ء«ار وبلىستا, ءىرى اۋدان ورتالىقتارىندا سپورت ۇيىرمەلەرىن اشۋ قاجەت». بۇل مەملەكەت باسشىسى قاسىم-جومارت توقاەۆتىڭ بيىلعى جولداۋىندا ايتقان ماڭىزدى ماسەلەلەرىنىڭ ءبىرى. وسى ورايدا ءبىز وليمپيادا چەمپيونى ولگا رىپاكوۆامەن اڭگىمەلەسكەن ەدىك.
– ولگا سەرگەەۆنا, پرەزيدەنتتىڭ ايتىپ وتىرعانى تۇپتەپ كەلگەندە, ۇرپاق تاربيەسى مەن ۇلت دەنساۋلىعى. ءسىزدىڭ ويىڭىزشا, ەلىمىزدەگى بۇقارالىق سپورت پەن بالالار سپورتىن دامىتۋدىڭ قانداي تىڭ جولدارى بار؟
– ەڭ الدىمەن مەملەكەت باسشىسىنىڭ بيىلعى جولداۋى بىرقاتار سالاعا قاتىستى جاڭا مىندەتتەردى ايقىنداپ بەرگەنىن ايتقىم كەلەدى. قۋانتارلىعى, ونىڭ ىشىندە سپورتتى, اسىرەسە بۇقارالىق سپورتتى دامىتۋعا قاتىستى كوپتەگەن ماسەلە كوتەرىلگەن. كاسىبي سپورتشى بولعان سوڭ, مەنى دە رەسپۋبليكامىزداعى بۇقارالىق جانە بالالار سپورتىنىڭ بولاشاعى الاڭداتاتىنى انىق. قاسىم-جومارت كەمەل ۇلى وسىنداي قيىن-قىستاۋ زاماندا ەل قازىناسىنان كاسىبي سپورتتىق كلۋبتارعا قارجى قۇيۋدىڭ ەش نەگىزى جوق ەكەنىن ايتقان بولاتىن. راسىمەن دە, جىل سايىن رەسپۋبليكالىق بيۋدجەت پەن كۆازيمەملەكەتتىك كومپانيالار ەسەبىنەن ەلىمىزدەگى سان الۋان كاسىبي سپورتتىق كلۋبتاردى قارجىلاندىرۋعا ميللياردتاعان تەڭگە بولىنەدى. ەندى بۇدان بىلاي دەنەشىنىقتىرۋ مەن بۇقارالىق سپورتتى دامىتۋعا, بالالارعا ارنالعان سپورت سەكتسيالارىنىڭ جۇمىسىن قولداۋعا باسىمدىق بەرۋىمىز كەرەك.
بۇقارالىق سپورتتىڭ كاسىبي سپورتتان ايىرماشىلىعى سول, وندا تۇتاستاي ءبىر ۇلتتىڭ سالاۋاتتىلىعىنا, جاس پەن كارىنىڭ تۇگەلدەي دەنەشىنىقتىرۋمەن اينالىسۋىنا دەن قويىلادى. كاسىبي سپورت بولسا, بەلگىلى ءبىر توپتى عانا قامتيدى. شىنىمەن دە, سپورت دەگەنىمىز – دەنساۋلىق كەپىلى. دەمەك, ول كەز كەلگەن ادامعا قولجەتىمدى بولۋى شارت.
– مەملەكەت باسشىسى بالالارعا ارنالعان ءتۇرلى سپورت سەكتسيالارى بارلىق وبلىستا, ءار اۋدان ورتالىعىندا بولۋى كەرەكتىگىن ايتتى...
– ءوز باسىم پرەزيدەنتتىڭ بۇل باستاماسىن تولىقتاي قولدايمىن. جالپى, بيىلعى جولداۋدا بالالار سپورتىن قولداۋعا ەرەكشە ءمان بەرىلىپ وتىرعانى بەكەر ەمەس. سەبەبى وسكەلەڭ ۇرپاقتى دەنەشىنىقتىرۋ مەن سپورتقا كىشكەنتايىنان باۋلىعان ماڭىزدى.
ءبىزدىڭ وبلىسقا كەلەر بولساق, سوڭعى جىلدارى شىعىستا بۇل باعىتتا ايتارلىقتاي شارۋا تىندىرىلدى. ماسەلەن, پاندەمياعا دەيىن ايماقتا رەسپۋبليكالىق جەڭىل اتلەتيكا فەدەراتسياسىنىڭ مۇرىندىق بولۋىمەن ءتۇرلى دەڭگەيدەگى جارىستار, ايتۋلى مارافوندار وتكىزىلگەن. ونىڭ ىشىندە كاسىبي جارىستارمەن قاتار, اۋەسقويلار, بالالار مەن وقۋشىلار اراسىنداعى سايىستار دا بولدى. قۋانتارلىعى, مۇنداي باسەكەلەرگە قاتىسۋعا نيەت بىلدىرگەندەر سانى جىل وتكەن سايىن ارتۋدا. ءتىپتى كارانتين كەزىندە دە قول قۋسىرىپ وتىرماي, ءتۇرلى ونلاين-چەللەندجدەر ۇيىمداستىردىق. سوندىقتان سپورت سالاسى بىزدە ايتارلىقتاي جەتىستىكتەرگە جەتىپ كەلەدى.
