بۇگىندە جامبىل وبلىسىندا كوروناۆيرۋس ىندەتىنىڭ ەكىنشى تولقىنىنا دايىندىق قارقىندى جۇرگىزىلۋدە. مۇنداعى باستى ماقسات – تۇرعىنداردىڭ قاۋىپسىزدىگىن قامتاماسىز ەتۋ. سوندىقتان دا وڭىردە تۇماۋعا قارسى ۆاكتسينا ەگۋ جۇمىستارى جىلداعىدان ەرتە, ياعني 15 قىركۇيەكتەن باستالىپ كەتتى. سودان بەرى ءبىر اپتانىڭ ىشىندە وبلىس بويىنشا 19 000-عا جۋىق ازامات ۆاكتسينا قابىلداعان, دەپ حابارلايدى Egemen.kz
وبلىستىق دەنساۋلىق ساقتاۋ باسقارماسىنىڭ مالىمەتىنشە, وڭىردەگى مەديتسينا مەكەمەلەرىنىڭ قىزمەتكەرلەرى ەكپەنى وزدەرىنە ءبىرىنشى بولىپ سالدىرعان. سونداي-اق, مەديتسينالىق ۇيىمدار ساپالى ءارى ءتيىستى زەرتحانالىق سىناقتان وتكەن ۆاكتسينامەن قامتىلعان. دارىگەرلەر كۇز ايلارىندا جەدەل رەسپيراتورلىق ۆيرۋستىق ينفەكتسيا مەن تۇماۋدىڭ ءورشيتىنىن ايتۋدا. سوندىقتان دا بيىل حالىقتى ۆاكتسيناتسيالاۋ اسا ماڭىزدى. ويتكەنى, ماماندار كوروناۆيرۋس ىندەتى تۇماۋمەن قاباتتاسىپ, ەپيدەميولوگيالىق جاعدايدى اسقىندىرۋى مۇمكىن ەكەنىن ەسكەرتەدى.
ۆاكتسينا – تەگىن مەديتسينالىق كومەكتىڭ كەپىلدىك بەرىلگەن كولەمىنىڭ پاكەتىنە كىرەدى جانە حالىقتىڭ بەلگىلى ءبىر توبى ءۇشىن تەگىن جۇرگىزىلەدى. اتاپ ايتقاندا, سوزىلمالى اۋرۋى بار 18 جاسقا دەيىنگى بالالارعا, مەديتسينا قىزمەتكەرلەرىنە, جۇكتى ايەلدەر مەن بالالار ۇيلەرىنىڭ جانە مەكتەپ-ينتەرناتتاردىڭ تاربيەلەنۋشىلەرىنە, مۇگەدەكتەر مەن سوزىلمالى اۋرۋى بار ادامدارعا, سونداي-اق, 60 جاستان اسقان قاريالارعا تەگىن سالىنادى. تۇماۋعا قارسى جوسپارلى ەكپە ەگۋ جۇمىستارى قاراشا ايىنا دەيىن جالعاسادى.
جامبىل وبلىسى