ماڭعىستاۋ وبلىسىندا ءىرى كولەمدە ماريحۋانا ەسىرتكىسىن ساقتاعانى ءۇشىن ەر ادام 10 جىلعا باس بوستاندىعىنان ايىرىلدى. بۇل تۋرالى ماڭعىستاۋ ستانتسياسىنداعى جەلىلىك پوليتسيا ءبولىمى كادر ساياساتى توبىنىڭ ينسپەكتورى, پوليتسيا اعا لەيتەنانتى داۋرەن ناريمانوۆ ايتتى, دەپ حابارلايدى Egemen.kz.
جەدەل ىزدەستىرۋ شاراسى بارىسىندا پوليتسيا قىزمەتكەرلەرى ماڭعىشلاق كەنتىندە 32 جاستاعى ەر ادامدى ۇستاعان. تەكسەرىس بارىسىندا ەر ادامنىڭ گاراجىنان اسا ءىرى كولەمدە ەرەكشە ءيىسى بار جاسىل ءتۇستى وسىمدىك تابىلعان.
ساراپتاما قورىتىندىسىنا سايكەس, تاركىلەنگەن زات كەپتىرىلگەن ماريحۋانا ەسىرتكىسى ەكەنى انىقتالعان. "بۇل فاكت بويىنشا كولىك پوليتسياسىنىڭ قىزمەتكەرلەرى قر قىلمىستىق كودەكسىنىڭ 297-بابى 3-بولىگى ("ساتۋ ماقساتىندا اسا ءىرى مولشەردە ەسىرتكى زاتىن ساقتاۋ") بويىنشا سوتقا دەيىنگى تەرگەۋ جۇرگىزىلدى. ماڭعىستاۋ وبلىسى بويىنشا مامانداندىرىلعان اۋدانارالىق قىلمىستىق سوتىنىڭ ۇكىمىمەن ەر ادام كىنالى دەپ تانىلىپ, 10 جىلعا باس بوستاندىعىنان ايىرىلدى, دەيدى داۋرەن ناريمانوۆ.