قازاقستاننىڭ ەلشىسى تولەجان بارلىباەۆ حورۆاتيانىڭ مەدجيمۋر جۋپانياسىندا ۇلى وتان سوعىسىنداعى جەڭىستىڭ 75-جىلدىعىنا وراي ءىس-شارالارعا قاتىستى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
قازاقستاندىق ديپلومات چاكوۆەتس قالاسىنىڭ قالالىق زيراتىندا كەڭەس جاۋىنگەرلەرىنىڭ باۋىرلاس بەيىتىندە قازا بولعان جاۋىنگەرلەر مەن فاشيزم قۇرباندارىنا ارنالعان مونۋمەنتكە گۇل شوقتارىن قويدى. بۇل جەردە يۋگوسلاۆيانى فاشيستتىك باسقىنشىلاردان ازات ەتۋ ءۇشىن شايقاستاردا قازا تاپقان قازاقستاندىقتار جەرلەنگەن. راسىمگە قاتىسۋشىلار قازا بولعان جاۋىنگەرلەردى ءبىر مينۋت ۇنسىزدىكپەن ەسكە الدى.
ەلشى شتريگوۆو اۋىلىنداعى بەيبىتشىلىك جانە دوستىق ساياباعىنىڭ نەگىزىن سالۋ راسىمىنە دە قاتىستى. ول جەردە كەڭەس جاۋىنگەرلەرىن ەسكە الۋ مەموريالى سالىنادى. ءىس-شاراعا قاتىسۋشىلار مونۋمەنتتىڭ نەگىزىنە قازاقستان مەن رەسەي ەلشىلەرى, جەرگىلىكتى مۋنيتسيپاليتەت جانە ەسكە الۋ قاۋىمداستىعى باسشىلارى قول قويعان بولاشاق ۇرپاققا ارنالعان جولداۋىمەن كاپسۋلا سالدى. مەموريالدىڭ رەسمي اشىلۋى 2021 جىلدىڭ ءساۋىر ايىنا جوسپارلانعان.
ءراسىم بارىسىندا ءسوز سويلەگەن ت.بارلىباەۆ قازاقستاننىڭ ءفاشيزمدى جەڭۋگە قوسقان ۇلەسى تۋرالى ايتىپ بەردى. يۋگوسلاۆيانى ازات ەتكەنى ءۇشىن شايقاستاردا قازاقستاندىق جاۋىنگەرلەردىڭ ەرلىكتەرى اتاپ ءوتىلدى, ولاردىڭ كوپشىلىگى ۇرىس دالالارىندا قازا تاپتى. حورۆاتيانىڭ ەسكە الۋ قاۋىمداستىعىنىڭ باسشىلىعىمەن حورۆاتيا اۋماعىندا جەرلەنگەن قازاقستاندىقتاردىڭ مايىتتەرىن ىزدەۋ جانە جەكە باسىن انىقتاۋ بويىنشا جۇمىستى جالعاستىرۋ تۋرالى ۋاعدالاستىققا قول جەتكىزىلدى.