پرەمەر-مينيستر اسقار ءماميننىڭ توراعالىعىمەن وتكەن قر ۇكىمەتىنىڭ سەلەكتورلىق وتىرىسىندا جىلىتۋ ماۋسىمىنا دايىندىق تۋرالى ماسەلە قارالدى. قابىلدانعان شارالار تۋرالى ەنەرگەتيكا ءمينيسترى ن. نوعاەۆ پەن يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ باياندادى, دەپ حابارلايدى Egemen.kz پرەمەر-ءمينيستردىڭ ءباسپاسوز قىزمەتىنە سىلتەمە جاساپ.
«ەلىمىزدىڭ ءبىرتۇتاس ەلەكتر ەنەرگەتيكالىق جۇيەسىنىڭ تۇراقتى جۇمىسىن قامتاماسىز ەتۋ, تۇتىنۋشىلاردى ەلەكتر جانە جىلۋ ەنەرگياسىمەن سەنىمدى جابدىقتاۋ ماقساتىندا ەنەرگەتيكالىق كاسىپورىنداردىڭ كۇزگى-قىسقى كەزەڭدەگى جۇمىسقا دايىندىعى جالعاسۋدا. جۇيەلىك وپەراتور بەكىتكەن كەستەگە سايكەس ەلەكتر ستانتسيالارىنداعى 5 ەنەرگوبلوك, 31 قازاندىق, 22 تۋربينا جوندەلدى. ال 3 ەنەرگوبلوك, 28 قازاندىق پەن 22 تۋربينانى جوندەۋ جۇمىستارى ءالى دە جۇرگىزىلۋدە», — دەدى ن. نوعاەۆ.
ءمينيستردىڭ ايتۋىنشا, اتالعان ەلەكتر ستانتسيالارىنداعى جوندەۋ جۇمىستارى بيىلعى جىلىتۋ ماۋسىمىنىڭ ۋاقتىلى باستالۋىنا اسەر ەتپەيدى. جوندەۋ جۇمىستارىن كەشىكتىرۋ, نەگىزىنەن, توتەنشە جاعداي مەن كارانتين كەزەڭىندە شەتەلدەن قوسالقى بولشەكتەردى جەتكىزۋ كىدىرىسىمەن جانە جوندەۋ جۇرگىزەتىن مامانداردىڭ باسقا ەلدەردەن قازاقستان رەسپۋبليكاسىنىڭ اۋماعىنا كەلۋىنە قويىلعان شەكتەۋلەرمەن بايلانىستى. ەلەكتر جەلىلەرى بويىنشا جالپى ۇزىندىعى 25 828 كم ەلەكتر بەرۋ جەلىسىن, سونداي-اق 439 بىرلىك جوعارى ۆولتتى شاعىن ستانتسيانى جوندەۋ جوسپارلانعان.
بۇگىنگى تاڭدا 25 152 كم ەلەكتر بەرۋ جەلىسى مەن 428 شاعىن ستانتسيا جوندەلدى, بۇل جىلدىق جوسپاردىڭ 97% قۇرايدى. ەلەكتر جەلىلەرىن جوندەۋ بەكىتىلگەن كەستەلەرگە سايكەس اياقتالۋى جوسپارلانۋدا. جەرگىلىكتى اتقارۋشى ورگانداردىڭ اقپاراتى بويىنشا, 457 ورتالىقتاندىرىلعان جىلۋمەن جابدىقتاۋ قازاندىقتارىن جىلىتۋ ماۋسىمىنا دايىنداۋ ءۇشىن 1149 قازاننىڭ 1132-ءسى جوندەلدى. بۇل جىلدىق جوسپاردىڭ 98,5% قۇرايدى.
ەلەكتر ستانتسيالارىندا قاجەتتى وتىن جيناقتاۋ جالعاسۋدا. ەنەرگيا كوزدەرى قويمالارىنداعى كومىر قورى 4,5 ملن توننانى قۇرايدى, بۇل وتكەن جىلعى دەڭگەيدەن 7% ارتىق, ال مازۋت – 104 مىڭ توننا, بۇل وتكەن جىلعى دەڭگەيدەن 3% ارتىق. ورتالىقتاندىرىلعان جىلۋمەن جابدىقتاۋ جۇيەسىندەگى قازاندىقتاردىڭ وتىن قويمالارىندا 1 ملن 41 مىڭ توننا كومىر, 35,5 مىڭ توننا مازۋت جيناقتالعان, بۇل بەكىتىلگەن نورمالارعا سايكەس كەلەدى.
