ەگەمەندىگىمىزدىڭ تىرەگى, ەلدىگىمىزدىڭ جۇرەگى سانالاتىن استانامىز نۇر-سۇلتاننىڭ ايشىقتى كورىنىسى فوتوگرافتاردىڭ وبەكتيۆىنەن تۇسپەي كەلەدى. نەبىر ادەمى كورىنىستەرگە ارقاۋ بولعان قالانىڭ كوز تارتار كەلبەتى جىل مەزگىلدەرىندە وزىنە ءتان ەرەكشەلىگىمەن قۇلپىرا تۇسەدى. بۇل جولى National Geographic فوتوگرافتارى نۇر-سۇلتان قالاسىنىڭ ۇزدىك فوتوسۋرەتتەرىن جيناقتاپ, « ۇلى دالا جۇرەگى» كورمەسىن ۇيىمداستىرىپ جاتىر.
كوكتەمنەن بەرى كارانتين تالاپتارى باسەڭدەمەي, كورمە, كونتسەرت, تەاتر اتاۋلىدان ءبىر ۋاق قول ءۇزىپ, كوز جازىپ قالعانىمىز راس. ايتسە دە بيىلعى بەرەكەسىمەن كەلگەن قوڭىر كۇزدىڭ مەرەكەلى كۇندەرى از دا بولسا سەرپىلتىپ, قالا تۇرعىندارىنا قۋانىش سىيلاۋدا. تامىز ايىنان بەرى ءوتىپ جاتقان « ۇلى دالا جۇرەگى» كورمەسىندە قازاقستاندىق جانە شەتەلدىك اۆتورلاردىڭ 150-دەن استام جۇمىستارى ۇسىنىلعان. ولاردىڭ اراسىندا National Geographic جانە NY Times گازەتىنىڭ ايگىلى فوتوگرافى دجوردج ستەينمەتتستىڭ قولىنان شىققان تاڭداۋلى سۋرەت توپتامالارىن تاماشالاۋعا بولادى. ماسەلەن, ونىڭ ەسىل جاعالاۋى ماڭىنداعى جاڭاجىلدىق وتشاشۋ كەزىنەن تۇسىرىلگەن كادرى كوپشىلىكتىڭ تاڭدانىسىن تۋعىزعان تۋىندىنىڭ ءبىرى. بۇل تۋرالى اۆتور ءوزىنىڭ ينستاگرام الەۋمەتتىك جەلىسىندە «جاڭا جىل ءتۇنى قارساڭىندا تۇنگى ون ەكىدە قازاقستاننىڭ نۇر-سۇلتان قالاسىنداعى ەسىل وزەنىنىڭ ەكى جاعالاۋىن جالعاپ جاتقان اتىراۋ كوپىرىنىڭ ۇستىندە سالتاناتتى وتشاشۋ بولدى. بۇل – الەمدەگى ەكىنشى سۋىق استانا», دەپ جازعان ەدى. ودان باسقا بۇكىل الەمدى شارلاعان تاڭعاجايىپ سۋرەتتەر Antonio Politano, Sasin Tipchai, نيكيتا باسوۆ, تۇرار قازانعاپوۆ سىندى National Geographic-ءتىڭ ەڭبەك سىڭىرگەن فوتوگرافتارى, سونداي-اق باتىرلان تولەگەنوۆ, الەكساندر فيليپەنكو, ەۆگەني تكاچەنكو, ايبەك احانوۆ جانە باسقا دا تانىمال وتاندىق فوتوگرافتار بار.
ەلوردانىڭ تۇرمىس-تىرشىلىگىنەن سىر شەرتەتىن كورمە قالاداعى دەمالىس, ىسكەرلىك جانە مادەني ءومىر, جارقىن تۇلعالار بەينەسىن ارقاۋ ەتكەن. سونىمەن قاتار استانانىڭ ەرەكشە گاسترونومياسى, سپورت الەمى جانە زاماناۋي شاھاردىڭ وزىق كەلبەتىن جارىسا سۋرەتتەيدى.
اتاۋلى كورمەنىڭ ماقساتى ايگىلى شەتەلدىك جانە وتاندىق فوتوگرافتاردىڭ فوتوكامەرالارى ارقىلى شارتاراپقا قازاقستاننىڭ جاڭا ءومىرىنىڭ شىنايى كەسكىن-كەلبەتى مەن ارقا توسىندە بوي كوتەرگەن استانانىڭ بۇگىنگى زاماناۋي كەلبەتىن ناسيحاتتاۋدى كوزدەيدى.
كورمەنى «حان شاتىر» ويىن-ساۋىق ورتالىعى جانىنداعى الاڭنان تاماشالاۋعا بولادى. ءىس-شارا بارلىق سانيتارلىق نورمالاردى ساقتاي وتىرىپ وتكىزىلەدى. ۇيىمداستىرۋشىلار بارلىق ەرەجەلەردى قاتاڭ ساقتاۋ, ماسكا تاعۋ, قاشىقتىقتى ۇستاۋ جانە سانيتايزەرلەردى پايدالانۋ قاجەتتىگىن ەسكە سالادى.
ايتا كەتەيىك, الەم فوتوگرافتارىن شابىتتاندىرعان كورىكتى استانانىڭ تاريحىن ارقاۋ ەتكەن كورمە سۋرەتتەرىن nursultankorme.kz سايتىنان ونلاين كورۋگە بولادى.