فۋتبولدان ەۋروپا ليگاسىنىڭ ءبىرىنشى ىرىكتەۋ كەزەڭىندە بوسنيانىڭ "جەلەزنيچارىن" ۇتقان حايفانىڭ "ماككابيى" جارىستىڭ كەلەسى اينالىمىندا الماتىنىڭ "قايراتىمەن" كەزدەسەدى, دەپ حابارلايدى Egemen.kz.
"ماككابي" فۋتبول كلۋبى 1913 جىلى قۇرىلعان. ۇزاق ۋاقىت بويى الا-قۇلا ونەر كورسەتكەن ولار وتكەن عاسىردىڭ سەكسەنىنشى جىلدارىنان باستاپ, يزرايلدەگى ازۋلى كوماندالاردىڭ بىرىنە اينالدى. سول كەزدەن بەرى حايفالىقتار 12 مارتە ەل چەمپيونى اتانىپ, 6 رەت ەل كۋبوگىن ولجالادى. سوڭعى رەت "ماكككابي" 2011 جىلى وزدەرىنىڭ ىشكى بىرىنشىلىگىندە باس جۇلدەنى يەلەنگەن ەدى. 1999 جىلى كۋبوك يەگەرلەرى كۋبوگى جولىنداعى جارىستىڭ شيرەك فينالىنا دەيىن جەتتى. 2003 جانە 2010 جىلدارى ۋەفا چەمپيوندار ليگاسىنىڭ توپتىق تۋرنيرىندە باق سىناۋ قۇرمەتىنە يە بولدى. جانە دە ولار وسى مەجەگە جەتكەن ءيزرايلدىڭ تۇڭعىش كومانداسى رەتىندە تاريحتا قالدى. قازىرگى كەزدە اتالمىش كلۋبتى ماركو بالبۋل جاتتىقتىرۋدا.
ەستەرىڭىزگە سالا كەتەيىك, ەۋروپا ليگاسىندا "قايراتتىڭ" جولى يزرايلدىكتەرمەن ەكى مارتە قيىسىپ, الماتىلىقتار ەكى رەتىندە دە ۇتىلىپ قالعان ەدى. 2017 جىلى تەل-ءاۆيۆتىڭ "ماككابيىنە" جول بەرسەك, بىلتىرعى ماۋسىمدا بەەر-شەۆانىڭ "حاپوەلىنە" ەسە جىبەردىك. ال جوعارىدا اتالعان قوس كلۋب اراسىنداعى تارتىس 17 قىركۇيەكتە حايفادا وتەدى.