستريانى دا تىعىرىققا تىرەگەنى راس. سەبەبى, ءبىرىنشى كەزەكتە فيتنەس-كلۋبتاردىڭ قىزمەتىنە تىيىم سالىندى. سول قيىندىقتان جول تاپقان كاسىبي مامانداردىڭ كوشىن ءدال وسى باۋىرجان باستاپ تۇر.

– بىزدەگى فيتنەس-يندۋس­تريا باسەكەگە قابىلەتسىز. قىز­مەتىن قاداعالايتىن, جۇمىسىن رەتتەيتىن ورگان جوق. اركىم 25 مىڭ تەڭگە تولەپ, فيتنەس-ترەنەردىڭ سەرتيفيكاتىن يە­لەنىپ ءجۇر. ولار ۇيرەتىپ جا­رىت­پايدى. ال كاسىبي مامان توتەن­شە جاعدايدىڭ ءوزىن تىڭ مۇمكىندىك دەپ قاراستىرۋى كەرەك. ءبىزدىڭ سالادا تەوريانى جاقسى مەڭگەرگەندەر كوپ. الايدا ولار پراكتيكاعا كەل­گەندە پىشىراپ قالادى. قازىر جاڭا تەحنولوگيانىڭ زاما­نى. بىراق سونىڭ مۇمكىن­دىك­تەرىن ءالى تولىق پايدالانا الماي كەلەمىز. فيتنەس-ين­دۋستريانىڭ پاندەميا كەزىندە توقىراعانى دا سوندىقتان, – دەيدى كەيىپكەرىمىز.

شىنىندا دا, الەمنىڭ دا­­مى­عان ەلدەرىندەگى فيت­نەس-ين­دۋستريا امالىن تا­ۋىپ, جاع­دايعا قاراي بەيىم­دەلە الدى. سونىڭ ءبىر دالەلى – ون­­لاين-جاتتىعۋدىڭ قانات جايۋى. سوندىقتان ەرتەڭ قار كور­­مەي­تىن ەلدەر فيتنەس-ين­دۋست­­ريانى «دالاعا كوشىرىپ» جات­سا, تاڭدانۋدىڭ قاجەتى شا­ما­­لى. ونىڭ ۇستىنە پاندە­ميا­­نىڭ ءازىر باسىلا قوياتىن ءتۇرى جوق.

– وقىپ, ىزدەنۋدىڭ ناتي­جەسىندە ونلاين-جاتتىعۋ بو­يىنشا اۆتورلىق ادىستەمەمدى ازىرلەدىم. وندا ەرلەرگە, ايەل­دەرگە, سپورتشىلارعا جەكە-جەكە باعدارلامالار قاراس­تى­رىلعان. بۇدان بولەك, دە­نە تۇرقىنا بايلانىستى ءار ادامعا لايىقتالعان باع­دار­لامالارىم بار. ماسەلەن, بويشاڭ جانعا الاسا بويلى ادامنىڭ جاتتىعۋىن جاساتۋعا بولمايدى. قىسقاسى, ءار ادامعا جەكە-جەكە نازار اۋدارۋ كەرەك. وكىنىشكە قاراي, فيتنەس-ترەنەرلەر وسى جاعىنا كەلگەندە اقساپ جاتادى. ولار بارلىعىن ءبىر ادىستەمەمەن شىنىقتىرا بەرەدى, – دەيدى باۋىرجان.

ونىڭ پىكىرىنشە, ونلاين-جاتتىعۋ اركەز بەتمونشاعى ءۇزىلىپ تۇراتىن ءبىزدىڭ ۇلتتىڭ مەنتاليتەتىنە سايكەس كەلەدى.

– قازاقتاردىڭ كوبى زالدا جاتتىعۋعا قىسىلادى. كوپ جاعدايدا دەنە بىتىمىنەن ىڭ­عاي­سىزدانادى. ال ون­لاين-جاتتىعۋدى ەشكىمنىڭ كو­زىنە تۇسپەي, ۇيدە دە جاساي بەرۋگە بولادى. بۇل – ءبىر. ەكىن­شىدەن, قازىر نامازعا جى­عىل­عان جاستار كوپ. بىزدەگى فيتنەس-كلۋبتاردا ەرلەر مەن ايەلدەر ارالاسىپ جۇرە بەرەدى. ولار مۇنداي جەرگە بارمايدى, البەتتە. سوندىقتان ونلاين-جاتتىعۋ ناماز وقيتىن قىز-جىگىت­تەر ءۇشىن دە تاماشا مۇم­كىندىك, – دەيدى ول.