بيىلعى جىلدىڭ قىركۇيەگىندە ەنەرگەتيكا مينيسترلىگى جەرگىلىكتى اتقارۋشى ورگانداردىڭ وتىنىمدەرىنە سايكەس 2020-2021 جىلعى كۇزگى-قىسقى كەزەڭدە الەۋمەتتىك-وندىرىستىك وبەكتىلەر مەن مەكەمەلەرگە 237 مىڭ توننا كولەمىندە مازۋت جەتكىزۋ كەستەسىن قابىلدادى. بۇل رەتتە جىلىتۋ كەزەڭىنە ۇسىنىلاتىن «الەۋمەتتىك مازۋت» باعاسى ءموز زاۋىتتارىندا 1 تونناسى ۇشىن قوسىمشا قۇن سالىعىن قوسا العاندا 58 مىڭ تەڭگە دەڭگەيىندە بولادى.
«بۇگىنگى كۇن تارتىبىندەگى ماڭىزدى ماسەلە – ەنەرگيا ءوندىرۋشى كاسىپورىنداردىڭ وتىن ءۇشىن كرەديتورلىق بەرەشەگى. اعىمداعى جىلعى 28 قىركۇيەگى جاعدايىندا ەنەرگيا ءوندىرۋشى ۇيىمداردىڭ «قازترانسگاز-ايماق» اق الدىنداعى بەرەشەگى 4 ملرد 600 ملن تەڭگەنى قۇرادى. سونداي-اق, ەنەرگيا ءوندىرۋشى ۇيىمداردىڭ «بوگاتىر-كومىر» سەرىكتەستىگى الدىندا جالپى سوماسى 3 ملرد 562 ملن تەڭگە بەرەشەگى بار», — دەدى ن. نوعاەۆ.
جىلىتۋ ماۋسىمىنا دايىندىققا جۇرگىزىلگەن تالداۋ اعىمداعى جىلىتۋ ماۋسىمىن وتكىزۋگە ەرەكشە نازار اۋداراتىن بىرقاتار وڭىرلەردى انىقتاپ وتىر. ماسەلەن, «باتىسەنەرگو» وڭىرلىك ەلەكتر جەلىلىك كومپانياسىنىڭ ەلەكتر جەلىلەرىنىڭ تەحنيكالىق جاعدايىنا ەرەكشە كوڭىل ءبولۋ قاجەت. كاسىپورىندى قارجىلاندىرۋ پروبلەمالارى باتىس قازاقستان وبلىسىنىڭ ەلەكتر جەلىلەرىن تولىق كولەمدى جوندەۋگە, جاڭعىرتۋعا جانە رەكونسترۋكتسيالاۋعا مۇمكىندىك بەرمەيدى. جەلىلەر توزعان. مينيستر ەلەكتر جەلىلەرىن سەنىمدى باسقارۋعا العان كومپانيا ءوز مىندەتتەمەلەرىن ءىس جۇزىندە قاجەتتى دەڭگەيدە ورىنداماي وتىرعانىن جەتكىزدى. ەنەرگەتيكا مينيسترلىگىنە تۇرعىنداردان قاراعاندى وبلىسى شەت اۋدانىنىڭ تۇتىنۋشىلارىنا ەلەكتر ەنەرگياسىن بەرۋدى جانە تاراتۋدى جۇزەگە اسىراتىن «شەتەنەرگو» سەرىكتەستىگى قىزمەتىنە قاتىستى كوپتەگەن شاعىمدار كەلىپ تۇسۋدە.
