قازاقستاننىڭ قارجى ءمينيسترى بولىپ باقىت سۇلتانوۆ تاعايىندالدى. بۇل تۋرالى اقوردا سايتىنا سىلتەمە جاساي وتىرىپ Egemennews.kz ءتىلشىسى حابارلادى.
«سۇلتانوۆ باقىت تۇرلىحان ۇلى قازاقستان رەسپۋبليكاسى پرەزيدەنتى اكىملىشىگى جەتەكشىسىنىڭ ورىنباسارى لاۋازىمىنان بوساتىلىپ, قازاقستان رەسپۋبليكاسى پرەمەر-ءمينيسترىنىڭ ورىنباسارى – قازاقستان رەسپۋبليكاسىنىڭ قارجى ءمينيسترى بولىپ تاعايىندالسىن», - دەلىنگەن مەملەكەت باسشىسىنىڭ رەسمي سايتىندا جاريالانعان جارلىقتا.
قارجى ءمينيسترى لاۋازىمىن ءبىر اپتاسى كەم 6 جىل اتقارعان بولات جامىشەۆ پرەزيدەنتتىڭ جارلىعىمەن قازاقستان رەسپۋبليكاسىنىڭ وڭىرلىك دامۋ ءمينيسترى بولىپ تاعايىندالدى. «جامىشەۆ بولات بيداحمەت ۇلى قازاقستان رەسپۋبليكاسىنىڭ قارجى ءمينيسترى لاۋازىمىنان بوساتىلىپ, قازاقستان رەسپۋبليكاسىنىڭ وڭىرلىك دامۋ ءمينيسترى بولىپ تاعايىندالسىن», - دەلىنگەن وسىعان وراي بەرىلگەن جارلىقتا.
باقىت سۇلتانوۆ 2003 جىلعى ماۋسىمنان 2006 جىلعى اقپانعا دەيىن ەكونوميكا جانە بيۋدجەتتىك جوسپارلاۋ ۆيتسە-ءمينيسترى بولدى. سوسىن ستاتيستيكا جونىندەگى اگەنتتىكتىڭ توراعاسى قىزمەتىن اتقاردى. 2007 جىلعى قاڭتاردان 2007 جىلعى تامىزعا دەيىن قارجى ۆيتسە-ءمينيسترى بولىپ ىستەدى, ال 2007 جىلعى 10 تامىزدا ەكونوميكا جانە بيۋدجەتتىك جوسپارلاۋ ءمينيسترى بولىپ بەكىتىلدى. ول مەملەكەت باسشىسىنىڭ جارلىعىمەن 2010 جىلدان قازاقستان پرەزيدەنتىنىڭ كومەكشىسى بولىپ تاعايىندالدى. ال 2012 جىلعى 21 قاڭتاردا نۇرسۇلتان نازارباەۆ باقىت سۇلتانوۆتى قازاقستان پرەزيدەنتى اكىمشىلىگى باسشىسىنىڭ ورىنباسارى لاۋازىمىنا تاعايىنداۋ تۋرالى جارلىققا قول قويدى.