قر قك بش ۇيىمداستىرۋ-جۇمىلدىرۋ جۇمىستارى دەپارتامەنتىنىڭ باستىعى ساكەن جۇسىپوۆ اسكەرگە شاقىرىلۋشىلار ەكى رەت كوروناۆيرۋسقا تەست تاپسىراتىنىن ايتتى, دەپ حابارلايدى Egemen.kz.
"قازاقستان قارۋلى كۇشتەرىندە كوروناۆيرۋس ينفەكتسياسىنىڭ الدىن الۋ جانە ونىڭ تارالۋىنا جول بەرمەۋ شارالارى جۇزەگە اسىرىلۋدا. قورعانىس ءمينيسترىنىڭ تاپسىرماسى بويىنشا اسكەرگە شاقىرۋ جانە جيىن پۋنكتتەرىندە, قارۋلى كۇشتەردىڭ اسكەري بولىمدەرىندە سانيتاريالىق-ەپيدەميالىق شارالار كۇشەيتىلدى, ونىڭ ناتيجەسىندە اسكەري ورتادا كوروناۆيرۋستىڭ جاپپاي تارالۋىنا جول بەرىلگەن جوق. كوكتەمگى اسكەرگە شاقىرۋمەن سالىستىرعاندا اسكەرگە شاقىرىلۋشىلارعا پتر زەرتتەۋى ەكى رەت جۇرگىزىلەتىن بولادى: ءبىرىنشى – اسكەرگە شاقىرۋ كەزىندە جيىن پۋنكتتەرىندە, ەكىنشى جاس بۋىن اسكەري بولىمدەرگە كەلگەن كەزدە", دەدى ساكەن ءجۇسىپوۆ.
ونىڭ ايتۋىنشا, اسكەرگە شاقىرۋ جانە جيىن پۋنكتتەرىندە اسكەرگە شاقىرىلۋشىلار جانە مەديتسينالىق كوميسسيا مۇشەلەرى مەديتسينالىق بەتپەردەلەرمەن جانە باكتەرياعا قارسى قۇرالدارمەن قامتاماسىز ەتىلەدى. كۇن سايىن كەمىندە ەكى رەت بارلىق قىزمەتتىك جانە قوسالقى ءۇي-جايلار دەزينفەكتسيالانادى.
"قولدانىلىپ جۇرگەن تاجىريبەنى ەسكەرە وتىرىپ, اسكەرگە شاقىرىلۋشىلاردى حاباردار ەتۋ, ولاردى مەديتسينالىق قاراپ تەكسەرۋدەن وتكىزۋ, سونىمەن قاتار ولاردىڭ جيىن پۋنكتتەرىندە بولۋلارى كەزىندە قورعانىس ىستەرى جونىندەگى دەپارتامەنتتەر, باسقارمالار مەن بولىمدەر قىزمەتكەرلەرىنىڭ ءىس-قيمىل جاساۋ الگوريتمدەرى ءبىر ىزگە قويىلدى. اسكەرگە شاقىرىلۋشىلاردا رەسپيراتورلى اۋرۋلارعا ءتان بەلگىلەر انىقتالعان كەزدە ارەكەت ەتۋ ءادىسى جەكە قاراستىرىلعان. مەديتسينالىق قاراپ تەكسەرۋدىڭ ءوزى ەكى مەتر اراقاشىقتىقتى ساقتاي وتىرىپ, جۇرگىزىلەتىن بولادى. ءبىزدىڭ قىزمەتكەرلەرىمىزگە وسى تالاپتىڭ ساقتالۋىن باقىلاۋ جانە دارىگەرلەردىڭ قابىلداۋىنا كەزەك كۇتىپ قالۋدى بولدىرماۋ جۇكتەلدى", دەدى ول.