ۇلتتىق مۋزەيدە «ونەر تورەسى» اتتى مۋزەي قورىنان جيناقتالعان ساندىك-قولدانبالى ونەر كورمەسى اشىلدى. كورمەنىڭ ماقساتى كوپعاسىرلىق ۇلتتىق تاجىريبەمەن بايىعان قازاقستاندىق ساندىك-قولدانبالى ونەردى ناسيحاتتاۋعا نەگىزدەلگەن.
كورمەنىڭ اشىلۋ سالتاناتىندا ۇلتتىق مۋزەيدىڭ زاماناۋي ونەر ءبولىمىنىڭ جەتەكشىسى ءمادينا دوسانومانوۆا, قازاقستاننىڭ ەڭبەك سىڭىرگەن مادەنيەت قايراتكەرى, سۋرەتشىلەر جانە ديزاينەرلەر وداعىنىڭ مۇشەسى تىلەۋجان باتانوۆ, ساندىك-قولدانبالى ونەر شەبەرى داريا كاليموۆا-قاستەەۆا قۇتتىقتاۋ ءسوز سويلەپ, شارانىڭ ماڭىزدىلىعىن اشىپ كورسەتتى.
كورمەگە حح عاسىردىڭ ەكىنشى جارتىسىنداعى شەبەرلەردىڭ تۋىندىلارى, سونداي-اق زاماناۋي سۋرەتشىلەردىڭ كيىزدەن, اعاشتان جاسالعان ەڭبەكتەرى, ينستاللياتسيالار, گوبەلەندەر, زەرگەرلىك بۇيىمدار قويىلدى. كورمەگە كەلۋشىلەر مۇحامەدجان زەينەلحان, ءباتيما زاۋىربەكوۆا, ساۋلە جانە ءالىباي باپانوۆتار, سەرجان باشيروۆ, ەدۋارد كازاريان, لاتيف قازبەكوۆ, تىلەۋجان باتانوۆ سىندى الەمدىك كوركەمسۋرەت كەڭىستىگىندە وزىندىك قولتاڭباسى بار قىلقالام شەبەرلەرىنىڭ تۋىندىلارىمەن تانىستى.
– كوك تۇرىكتەن تاراعان ۇرپاق بولعاندىقتان, ءبىزدىڭ نەگىزگى باعىتىمىز – اتا-بابادان قالعان مۇرانى, ۇلتتىق قۇندىلىقتاردى بۇگىنگى زامان تالابىمەن ۇيلەستىرە وتىرىپ, دارىپتەۋ ەكەنى داۋسىز. سونىڭ ارقاسىندا ءىسىمىز العا باسىپ كەلەدى. مىنا زاتتاردىڭ ارقايسىسىنىڭ جەكە-جەكە تاريحى بار. بۇل جەردەگى ءساندى بۇيىمدار ادامنىڭ جانىنا شۋاق سىيلاپ قانا قويماي, وتكەن ءداۋىردىڭ ەستەلىكتەرىمەن قايتا قاۋىشۋعا مۇمكىندىك سىيلايدى. نەگىزىنەن قازاق حالقىنىڭ ۇلتتىق ەرەكشەلىگىن كورسەتەتىن زاتتار. مەنى قىزىقتىرعانى دا سول, – دەدى م.زەينەلحان.
حالقىمىزدىڭ عاسىرلار قويناۋىنان باستاۋ الاتىن ۇلتتىق كاسىبى مەن قولونەرىنە نەگىزدەلگەن ساندىك-قولدانبالى ونەرى ۇلتتىڭ ادەت-عۇرپىمەن, ءومىر سالتىمەن, ەستەتيكالىق كوزقاراستارىمەن تىعىز بايلانىستى. زاماناۋي سۋرەتشىلەردىڭ تەندەنتسيالارى ءارتۇرلى ماتەريالدار مەن تەحنيكالاردى بىرىكتىرە, ابستراكتسيونيستەردىڭ سۋرەت سالۋ تاجىربيەلەرى كيىزدىڭ بەتىن كوشىرە وتىرىپ, كوللاج ءادىسىن پايدالانىپ جاساعان كيىز تۋىندىلاردان كورىنەدى. «مۇراگەرلىك» جانە «ساباقتاستىق» تەندەتسيالارى جانە زاماناۋي بەينەلەۋ ونەرىنىڭ كومپوزيتسيالىق تاجىربيەسىن يگەرۋ شي بەتىنە سالىنعان ويۋ-ورنەكتەردەن بايقالادى.
كورمەگە 70-كە جۋىق ونەر تۋىندىلارى قويىلدى. ەكسپوزيتسيادا ۇسىنىلعان بۇيىمدار قازاق حالقىنىڭ مادەني-تۇرمىستىق ەرەكشەلىكتەرىن كورسەتەدى جانە قازاق ۇلتتىق مادەنيەتىنىڭ بىرەگەي بولىگى بولىپ تابىلادى.