بيىل قازاقستاندا قارجى پيراميدالارىنا قاتىستى 37 قىلمىستىق ءىس قوزعالىپ, 18 ۇيىمنىڭ زاڭسىز قىزمەتى اشكەرەلەندى. بۇل تۋرالى پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا قارجى مينيسترلىگى قارجى مونيتورينگى كوميتەتىنىڭ پروفيلاكتيكالىق جۇمىس جانە باقىلاۋ باسقارماسىنىڭ اسا ماڭىزدى ىستەر جونىندەگى تەرگەۋشىسى ەردەن جۇما ايتتى.
ۆەدومستۆو وكىلى قازىر تەرگەۋ امالدارى جالعاسىپ جاتقانىن, سونداي-اق ەلىمىزدە قىلمىستىق كودەكستىڭ 217-بابىنا سايكەس قارجى پيراميدالارىنىڭ قىزمەتىنە تىيىم سالىنعانىن جەتكىزدى.
«جوعارىداعى قىلمىستىق فاكتىلەردىڭ سالدارىنان ادامدار الدانىپ, زارداپ شەككەن. ولار قۇقىق قورعاۋ ورگاندارىنا ۋاقتىلى حابارلاسپايدى نەمەسە اقشانى قايتارا الامىن دەپ ۇمىتتەنەدى. سوندىقتان قازىر الدىن الۋ جۇمىستارىنا باسىمدىق بەرىلىپ وتىر», دەدى ە.جۇما.
سپيكەردىڭ ايتۋىنشا, اكiمشiلiك قۇقىق بۇزۋشىلىق تۋرالى كودەكستىڭ 150-بابىنا سايكەس, قارجى پيراميدالارىن ناسيحاتتايتىندارعا قاتىستى اكىمشىلىك جاۋاپكەرشىلىك قاراستىرىلعان.
قارجى مونيتورينگى كوميتەتىنىڭ توراعاسى جانات ەليمانوۆتىڭ سوزىنە سۇيەنسەك, 8 ايدا ۇيىمداسقان قىلمىستىق توپ ۇيىمداستىرۋشىلارى مەن مۇشەلەرىنە بايلانىستى 44 قىلمىستىق ءىس قوزعالدى. بۇل سوڭعى 5 جىلداعى ەڭ ۇلكەن كورسەتكىش.
تالداۋ ارقىلى زاڭسىز قولما-قول اقشامەن اينالىساتىن 60-تان استام ىقتيمال قىلمىستىق توپ انىقتالدى. وسى ماقساتتا ولار 1200-دەن استام جالعان كومپانيا قۇرىپ, قارجى اينالىمى 2 ترلن تەڭگەدەن اسقان.
«بارلىق قىلمىستىق ءىس بويىنشا 98 ادام كۇدىكتى دەپ تانىلىپ, ونىڭ 28-ءى قاماۋعا الىندى. تاعى 29-ى ۇيقاماقتا وتىر. جالپى, 19 ۇيىمداسقان قىلمىستىق توپ قۇرىقتالدى. سوڭعى 5 جىلدا العاش رەت زاڭسىز قولما-قول اقشانى الۋ دەڭگەيى 38%-عا ازايدى», دەدى ج.ەليمانوۆ.
جاۋاپتى ورگان باسشىسى بيۋدجەت قاراجاتىن جىمقىرۋ فاكتىلەرىن انىقتاۋ ەرەكشە نازاردا ەكەنىن ايتتى. بۇل باعىتتا باس پروكۋراتۋرامەن بىرلەسىپ, «قازىنا» جەدەل الدىن الۋ ءىس-شاراسى قولعا الىنعان. ونىڭ اياسىندا ءبىر كۇندىك فيرمالارمەن 63 ملرد تەڭگەگە تۇراقتى تۇردە ءوزارا ەسەپ ايىرىسقان مەملەكەتتىك ساتىپ الۋدىڭ 90-نان استام كۇماندى جەڭىمپازى انىقتالدى. وسىعان قاتىستى 20 قىلمىستىق ءىس قوزعالىپ, قالعاندارى بويىنشا تەكسەرۋ جۇمىستارى جۇرگىزىلۋدە.
بۇعان قوسا كوميتەت توراعاسى بىلتىر جالعان الكوگولدى ونىمدەر شىعاراتىن 50-دەن استام جەراستى تسەحى جويىلىپ, زاڭسىز اينالىمنان 1,5 ملن-نان استام شولمەك, 400 مىڭ ليترگە جۋىق سپيرت, سونداي-اق 500 مىڭ جالعان ەسەپكە الۋ باقىلاۋ ماركالارى تاركىلەنگەنىن جەتكىزدى.
ۆەدومستۆو وكىلدەرىنىڭ دەرەكتەرىنە سەنسەك, بيىل 8 ايدا 765 زاڭسىز ويىن مەكەمەسىنىڭ جولى كەسىلىپ, 22 جاسىرىن كازينو جويىلدى. ويىن تەرمينالدارى, رۋلەتكالار جانە تاعى باسقا تۇرىندەگى 12 مىڭعا جۋىق زات تاركىلەندى.