باۋىرجاننىڭ بوديبيلدينگكە قاتىستى كوزقاراسىن بىلگىمىز كەلدى.

– اينالىسىپ جۇرگەندەر رەنجىمەسىن, بىراق بوديبيلدينگ – جالقاۋلاردىڭ سپورتى. مۇنىڭ جانىندا ەمدىك دەنە شىنىقتىرۋ الدەقايدا پايدالى. راس, بوديبيلدينگ تە سپورتتىڭ وزىنشە ءبىر ءتۇرى. بىراق, ول ادامدى مۇگەدەك ەتىپ تىنادى. سەبەبى, ونىمەن اي­نالىسقاندا ادامنىڭ قارىم-قابىلەتى, دەنە ءبىتىمى ەسكەرىل­مەيدى. بۇلشىق ەتتى ەسەپسىز وسىرە بەرگەننەن اعزاداعى مايدىڭ, ءسىڭىردىڭ قىزمەتى ناشار­لايدى. تامىرلار قىسى­لىپ قالادى. ەگەر بوديبيلينگتەر مىقتى بولسا, نەلىكتەن كەرمەگە ۇزاق تارتىلا المايدى؟ ۇزاق قاشىققا جۇگىرمەيتىنى دە سوندىقتان. جالپى, ترەنا­جەردەگى جاتتىعۋعا اسا ءۇيىر بولماۋ كەرەك. ادام بۇل جەردە روبوت سەكىلدى وزگەلەردىڭ جاسا­عانىن عانا قايتالايدى. اڭعار­عانىم, كوپ ادام دالادا وزدى­گىنەن جاتتىعۋ جاساۋدى بىل­مەيدى ەكەن. جارناماسىنا قىزى­عىپ فيتنەس-كلۋبتارعا جۇگىرە­تىنىمىز دە سودان-اۋ, – دەيدى ب.رىسبەك.

ول قازاقستان ۇلتتىق قۇرا­ماسىنداعى بوكسشىلاردى دايىنداۋعا ءازىر ەكەنىن ايتتى. الايدا ونداعىلار باۋىر­جاننىڭ قىزمەتىنە مۇقتاج ەمەس سەكىلدى.

– ءبىزدىڭ بوكسشىلاردىڭ في­­زي­كالىق دايىندىعىن كە­ڭەس­تىك كوزقاراسپەن كەلە جات­­قان اعالار قاداعالاپ وتىر. سوڭعى جىلدارى وزبەكتەردەن ۇتىلىپ, ۇندىستەردەن جەڭىلۋى­مىزدىڭ ءبىر سەبەبى وسىندا جاتىر. سپورتشىلاردى دايىنداۋ جۇيەسىن قايتا قاراۋ كەرەك. مىسال كەلتىرەيىن. جانىبەك ءالىمحان ۇلى دەگەن جارىق جۇلدىزىمىز شىقتى. الايدا ءبىزدىڭ دەنە دايىندىعىنا جاۋاپتى ترەنەرلەر 20 جاسقا تولار-تولماس كەزەڭدە جانىبەكتىڭ بويىنداعى بار ءسولىن, كۇشىن سىعىپ الدى. سالدارىنان بوكس­شى قۇلدىرادى. اقىرى ول كا­سىپ­قوي بوكسقا اۋىسىپ كەتتى جانە دۇرىس قادام جاسا­دى دەپ وي­لايمىن. ءار سپورت­شىعا جە­كە نازار اۋدارۋ كەرەك. بىزدە ولاي ەمەس. سەرىك ساپيەۆ چەمپيون اتانسا, بار­لىعىن سەرىك سەكىل­دى جات­تىقتىرۋعا كوشەمىز. اركىمنىڭ قابىلەتى ءارتۇرلى ەكە­نىن ەستەن شىعارىپ الامىز. ال بوك­سشىلار پسيحولوگيالىق تۇر­عىدان وتە نازىك كەلەدى, – دەيدى كەيىپكەرىمىز.

شىنىقتىرۋدىڭ شەبەرى باۋىر­جاننىڭ مىندەتى – حا­لىق­تى دۇرىس جاتتىعۋعا ۇي­رەتۋ. جالقاۋلىقتان ارىلتۋ دا – ارمانى.