قىتايدىڭ «شەنچجوۋ-21» ميسسياسىنىڭ ەكيپاجى «تيانگۋن» وربيتالىق ستانتسياسىنداعى شاعىن جىلىجايدا وسىرىلگەن قىزاناقتىڭ پىسكەن ءونىمىن جينادى. بۇل تۋرالى سينحۋا اگەنتتىگى حابارلادى, دەپ جازادى Egemen.kz.
ەكسپەريمەنتكە ارنالعان اگرونوميالىق جۇيەنى قىتايدىڭ عارىشكەرلەردى دايارلاۋ ورتالىعىنىڭ زەرتتەۋ توبى ازىرلەگەن. قوندىرعىدا ارنايى جاسالعان جارىقديودتى شامدار قولدانىلادى. ولاردىڭ سپەكترى وسىمدىكتىڭ وسۋىنە قولايلى رەجيمگە بەيىمدەلگەن. مۇنداي شەشىم ەنەرگيا شىعىنىن ازايتىپ, جارىقتىڭ تيىمدىلىگىن ارتتىرۋعا مۇمكىندىك بەرەدى.
سۋارۋ تەتىگى دە وزگەشە. جۇيە وسىمدىكتىڭ تامىر ايماعىنا سۋدى ۇساق تۇمان تۇرىندە بۇركەيدى. بۇل ىلعالدى ءدال مولشەرلەۋگە, سۋدى ۇنەمدەۋگە جانە تامىردىڭ قاجەتتى ورتادا تۇراقتى قورەكتەنۋىنە جاعداي جاسايدى. وربيتادا سۋ مەن قورەكتىك ەرىتىندىنى باسقارۋ كۇردەلىرەك بولعاندىقتان, ءدال وسىنداي تاسىلدەر تاجىريبە جۇزىندە تەكسەرىلەدى.
عارىشتىق «جىلىجاي» ستانتسياعا 2025 جىلدىڭ شىلدەسىندە «تيانچجوۋ-9» جۇك كەمەسى ارقىلى جەتكىزىلگەن. جوبانىڭ باستى ماقساتى – ميكروگراۆيتاتسيا جاعدايىندا وسىمدىكتەردى ءتيىمدى ءوسىرۋدىڭ نەگىزگى تەحنولوگيالارىن سىناۋ. مۇنداي زەرتتەۋلەر ۇزاق مەرزىمدى عارىش ساپارلارى ءۇشىن ماڭىزدى, ويتكەنى وسىمدىك ءوسىرۋ ەكيپاجدى جاڭا ونىممەن قامتاماسىز ەتۋگە جانە جابىق ورتاداعى تىرشىلىككە قاجەتتى شەشىمدەردىڭ ءبىر بولىگىنە اينالۋى مۇمكىن.
ەكيپاج كۇن سايىن وسىمدىكتىڭ ءوسۋىن باقىلاپ, كورسەتكىشتەردى تىركەپ وتىرعان. عارىشكەر چجان لۋ وسىمدىك كۇتۋ جۇمىسى تىعىز كەستەدە پسيحولوگيالىق سەرپىن بەرەتىنىن, ال جاسىل جەلەككە قاراۋدىڭ ەرەكشە اسەرى بارىن ايتقان. سونداي-اق ونىڭ پىكىرىنشە, الداعى عىلىمي تاپسىرمالارعا كۇش-جىگەر جيناۋعا دا كومەكتەسەدى.
الداعى ۋاقىتتا «تيانگۋن» ستانتسياسىنىڭ «عارىش باعىندا» بيداي, ءسابىز جانە دارىلىك وسىمدىكتەردى اگرونومدىق ادىسپەن ءوسىرۋ جوسپارلانىپ وتىر. وسىلايشا, وربيتالىق ورتادا وسىرۋگە بولاتىن داقىل تۇرلەرىن كوبەيتۋ كوزدەلەدى.