«شەتەنەرگو» سەرىكتەستىگىن تەكسەرۋ ناتيجەلەرى بويىنشا, ەلەكتر ەنەرگەتيكاسى سالاسىنداعى نورماتيۆتىك قۇقىقتىق اكتىلەردىڭ تالاپتارىن ەلەكتر جەلىلەرىن پايدالانۋ جانە ولاردىڭ تەحنيكالىق جاعدايى بولىگىندە بۇزۋشىلىق انىقتالدى. بۇعان قوسا, سەرىكتەستىك ەنەرگيا بەرۋشى ۇيىمدارعا قويىلاتىن زاڭناما تالاپتارىنا سايكەس كەلمەيدى. وسىعان بايلانىستى, تەكسەرىس ماتەريالدارى قۇزىرەتى بويىنشا شارالار قابىلداۋ ءۇشىن ۇلتتىق ەكونوميكا مينيسترلىگىنىڭ تابيعي مونوپوليالاردى رەتتەۋ كوميتەتىنىڭ قاراعاندى وبلىسى بويىنشا باسقارماسىنا جانە قاراعاندى وبلىسىنىڭ پروكۋراتۋراسىنا جولداندى.
سوڭعى بىرنەشە جىل قاتارىنان قاناعاتتانارلىقسىز تەحنيكالىق جاعدايىنا بايلانىستى «ارسەلورميتتال تەمىرتاۋ» اق-نىڭ 2-ءشى جىلۋ ەلەكتر ورتالىعىنىڭ قازاندىقتارى ءجيى اجىراتىلىپ وتىردى, سونىڭ سالدارىنان تەمىرتاۋ قالاسىنىڭ تۇرعىندارىن جىلۋمەن جابدىقتاۋ كەستەسى بۇزىلدى. وتكەن جىلىتۋ ماۋسىمىندا وسى 2-ءشى جىلۋ ەلەكتر ورتالىعىندا تەمپەراتۋرالىق رەجيمدى ساقتاماۋ بويىنشا 17 جاعداي تىركەلدى.
2020-2021 جج. جىلىتۋ ماۋسىمىندا قالانىڭ جىلۋمەن جابدىقتاۋ جۇيەسى جۇمىسىنىڭ رەجيمدىك كارتاسىنا تالداۋ جۇرگىزىلدى. تالداۋ قورىتىندىسى جىلۋ ەنەرگياسىنىڭ تاپشىلىعىن جابۋ ءۇشىن 2020 جىلعى جەلتوقساندا پايدالانۋعا بەرۋ جوسپارلانعان №8 قازاندىق اگرەگاتى جانە 2-ءشى جىلۋ ەلەكتر ورتالىعىن ۋاقىتىلى پايدالانۋعا بەرۋ قاجەت ەكەنىن كورسەتتى. بۇل اگرەگاتتار ۋاقتىلى پايدالانۋعا بەرىلمەگەن جاعدايدا, جىلۋ ەنەرگياسىنىڭ تاپشىلىعى بولۋى ىقتيمال. وسىعان بايلانىستى, نۇر-سۇلتان قالاسىنىڭ اكىمدىگىنە تۇتىنۋشىلاردى ەنەرگيامەن سەنىمدى جانە ۇزدىكسىز جابدىقتاۋدى قامتاماسىز ەتۋ ماقساتىندا 1-ءشى جانە 2-ءشى جىلۋ ەلەكتر ورتالىقتارىنداعى 1-ءشى ىسكە قوسۋ كەشەندەرىن پايدالانۋعا بەرۋدى جەدەلدەتۋ قاجەت.
