اتىراۋ وبلىسىندا تاعى دا قامىس ءورتى تۇتاندى. ءورت وشاعى مۇنايلى شاھارعا تاياۋ ورنالاسقان العاباس اۋىلىنان 5 شاقىرىم قاشىقتا انىقتالدى, دەپ حابارلايدى Egemen.kz.
وبلىستىق توتەنشە جاعدايلار دەپارتامەنتىنىڭ سىرتقى كوممۋنيكاتسيالار جانە يميدجدىك جۇمىس توبىنىڭ دەرەگىنە سۇيەنسەك, 27 اقپاندا ءورت وشاعىنا مونيتورينگ جۇرگىزىلگەن.
«كەشكى ساعات 19:21-دە اتىراۋ قالاسىنان ەسكەنە كەن ورنىنا قاراي 50 شاقىرىم قاشىقتىقتا قامىستىڭ جانعانى انىقتالدى. ءۇش الاڭدا جانعان قامىستىڭ جالپى اۋماعى 152 شارشى مەتردى قۇرادى. وقيعا ورنىنا توتەنشە جاعدايلار دەپارتامەنتىنىڭ 14 قىزمەتكەرى جىبەرىلدى. قۇتقارۋشىلاردىڭ ۇيلەسىمدى ءىس-قيمىلىنىڭ ناتيجەسىندە ساعات 21:25-تە وشاقتارى تولىقتاي جويىلدى», دەپ حابارلادى دەپارتامەنتىنىڭ سىرتقى كوممۋنيكاتسيالار جانە يميدجدىك جۇمىس توبىنان.
ال ساعات 21:20-دا تاعى ءبىر ءورت وشاعى بارى انىقتالدى. بۇل – اتىراۋ قالاسىنىڭ العاباس اۋىلىنان شامامەن 5 شاقىرىم قاشىقتاعى قامىس ءورتى.
«كاسپي تەڭىزى جاعالاۋىنداعى اشىق الاڭدا قامىس پەن قۇرعاق ءشوپ ورتەندى. ءورت وشاعى اۋماعى انىقتالىپ جاتىر. وقيعا ورنىنا دەپارتامەنتتىڭ 10 قىزمەتكەرى جۇمىلدىرىلدى. ءورتتىڭ ەلدى مەكەنگە تارالۋ قاۋپى جوق», دەپ مالىمدەدى دەپارتامەنتتىڭ سىرتقى كوممۋنيكاتسيالار جانە يميدجدىك جۇمىس توبىنان.
ايتا كەتەيىك, استانا قالاسى الماتى اۋدانىنداعى سارىاعاش وتكەلىندە ورنالاسقان جەكە ءبىر قاباتتى اۆتوسەرۆيستىڭ عيماراتىندا ءورت شىقتى.