COVID-19 داعدارىسىنان كەيىنگى الەم تۋرالى وچەرك

دوكتور كاروننىڭ كىتابى بىرنەشە ەسسەدەن تۇرادى, وندا اۆتور ليبەراليزمنىڭ سىن-قاتەرلەرى مەن جاھاندانۋدى باسقارۋ ماسە­لە­سىندە داعدارىس اشقان جاڭا مۇمكىندىكتەر تۋرالى ايتادى. پروفەسسور ءوز ەڭبەگىندە COVID-19 داعدارىسىنا بايلانىستى قىتاي مەن باتىس ەلدەرى اراسىنداعى قاتىناستاردىڭ ديناميكاسىنا دا كوڭىل ءبولدى.

«الەم كوزگە كورىنبەيتىن جانە ۇستاتپايتىن جاۋمەن سوعىسۋدا, بۇل بارلىق ەلدەردى تەڭدەسسىز شارالاردى قولدانۋعا ءماجبۇر ەتتى. ارينە, بۇرىن مۇنداي جاعدايلار دا بولعان سياقتى, ادامزاتقا تون­گەن كەز كەلگەن قاتەر تەرەڭ ساياسي تولقۋلارعا, ءتىپتى الەم­دىك ءتارتىپتىڭ وزگەرۋىنە اكەل­ۋى مۇمكىن», دەيدى دوكتور جان-فرانسۋا كارون.

Springer باسپاسى دوكتور كاروننىڭ جۇمىسىن «COVID-19 داعدارىسىنىڭ ساياسي سالدارىن جانە حالىقارالىق ەكونوميكادا بولۋى مۇمكىن جۇيەلىك وزگەرىستەردى قاراستىراتىن العاشقى كىتاپ» دەپ اتادى.

بۇل جۇمىس ساياساتتانۋشىلار مەن فيلوسوفتار ءۇشىن دە, جالپى جۇرتشىلىق ءۇشىن دە, پاندەميادان كەيىن الەم قانداي بولاتىندىعى تۋرالى ۇدايى ويلايتىن ادامدار ءۇشىن دە قىزىقتى بولادى.

ايتا كەتەلىك, دوكتور جان-فرانسۋا كارون نازارباەۆ ۋني­ۆەر­سيتەتىنىڭ ساياساتتانۋ جانە حالىقارالىق قاتىناستار كا­فە­درا­سىنىڭ قاۋىمداستىرىلعان پروفەسسورى. نۋ-دا جۇمىس ىستەمەس بۇ­رىن, دوكتور كارون مونكتون ۋني­­ۆەرسيتەتىندە (كانادا), سون­داي-اق لاۆال, شيكۋتيميدەگى كۆە­بەك ۋنيۆەرسيتەتتەرىندە, بريۋس­سەل­دىڭ ەركىن ۋني­ۆەر­سي­تە­تىن­دەگى ەۋرو­پا­لىق زەرتتەۋلەر ينستي­تۋ­تىندا ساباق بەردى.

دوكتور كاروننىڭ زەرتتەۋلەرى كوپۇلتتى مەملەكەتتەردەگى بىرلىك پەن ساياسي تۇراقتىلىق ماسە­لە­لە­رىن زەرتتەۋگە, ەتنومادەني ار­تۇر­لىلىك كونتەكستىندەگى ۇلتتىق سايكەستىلىكتى باعالاۋعا, سونداي-اق قازىرگى اسكەري ەتيكاعا باعىتتالعان. ونىڭ مونوگرافيالارى «ساياسات», «ساياسات تاريحىنىڭ حابارشىسى», ۇلتشىلدىق جانە ەتنيكالىق ساياسات, ۇلتتىق سايكەستىلىك, كانا­دا­لىق حالىقارالىق زەرتتەۋلەر جۋرنالى, مادەنيەتارالىق زەرتتەۋلەر جۋرنالى جانە اسكەري ەتيكا جۋرنالى سياقتى ءارتۇرلى جۋرنالداردا جارىق كوردى.