تۇركىستان وبلىسىندا «كەنتاۋسەرۆيس» كاسىپورنى كەنتاۋ جىلۋ ەلەكتر ورتالىعىنىڭ جوندەۋ جۇمىستارىن قارجىلاندىرۋعا كوڭىل ءبولۋ قاجەت. ورتالىقتى جوندەۋ جۇمىستارىنا جالپى 1 ملرد 844 ملن تەڭگە جوسپارلانعان بولاتىن, ونىڭ ىشىندە تەك 479 ملن تەڭگە ءبولىندى, بۇل جوندەۋگە تالاپ ەتىلەتىن قارجى قاراجاتىنىڭ 26%-ىن عانا قۇرايدى. اعىمداعى جىلىتۋ ماۋسىمى نۇر-سۇلتان قالاسىندا 22 قىركۇيەكتە, اقمولا, باتىس قازاقستان وبلىستارىندا 21 قىركۇيەكتە, پاۆلوداردا 16 قىركۇيەكتە, سولتۇستىك قازاقستان وبلىسىندا 18 قىركۇيەكتە, شىعىس قازاقستان, قوستاناي وبلىستارىندا 25 قىركۇيەكتە جانە قاراعاندى وبلىسىندا 28 قىركۇيەكتە باستالدى. اعىمداعى جىلدىڭ 1 قازانىنان باستاپ اقتوبە جانە اتىراۋ وبلىستارىندا جىلىتۋ ماۋسىمىن باستاۋ جوسپارلانىپ وتىر.
ەلىمىزدىڭ وڭتۇستىك وڭىرلەرىندە جىلىتۋ ماۋسىمىن 15 قازاننان باستاۋ جوسپارلانۋدا. ن. نوعاەۆ ۆەدومستۆوارالىق كوميسسيانىڭ شەشىمىنە سايكەس ەنەرگەتيكا مينيسترلىگى جەرگىلىكتى اتقارۋشى ورگاندارعا كوروناۆيرۋس ينفەكتسياسى جاعدايىنا بايلانىستى جىلىتۋ ماۋسىمىن الدىن الا باستاۋ تۋرالى ۇسىنىس ەنگىزگەنىن ايتتى. بيىلعى 28 قىركۇيەكتەگى جاعداي بويىنشا, كۇزگى-قىسقى كەزەڭدەگى جۇمىسقا ازىرلىك پاسپورتتارىن الۋعا مىندەتتى 293 ەنەرگەتيكالىق كاسىپورىننىڭ 136-سىنا ماتەريال كەلىپ ءتۇستى. ازىرلىك پاسپورتىن قاراۋ جونىندەگى كوميسسيا جۇمىسىنىڭ ناتيجەلەرى بويىنشا 67 ەنەرگيا كاسىپورنى ازىرلىك پاسپورتىن الدى, 69 ماتەريال قارالۋدا. بۇگىن ازىرلىك پاسپورتتارىن الۋعا ارنالعان وتىنىشتەردى قابىلداۋدىڭ سوڭعى كۇنى.
ءمينيستردىڭ ايتۋىنشا, ەنەرگيا كاسىپورىندارىنىڭ ازىرلىك پاسپورتتارىن الۋعا ارنالعان ماتەريالداردى ۇسىنباۋىنىڭ نەگىزگى سەبەپتەرىنىڭ ءبىرى – ول ءۇشىن سالىناتىن اكىمشىلىك ايىپپۇل مولشەرىنىڭ تومەندىگى.
ەنەرگەتيكا كاسىپورىندارى كۇزگى-قىسقى كەزەڭدەگى جۇمىسقا دايىندىق شارالارىنا شىعىندالعانشا, ايىپپۇل تولەگەن جەڭىل دە جانە ىڭعايلى دەپ سانايدى. ن. نوعاەۆتىڭ ايتۋىنشا, ماسەلەن, ەنەرگيا ءوندىرۋشى, ەنەرگيا بەرۋشى ۇيىمداردىڭ كۇزگى-قىسقى جاعدايلاردا جۇمىس ىستەۋگە ازىرلىك پاسپورتىن الۋ مەرزىمىن بۇزۋى – شاعىن كاسىپكەرلىك سۋبەكتىلەرىنە – ەلۋ, ورتا كاسىپكەرلىك سۋبەكتىلەرىنە – ءبىر ءجۇز ەلۋ, ءىرى كاسىپكەرلىك سۋبەكتىلەرىنە ءۇش ءجۇز ايلىق ەسەپتىك كورسەتكىش مولشەرىندە ايىپپۇل سالۋعا اكەپ سوعادى. وسىعان بايلانىستى ەنەرگەتيكالىق كاسىپورىنداردىڭ كۇزگى-قىسقى كەزەڭدەگى جۇمىسقا ازىرلىك پاسپورتتارىن الماعانى ءۇشىن اكىمشىلىك جاۋاپكەرشىلىكتى قاتاڭداتۋ ماسەلەسىن پىسىقتاۋ قاجەت.
