تاجىكستاندا ەلدىڭ پرەزيدەنتىن سايلاۋ ءۇشىن داۋىس بەرۋ اياقتالدى. مەملەكەت باسشىسى الداعى جەتى جىلعا قايتا سايلاندى. بۇل تۋرالى يتار-تاسس حابارلادى.
رەسپۋبليكادا جەرگىلىكتى ۋاقىتپەن 20:00-دە بارلىق سايلاۋ ۋچاسكەلەرى داۋىس ساناۋ ءۇشىن جابىلدى. ورتالىق سايلاۋ كوميسسياسى اپپاراتىنىڭ توراعاسى ابدۋمانون دودوەۆ اگەنتتىك تىلشىسىنە بارلىق جەردە سايلاۋدىڭ ازاماتتاردىڭ وتە جوعارى بەلسەندىلىگىمەن جۇرگىزىلگەنىن جەتكىزدى. سايلاۋدا بارلىعى 3,8 ملن. ادام داۋىس بەرۋگە قاتىسقان. بۇل تىزىمگەن ەنگىزىلگەن سايلاۋشىلاردىڭ 80,3 پايىزىن قۇرايدى.
قازىر ەلدە ەمومالي راحموننىڭ سايلانعانىنا ەشكىم كۇمان كەلتىرىپ وتىرعان جوق.تاجىك ساياساتتانۋشىسى, ۇلتتىق پارلامەنت دەپۋتاتى سۋحروب شاريپوۆ وسىعان وراي «تاجىكستان ايماقتارىنىڭ باسىم بولىگىندە جۇرت ەشقانداي باسقا پارتيا جونىندە بۇرىن ەستىپ كورمەگەن, بىراق ەسەسىنە ولاردىڭ ءبارى ەمومالي راحموندى وتە جاقسى بىلەتىنىن» ايتتى.
ساراپشىلار سونىمەن قاتار سايلاۋدىڭ وپپوزيتسيالىق پارتيالاردىڭ قاتىسۋىنسىز وتكەنىنە دە نازار اۋدارىپ وتىر. سونداي ەكى ىقپالدى ساياسي كۇش – تاجىكستان يسلام قايتا ورلەۋ پارتياسى مەن بيلىككە وپپوزيتسيالىق باعىت ۇستايتىن سوتسيال-دەموكراتيالىق پارتيا سايلاۋعا قاتىسۋدان باس تارتقان. بۇل شەشىم وپپوزيتسيا ۇسىنعان, ەش پارتيادا جوق 61 جاستاعى قۇقىق قورعاۋشى وينيحول بوبونازاروۆا كانديدات رەتىندە تىركەلۋ ءۇشىن ءوزىن قولدايتىن 210 مىڭ قول جيناۋ شەگىنەن شىعا الماي, سايلاۋ الدى جارىسىنان شىعىپ قالعاننان كەيىن قابىلداندى.
وپپوزيتسيا ەلدىڭ باسشىلىعىن قول جيناۋ ناۋقانىندا سايلاۋشىلارعا قىسىم كورسەتتى دەپ ايىپتايدى. ال تاجىكستان بيلىگى وپپوزيتسيا كەمشىلىكتى باسقادان ەمەس, وزدەرىنەن ىزدەۋى كەرەك ەدى, دەپ وتىر.
«قازىرگى سايلاۋ بۇل – ۇلكەن سپەكتاكل. ءبىزدىڭ جاقتاستارىمىز وندا وزدەرىن كورەرمەن رەتىندە دە كورگىلەرى كەلمەيدى», - دەدى يسلام قايتا ورلەۋ پارتياسى ساياسي كەڭەسىنىڭ مۇشەسى, بەلگىلى ساياساتتانۋشى حيكماتۋللو سايفۋللوزودا.
ساكەن مايلىباي.