ىشكى ىستەر ءمينيسترى كارانتين ەرەجەسىن ورەسكەل بۇزعاندار تۋرالى ايتتى

نىڭ ايتۋىنشا, كارانتين تالابىن بۇزۋدىڭ 28 مىڭنان اسا دەرەگى تىركەلگەن.

"ونىڭ ىشىندە 4 600 دەرەك دۇكەندەر مەن بازارلاردا, 1 700 دەرەك مەيرامحانالارمەن جانە تاعى باسقا نىسانداردا تىركەلدى. كارانتين تالابىن بۇزۋدىڭ باسىم بولىگى قوستاناي وبلىسى (5 مىڭنان اسا دەرەك), باتىس قازاقستان وبلىسى (2,5 مىڭنان اسا دەرەك), تۇركىستان وبلىسى (3,5 مىڭنان اسا دەرەك), شىعىس قازاقستان وبلىسى (2 مىڭنان اسا دەرەك), الماتى قالاسىندا (3 800 اسا دەرەك) بايقالدى. انىقتالعان فاكت بويىنشا دەنساۋلىق ساقتاۋ ورگانى تاراپىنان سانيتاريالىق تالاپتى بۇزعانى ءۇشىن اكىمشىلىك حاتتاما تولتىرىلادى", - دەيدى مينيستر ۇكىمەت وتىرىسىندا.

سونىمەن قاتار, ەرلان تۇرعىمباەۆ ىشكى ىستەر مينيسترلىگى توتەنشە جاعداي كەزىندە كارانتين تالابىن بۇزعاندار قر اكىمشىلىك قۇقىق بۇزۋشىلىق تۋرالى كودەكسىنىڭ 476, 478-باپتارى بويىنشا جاۋاپقا تارتىلعانىن اتاپ ءوتتى. ول توتەنشە جاعداي رەجيمى الىنعاننان كەيىن زاڭ بۇزعانداردى جازاعا دەنساۋلىق ساقتاۋ مينيسترلىگى تارتاتىنىن ايتتى.

"پوليتسيا قىزمەتكەرلەرى قوعامدىق ءتارتىپتى باقىلاۋ كەزىندە كارانتين تالابىن ورەسكەل بۇزۋدىڭ 15 مىننان اسا دەرەگىن انىقتادى. بۇل توي جاساۋ, قوشتاسۋ ءراسىمىن وتكىزۋدىڭ 600 دەرەگى, دەمالىس ايماعىنىڭ جۇمىس ىستەۋىنىڭ 1 مىڭنان اسا دەرەگى, ونىڭ ىشىندە سۋ قويمالارى ماڭىندا شومىلۋ دەرەگى دە بار", دەدى تۇرعىمباەۆ.

سونداي-اق, مينيستر 26-27 قىركۇيەكتە ەلىمىزدە 41 توي وتكىزۋدىڭ دەرەگى تىركەلگەنىن جەتكىزدى.

"مىسالى, قىزىلوردا وبلىسىنداعى "وردا" مەيرامحاناسىندا 100-دەن اسا ادامنىڭ قاتىسۋىمەن توي وتكىزۋ دەرەگى تىركەلدى. بۇل وڭىردە كارانتين تالابىن كۇشەيتىلگەننەن بەرى وسىنداي 225 دەرەك انىقتالدى. 25-26 قىركۇيەكتە ەلوردادا جۇمىس ىستەگەن 4 تۇنگى كلۋب انىقتالدى. تەكسەرىس بارىسىندا تۇنگى كلۋبتىڭ بىرىندە 60 ادام بولدى. ولاردىڭ ءبارى اكىمشىلىك جاۋاپكەرشىلىككە تارتىلدى. وسىعان ۇقساس جۇمىس الماتىدا جۇرگىزىلدى, 5 تۇنگى كلۋب جابىلدى. شارانى ۇيىمداستىرعاندار جاۋاپقا تارتىلدى", دەيدى ول.

سونىمەن قاتار, ەرلان تۇرعىمباەۆ ماسكا تاقپاۋدىڭ 11 800 دەرەگى انىقتالعانىن, بۇل دەرەك بويىنشا اكىمشىلىك ءىس قوزعالاتىنىن جەتكىزدى.