ءمينيستردىڭ ايتۋىنشا, جالپى العاندا, 2020-2021 جج. كۇزگى-قىسقى كەزەڭنەن ءساتتى ءوتۋ ءۇشىن:
ەلەكتر ستانتسيالارىنداعى, ەلەكتر جەلىلەرىندەگى بارلىق جوندەۋ جۇمىستارىن تولىق كولەمدە ورىنداۋ;
وتىن جەتكىزۋشىلەر الدىنداعى بەرەشەكتى جويۋدى قامتاماسىز ەتۋ;
كوممۋنالدىق قىزمەتتەردى تۇتىنۋشىلاردىڭ جەتكىزۋشىلەر الدىنداعى دەبيتورلىق بەرەشەگىن جويۋ بويىنشا شارالار قابىلداۋ;
ەلدى مەكەندەردىڭ ءبىلىم بەرۋ, دەنساۋلىق ساقتاۋ, تىرشىلىكتى قامتاماسىز ەتۋ وبەكتىلەرىن, الەۋمەتتىك جانە مادەني وبەكتىلەرىن جىلۋمەن جابدىقتاۋ جۇيەسىنە ۋاقىتىلى قوسۋدى قامتاماسىز ەتۋ;
كوممۋنالدىق وبەكتىلەردى جانە دەنساۋلىق ساقتاۋ وبەكتىلەرىن دەربەس رەزەرۆتىك ەلەكترمەن جابدىقتاۋ كوزدەرىمەن قامتاماسىز ەتۋ;
جىلىتۋ كەزەڭىندە ەلەكتر ستانتسيالارىنا, قازاندىقتارعا جانە تۇرعىنداردىڭ قاجەتتىلىكتەرىنە كومىر مەن مازۋتتىڭ تۇراقتى جەتكىزىلىمىن قامتاماسىز ەتۋ قاجەت.
تۇرعىن ءۇي-كوممۋنالدىق شارۋاشىلىق نىساندارىنىڭ جىلۋ بەرۋ ماۋسىمىنا دايىندىعى تۋرالى يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ باياندادى. ءمينيستردىڭ ايتۋىنشا, الداعى جىلۋ بەرۋ ماۋسىمىنا ساپالى جانە ۋاقىتىلى دايىندالۋ ماقساتىندا مينيسترلىك جەرگىلىكتى اتقارۋشى ورگاندارمەن 2020-2021 جىلدارداعى جۇمىس جوسپارىن بەكىتتى, بەكىتىلگەن جوسپارعا سايكەس وبلىستاردىڭ, نۇر-سۇلتان, الماتى جانە شىمكەنت قالالارىنىڭ اكىمدىكتەرىنە: 2020 جىلعى 1 قىركۇيەككە دەيىن ءبىلىم بەرۋ وبەكتىلەرىنىڭ 100% دايىندىعىن قامتاماسىز ەتۋ, 2020 جىلعى 15 قازانعا دەيىن بارلىق كوممۋنالدىق شارۋاشىلىق, الەۋمەتتىك سالا وبەكتىلەرىن, تۇرعىن ۇيلەردى دايىنداۋدى اياقتاۋ جانە بارلىق اۆتونومدى جىلۋ كوزدەرىن نورماتيۆتىك وتىن قورىمەن قامتاماسىز ەتۋ مىندەتى قويىلدى.
