نۇرلان اۋباكىروۆ "سارىارقا" الەۋمەتتىك-كاسىپكەرلىك كورپوراتسياسى" اق باسقارما توراعاسى بولىپ تاعايىندالدى, دەپ حابارلايدى Egemen.kz كومپانيانىڭ ءباسپاسوز قىزمەتىنە سىلتەمە جاساپ.
ال كومپانيانىڭ ەكس-باسشىسى حالەل اكىمجانوۆ باسقا جۇمىسقا اۋىسۋىنا بايلانىستى قىزمەتىنەن بوساتىلدى.
نۇرلان اۋباكىروۆ مانسابىن بيۋدجەتتىك بانكتىڭ اعا اۋديتورى بولىپ باستاعان. ول قاراعاندى وبلىستىق قازىناشىلىق دەپارتامەنتىندە, قاراعاندى وبلىسى بويىنشا ەكونوميكا جانە بيزنەستى دامىتۋ باس باسقارماسىندا, قاراعاندى وبلىسىنىڭ كاسىپكەرلىك جانە ونەركاسىپ باسقارماسىندا جۇمىس ىستەدى.
ول قاراعاندى قالاسى قازىبەك بي اۋدانى اكىمى اپپاراتىنىڭ باسشىسى, قاراعاندى ءبولىمىنىڭ تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبولىمىنىڭ باستىعى, قاراعاندى وبلىسى اكىمى اپپاراتى باسشىسىنىڭ ورىنباسارى بولدى. 2009 جىلدان 2010 جىلعا دەيىن قاراعاندى قالاسىنىڭ قازىبەك بي اتىنداعى اۋداندى باسقاردى. سودان كەيىن ول قاراعاندى قالاسى اكىمىنىڭ ورىنباسارى بولدى. 2011-2012 جىلدارى - قاراعاندى قالاسى وكتيابر اۋدانىنىڭ اكىمى, 2012-2014 جىلدارى - بالقاش قالاسىنىڭ اكىمى. 2014 جىلدىڭ ماۋسىمىنان 2020 جىلدىڭ قىركۇيەگىنە دەيىن قاراعاندى قالاسىنىڭ اكىمى قىزمەتىن اتقاردى.