قازاقستاننىڭ حالىق جازۋشىسى, مەملەكەتتىك سىيلىقتىڭ لاۋرەاتى حاميت ەرعاليەۆ شىعارمالارىنىڭ بەس تومى وقىرمان قاۋىمعا جول تارتتى.
قازاقستاننىڭ حالىق جازۋشىسى, مەملەكەتتىك سىيلىقتىڭ لاۋرەاتى حاميت ەرعاليەۆ شىعارمالارىنىڭ بەس تومى وقىرمان قاۋىمعا جول تارتتى.
الاش جىرىنىڭ الامات بايگەسىندەگى الاپات اقىنداردىڭ بەل ورتاسىنان وزىنە تيەسىلى ورىنىن ويىپ تۇرىپ العان حاماڭنىڭ ابىزدىعىنا, شالقار ويلى ايدىندىلىعىنا بۇل كۇندەردە ەشكىم دە شاك كەلتىرە قويماسى انىق. بۇل – ۋاقىت ەنشىسىندەگى باعا, تاريح تارازىسىنداعى تاڭداۋ ءھام تالعام. ءوز ءداۋىرىنىڭ ورەسىنەن وجەت سويلەگەن, ايتارىن بۇگەجەكتەمەي ايتا بىلگەن, قاشاندا شىنايى دا شىن سىرىن تولعاعان ارقالى اقىننىڭ ولەڭ-جىرلارى مەن داستان-تولعاۋلارى كەلەر ۇرپاق الدىندا دا ءوز باعاسىن, قادىر-قاسيەتىن جوعالتپاق ەمەس. حاميت ەرعاليەۆ پوەزياسى ۋاقىت سىنىنان ءوتىپ ۇلگەرىپ, بولاشاققا بەت العان باياندى كەرۋەن ەكەندىگىن ادەبيەت بىلگىرلەرى دە ايعاقتاپ ايتىپ وتىر. وسى ارادا ورال قالاسىندا سوناۋ 1935 جىلى جاس شايىر حاميتتىڭ ءبىر توپ ولەڭدەرىنە جىلى لەبىز ءبىلدىرىپ جولىن اشقان, 1947 جىلى الماتىدا «اكە سىرى» پوەماسىن قولجازباسىنان وقىپ, سول تۋىندىنىڭ جارقىن تالايىن بولجاعان, ال 1952 جىلى «ءبىزدىڭ اۋىلدىڭ قىزى» داستانى تۋرالى ارنايى ماقالا جازىپ, اق تىلەۋىن ايتقان, ءسويتىپ, پوەزيا قىرانىنىڭ توماعاسىن سىپىرعان جىر قۇدىرەتى قاسىم امانجولوۆتىڭ اۋليەلىگىنە تاعى ءبىر ءتانتى بولماسقا ءاددىمىز جوق.
بۇگىندە حاميت ەرعاليەۆتاي داستانشىل, تولعاۋشىل, حالىقتىق داستۇردەگى جىراۋ اقىنى بولماسا, قازاق پوەزياسى تولىق كەلبەتىمەن كورىنە الماس ەدى دەسەك, ول دا راس. حاماڭنىڭ «ورتكە تيگەن داۋىلداي» ءور دە وجەت مىنەزىن, تەڭىزگە لايىق تەبىرەنىستەرىن, تاۋ تۇلعالى تازالىعىن, تاعى باسقا تابيعي دارىنعا ءتان دانىشپان دارالىقتارىن كوبىرەك ساعىناتىنىمىز دا راس. سوندايدا حاماڭنىڭ شينەلىنەن شىققان يران-عايىپ, رافاەل نيازبەك ءتارىزدى اقىندار الماتىنى قاق جارىپ اققان ەسەنتاي وزەنى بويىنداعى حاميت ەرعالي جاعالاۋىن تولعانا كەزىپ, جان ساباتىن تاۋىپ, ورمان ويلارعا بەرىلەر ەدى.
حاماڭ ءوز ءداۋىرىنىڭ, زامانانىڭ شىنشىل سۋرەتىن ورنەكتەگەن ءورشىل اقىن. كەلەر ۇرپاققا سول كەرەك. كەلەر ۇرپاققا حاماڭنىڭ ۇلى داستانى «قۇرمانعازىسى», تورتتاعاندارى, سونەتتەرى, «كۇي-داستان», «اڭىز-اتا» پوەمالارى, تاۋەلسىز ەل رۋحىن تانىتقان «جەدەل تولعاۋى» مەن «شەر تولعاۋى» كەرەك. مۇنىڭ ءوزى حاميت ەرعاليەۆتىڭ تۋعان حالقىمەن بىرگە جاساي بەرەتىن تاعدىرلى تالانت ەكەنىن شەگەلەپ اڭعارتادى. ويتكەنى, حاماڭنىڭ ءوزى جىرلاعانداي, قاشان بولسىن, «شىن اقىننىڭ شىراعدانى مازدايدى».
ولاي بولسا, جاقىندا «قازىعۇرت» باسپاسىنان مادەنيەت جانە اقپارات مينيسترلىگىنىڭ ارنايى باعدارلاماسىمەن جارىق كورگەن حاميت ەرعاليەۆتىڭ كوپتومدىق شىعارمالار جيناعىنىڭ بەس كىتابى جىرسۇيەر قاۋىمعا لايىقتى تارتۋ بولعانى كۇمانسىز. الماتىدا وسى اقجولتاي ءارى ساليقالى باسىلىمنىڭ تۇساۋكەسەرى وتكىزىلدى. اكادەميك زەينوللا قابدولوۆتىڭ زايىبى ساۋلە اپاي باستاپ, حاماڭمەن دوستاس بولعان ساپابەك ءاسىپ ۇلى, عابباس قابىش ۇلى, تولەپبەرگەن توباعابىل, مۇرات اۋەزوۆ, بەرىك شاحان ۇلى, سماعۇل ەلۋباي سياقتى قارىمدى قالامگەرلەر قوستاپ, حاماڭنان ءتالىم العان تەمىرحان مەدەتبەك, رافاەل نيازبەك, يران-عايىپ سياقتى اقىندار قۇپتاپ, ابىز اقىندى ساعىنىش سازىنا بولەدى, عيبراتتى ەستەلىكتەر بەسىگىندە تەربەتتى. اقىننىڭ بالالارى مۇرات پەن گۇلجان تۇساۋكەسەر راسىمىنە جينالعان قاۋىمعا, بەس تومدىقتى شىعارۋشىلار تاراپىنا العىس-راقمەتتەرىن ايتتى. حاماڭنىڭ كوكتەمدەي كورىكتى, جازداي جارقىن, كۇزدەي دانا بەس تاراۋ, بەس تومدىق حامساسى كوز ءسۇيىندىرىپ, كوڭىلدەرگە قۋانىش ۇيالاتتى.
قورعانبەك امانجول,
«ەگەمەن قازاقستان».
الماتى.
______________
سۋرەتتى تۇسىرگەن
يۋري بەككەر.