بۇگىنگى كۇنى 11 158 ءبىلىم بەرۋ وبەكتىسى جىلۋ بەرۋ ماۋسىمىنا دايىن, بۇل 99,6%. ءبىلىم بەرۋ وبەكتىلەرى بويىنشا باتىس قازاقستان وبلىسىندا (95,2 %) دايىندىق قارقىنى تومەن ەكەنى بايقالادى. جىلۋ بەرۋ ماۋسىمىنا دەنساۋلىق ساقتاۋ وبەكتىلەرىنىڭ 99,2% دايىن, بۇل 5 963 وبەكت. 2 وڭىردە وبەكتىلەردىڭ جىلىتۋ ماۋسىمىنا دايىندىعى تومەن ەكەنى بايقالادى: باتىس قازاقستان وبلىسىندا (90,7 %) جانە شىمكەنت قالاسىندا (93,6 %). جوندەۋ جوسپارلانعان 47 653 تۇرعىن ءۇيدىڭ 46 561 نەمەسە 97 % دايىندالدى. 3 وڭىردە وبەكتىلەرىنىڭ دايىندىق قارقىنى تومەن ەكەنى بايقالادى: شىعىس قازاقستان (94,3 %), باتىس قازاقستان (61,7 %) وبلىستارىندا جانە شىمكەنت قالاسىندا (92,1%). جەرگىلىكتى اتقارۋشى ورگاندار 10 662 قازاندىقتى دايىندادى, بۇل 98,6 %. قالعان 143 اۆتونومدى قازاندىق بويىنشا دايىندىق جۇمىستارى جۇرگىزىلىپ جاتىر.
باتىس قازاقستان وبلىسىندا جۇمىس قارقىنى تومەن ەكەنى بايقالادى. جىلۋ جەلىلەرىن دايىنداۋعا كەلسەك, اعىمداعى كەزەڭگە جوسپارلانعان 5038 كم جىلۋ جەلىلەرىنىڭ 5 024 كم نەمەسە 99,1 % جوندەلدى. باتىس قازاقستان وبلىسىنىڭ (73,1 %) دايىندىعى تومەن ەكەنى انىقتالدى.
ب. اتامقۇلوۆ اتاپ وتكەندەي, اكىمدىكتەر ينجەنەرلىك ينفراقۇرىلىمدى, الەۋمەتتىك سالا وبەكتىلەرىن جانە تۇرعىن ۇيلەردى جىلىتۋ ماۋسىمىنا ۋاقىتىلى دايىنداۋدى كۇشەيتۋى قاجەت, اسىرەسە بۇل دەنساۋلىق ساقتاۋ جانە تۇرعىن ءۇي وبەكتىلەرىنە قاتىستى. سۋمەن جابدىقتاۋ جانە سۋ بۇرۋ جەلىلەرىن دايىنداۋعا كەلسەك, جوندەۋگە جوسپارلانعان 14 213 كم سۋمەن جابدىقتاۋ جانە سۋ بۇرۋ ينفراقۇرىلىمىنىڭ 14 089 كم نەمەسە 99,1% جوندەلدى. تۇركىستان جانە باتىس قازاقستان وبلىستارىندا جۇمىس قارقىنى تومەن. اۆتونومدىق قازاندىقتار ءۇشىن الداعى جىلىتۋ ماۋسىمىنا وتىن قاجەتتىلىگى 1 237 مىڭ توننا كومىر مەن 214 مىڭ توننا مازۋتتى قۇرايدى. بۇگىنگى كۇنى 1 139 مىڭ توننا كومىر (92%) جانە 144 مىڭ توننا مازۋت (67 %) دايىندالدى.
قازاندىقتار ءۇشىن مازۋتتى ساتىپ الۋدىڭ قارقىنى اقمولا – 2,3%, جامبىل – 7,8 % وبلىستارىندا تومەن ەكەنى بايقالادى. اكىمدىكتەر اۆتونومدى قازاندىقتار ءۇشىن وتىندى ۋاقىتىلى ساتىپ الۋ جانە اكەلۋ جونىندە شۇعىل شارالار قابىلداۋى قاجەت. كومىر ءوندىرۋ جانە جونەلتۋ تۋرالى, مينيستر كومىر ءوندىرۋشى كومپانيالار 2020 جىلدىڭ 8 ايىندا 69 ملن توننا كومىر ءوندىردى (كومىر كونتسەنتراتىن ەسەپتەمەگەندە), بۇل وتكەن جىلدىڭ ءتيىستى كەزەڭىنە سايكەس كەلەدى دەدى. كومىردى ەكسپورتتاۋ 18,5 ملن توننانى قۇرادى.