– كارانتين دەمەكشى, كوكتەمنەن باستالعان شەكتەۋلەر كوپ نارسەگە قولبايلاۋ بولدى. ارينە حالىقتىڭ دەنساۋلىعى ماڭىزدى. سۇرايىن دەگەنىم, وسى كەزدە سپورتشىلارىمىز الداعى بايراقتى باسەكەلەرگە قالاي دايىندالدى؟
– كوروناۆيرۋس پاندەمياسى ۇيرەنشىكتى ومىرىمىزگە ايتارلىقتاي وزگەرىستەر ەنگىزگەنى راس. ىندەت سپورتقا دا كەرى اسەرىن تيگىزبەي قويمادى. بارلىق جوسپارىمىز تۇبەگەيلى وزگەردى. اعىمداعى جىلدىڭ ەڭ ايتۋلى سپورتتىق وقيعاسى – توكيو وليمپياداسى كەيىنگە شەگەرىلدى. سونىڭ كەسىرىنەن الدىن الا دايىندالىپ قويعان جاتتىعۋلار كەستەسى اۋىستى. جاسىرىپ-جابارى جوق, كوبىمىز وليمپيادا ويىندارى ۋاقتىلى وتكىزىلەدى دەپ سوڭعى ساتكە دەيىن ۇمىتتەندىك. توكيوداعى ويىندارعا ارنايى جاتتىعۋ جوسپارى بويىنشا دايىندالدىق. الايدا ءۇمىتىمىز اقتالمادى. ەلىمىز بەن الەمدەگى جاعداي كۇرت ناشارلاعان سوڭ, سپورتشىلاردىڭ دەنى جاتتىعۋ جاساۋدى دا دوعاردى.
مەن ءدال قازىرگى ۋاقىتتا ارتىق سالماق قوسپاۋ ءۇشىن ءوز بەتىمشە جاتتىعۋلار جاساپ ءجۇرمىن. بىراق قازىرگى جاتتىعۋىم ۇلكەن جارىسقا قاتىساتىنداي دايىندىق دەۋگە كەلمەيتىن شىعار. الەمدى دۇرلىكتىرگەن ىندەتتەن تەز ارىلىپ, ءوزىمنىڭ تولىققاندى جاتتىعۋلارىما, جارىستارعا ورالعىم كەلەدى. وسىدان ءبىراز ۋاقىت بۇرىن سپورتشىلارعا ساياباقتاردا, ستاديوندار مەن ارنايى سپورتتىق الاڭداردا جاتتىعۋ جۇرگىزۋگە رۇقسات بەرىلگەن ەدى. ءسوزسىز بۇل ءبىز ءۇشىن جاقسى جاڭالىق بولدى. ەندى قىسقى ماۋسىمعا دايىندىقتى باستاۋ قاجەت. قىس ايلارىندا بىرنەشە ءىرى جارىس ءوتۋى ءتيىس. وعان دەيىن ەل مەن جاھانداعى جاعداي تۇراقتالىپ, شەكتەۋ شارالارى الىنادى دەپ ۇمىتتەنەمىن.
– قازىر شە, قايدا جاتتىعىپ ءجۇرسىز؟
– قازىر وسكەمەندەگى جەڭىل اتلەتيكا ورتالىعىندا, سونداي-اق اۋا رايى قولايلى كۇندەرى «سامال» ساياباعىندا جاتتىعامىن. ءبارى ساتىمەن بولىپ, قىستاعى جارىستار شەگەرىلمەسە, بىرنەشە كىشىگىرىم سايىسقا قاتىسۋ ويدا بار. ويتكەنى وليمپيا ويىندارىنا دەيىن تەزىرەك بابىما كەلۋ قاجەت.
– جالپى, وقۋ-جاتتىعۋ جيىندارى قاشان باستالۋى ءتيىس؟
– ول تۋرالى ەش نارسە ايتا المايمىن. ول جاعى ازىرگە بەلگىسىز. ەپيدەميالىق احۋال جاقسارىپ, شەكارالار اشىلىپ جاتسا, مىندەتتى تۇردە ۇلتتىق وليمپيادا كوميتەتىنەن رۇقسات الىپ, وقۋ-جاتتىعۋ جيىندارىنا شىعامىز. ويتكەنى جىل ون ەكى اي كوشىپ-قونىپ جۇرەتىن سپورتشى دەگەن حالىق ءۇشىن وسىنشاما ۋاقىت ءبىر ورىندا وتىرۋ وتە اۋىر. قالاي دەگەنمەن, ءۇي جاعدايىندا ويداعىداي جاتتىعۋ جاساي المايدى ەكەنسىڭ.
– «Egemen Qazaqstan» گازەتىنىڭ وقىرماندارىنا قانداي كەڭەس بەرەر ەدىڭىز؟
– ەڭ باستىسى, دەنساۋلىقتارىڭىزدى كۇتىڭىزدەر. ءار ادام شاما-شارقىنا قاراي جاتتىعۋ جاساۋى قاجەت. ماسەلەن, تاڭعى جاتتىعۋ جاساۋعا, جۇگىرۋگە نەمەسە جاياۋ جۇرۋگە بولادى. ونىڭ ءبارى دەنساۋلىققا پايدالى. جۇمىستان كەيىن سپورتزالعا بارىپ شىنىعۋعا دا بولادى. ماسەلەن, ءبىزدىڭ قالادا مۇنداي جاتتىعۋلار جاساۋعا بولاتىن جەرلەر جەتىپ ارتىلادى. ەڭ باستىسى, جاتتىعۋ قارقىنىنا ەمەس, جيىلىگىنە ءمان بەرگەن ءجون.
اڭگىمەلەسكەن
مەرەي قاينار ۇلى,
«Egemen Qazaqstan»
شىعىس قازاقستان وبلىسى