بۇگىن, 6 قاراشا كۇنى تاجىكستاندا پرەزيدەنت سايلاۋى ءوتىپ جاتىر. جەرگىلىكتى ۋاقىت بويىنشا 6:00 ساعاتتا 68 وكرۋگتىك سايلاۋ كوميسسيالارى مەن 3 158 ۋچاسكەلىك سايلاۋ ۋچاسكەلەرى جۇمىستارىن باستادى. بۇل تۋرالى ريا «نوۆوستي» حابارلادى.
بۇلاردان بولەك, ەلدەن سىرت جاقتاردا 60 ۋچاسكە اشىلدى. ولاردىڭ 24-ءى رەسەي جەرىندە ورنالاستى. مەملەكەتتىك باسپاحانالار تاجىك, ورىس, وزبەك جانە قىرعىز تىلدەرىندە 4 ملن. دانادان استام بيۋللەتەن باسىپ شىعاردى.
سايلاۋعا 5 ۇمىتكەر ءتۇستى. ولاردىڭ اراسىندا قازىرگى بيلىك باسىنداعى حالىق-دەموكراتيالىق پارتياسىنان – ەمومالي راحمون, كوممۋنيستىك پارتيادان – يسمويل تالباكوۆ, اگرارلىق پارتيادان – توليببەك بۋحوريەۆ, ەكونوميكالىق رەفورما پارتياسىنان – وليمدجون بوبوەۆ جانە سوتسياليستىك پارتيادان ابدۋحاليم گافاروۆ بار.
سايلاۋدىڭ بارىسىن 500-دەن استام حالىقارالىق باقىلاۋشىلار قاداعالاپ وتىر. ولار 30-عا جۋىق ەلدىڭ وكىلدەرى بولىپ تابىلادى.
بىراق ەشكىم دە بۇل سايلاۋدان سيۋرپريز كۇتىپ وتىرعان جوق. ساراپشىلار دا, ەلەكتورات تا قازىرگى ءىس باسىنداعى پرەزيدەنت ەمومالي راحموننىڭ ءبىرىنشى تۋردا-اق جەڭىسكە جەتەتىنىنە كۇماندانبايدى. ماسەلە تەك ونىڭ پرەزيدەنت بولعانىن زاڭداستىرىپ بەرۋدە عانا قالعان سياقتى. بارلىق بۇقارالىق اقپارات قۇرالدارى وسىنى مالىمدەپ جاتىر.
ساكەن مايلىباي.