2020-2021 جىلدارداعى كەزەڭدە كوممۋنالدىق-تۇرمىستىق مۇقتاجدىقتار مەن حالىققا ارنالعان كومىر تۇتىنۋ كولەمى شامامەن 10 ملن توننانى قۇرادى, ونىڭ ىشىندە كوممۋنالدىق-تۇرمىستىق سەكتورعا 2,8 ملن توننا, تۇرعىندارعا – 7,2 ملن توننا بولادى. 2020 جىلعى 28 قىركۇيەكتەگى جاعداي بويىنشا جالپى جوسپارعا سايكەس كومىر قورىمەن كوممۋنالدىق-تۇرمىستىق سەكتور 76%, تۇرعىندار 65% قامتاماسىز ەتىلدى.
«بارلىق ايماقتاردا كومىر قورى دايىندالعان جانە تاپشىلىق جوق. وڭىرلەر كومىردى كەستەگە سايكەس جەتكىزىپ جاتىر», — دەدى ب.اتامقۇلوۆ.
جىلۋ بەرۋ ماۋسىمىنا دايىندىق باستالعاننان باستاپ 2020 جىلدىڭ 1 مامىرىنان وسى كۇنگە دەيىن تەمىرجول كولىگىمەن 22 ملن توننا كومىر تاسىمالداندى, بۇل 2019 جىلدىڭ ءتيىستى كەزەڭىندەگى كورسەتكىشتەن 0,4 %-عا ارتىق. سونداي-اق مينيستر كوممۋنالدىق قىزمەت بويىنشا بەرەشەك ءوسىپ كەتكەنىنە كوڭىل اۋدارۋ قاجەت ەكەنىن اتاپ ءوتتى. بۇگىنگى كۇنى كوممۋنالدىق قىزمەتتەر ءۇشىن تۇتىنۋشىلاردىڭ بەرەشەگى 17 ملرد تەڭگەنى قۇرادى. 2020 جىلدىڭ وزىندە دەبيتورلىق بەرەشەك 3,4 ملرد تەڭگەگە ارتتى. 5 ايماقتا ءوسىم بايقالادى. بۇل نۇر-سۇلتان قالاسى, الماتى قالاسى, شىمكەنت قالاسى, ماڭعىستاۋ وبلىسى جانە قىزىلوردا وبلىسى.
«بۇل مونوپوليستەردىڭ ساپالى جانە ۋاقىتىلى قىزمەت كورسەتۋىنە اسەر ەتەدى. جالپى جىلۋ بەرۋ ماۋسىمىنا دايىندىق بەكىتىلگەن جوسپارلارعا سايكەس جۇرگىزىلىپ جاتىر جانە تۇراقتى باقىلاۋدا», — دەدى ب. اتامقۇلوۆ.
مينيستر الداعى جىلۋ بەرۋ ماۋسىمىنا ۋاقىتىلى دايىندالۋ ماقساتىندا اكىمدىكتەر:
2020 جىلدىڭ 1 قازانىنا دەيىن بارلىق وبەكتىلەردى دايىنداۋدى تولىعىمەن اياقتاۋى, بارلىق اۆتونومدى جىلۋ كوزدەرىن نورماتيۆتىك وتىن قورىمەن قامتاماسىز ەتۋى;
كوممۋنالدىق قىزمەتتەر ءۇشىن دەبيتورلىق بەرەشەكتى ازايتۋى جانە اعىمداعى بەرەشەكتىڭ وسۋىنە جول بەرمەۋ بويىنشا جۇمىستى جانداندىرۋى جانە شارالار قابىلداۋى;
حالىقتىڭ اراسىندا الەۋمەتتىك شيەلەنىستى بولدىرماۋ ماقساتىندا وڭىرلەردە كومىر جەتكىزۋشىلەرمەن بەلسەندى ءوزارا ءىس-قيمىل جاساۋى;
تۇراقتى نەگىزدە كوممۋنالدىق-تۇرمىستىق مۇقتاجدىقتار ءۇشىن جانە حالىققا كومىر جەتكىزۋ بويىنشا مونيتورينگ جۇرگىزۋى قاجەت ەكەنىن ايتتى.