پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا بيىلعى قاڭتار-تامىزداعى ەلىمىزدىڭ الەۋمەتتىك-ەكونوميكالىق دامۋىنىڭ جانە رەسپۋبليكالىق بيۋدجەتتىڭ ورىندالۋ قورىتىندىلارى قارالدى. اۋىل شارۋاشىلىعى ءمينيسترى ساپارحان وماروۆ ەلىمىزدىڭ اگروونەركاسىپتىك كەشەنىندەگى 2020 جىلدىڭ 8 ايىنداعى جۇمىس ناتيجەلەرى تۋرالى باياندادى, دەپ حابارلايدى Egemen.kz.
بيىلعى 8 ايدىڭ قورىتىندىسى بويىنشا جالپى اۋىل شارۋاشىلىعى ءونىمىنىڭ كولەمى 4,9%-عا ۇلعايىپ, 2,4 ترلن تەڭگەنى قۇرادى. بۇل ءوسىم نەگىزىنەن وسىمدىك شارۋاشىلىعىنداعى ءوندىرىس كولەمىنىڭ 10,7%-عا ۇلعايۋى ەسەبىنەن قامتاماسىز ەتىلدى. وبلىستار بولىنىسىندە 3 وبلىستا رەسپۋبليكالىق دەڭگەيدەن جوعارى قارقىن بايقالدى (اقمولا وبلىسى – 119,2%, سولتۇستىك قازاقستان وبلىسى – 110,9% جانە قوستاناي وبلىسى – 105,8%).
مينيستر اتاپ وتكەندەي, بيىلعى ەگىن جيناۋ قارقىنى وتكەن جىلعا قاراعاندا جوعارى. ماسەلەن, بۇگىنگى تاڭدا رەسپۋبليكا بويىنشا ءداندى جانە ءداندى-بۇرشاقتى داقىلداردىڭ شامامەن 11,1 ملن گا القابى نەمەسە جينالۋعا ءتيىس القاپتىڭ 70,2%-ى جينالدى, ال وتكەن جىلى وسى كەزەڭدە 5,3 ملن گا نەمەسە جينالۋعا ءتيىس القاپتىڭ 34,8%-ىندا ەگىن جينالعان بولاتىن. ورتاشا تۇسىمدىلىگى گەكتارىنا 11,7 تسەنتنەردەن 13 ملن توننا استىق باستىرىلدى.
"مال شارۋاشىلىعى ءونىمىنىڭ جالپى كولەمى كورسەتىلگەن كەزەڭدە 2,7%-عا ۇلعايىپ, 1,6 ترلن تەڭگەنى قۇرادى. بۇل رەتتە تىرىدەي سالماقتاعى ەت ءوندىرۋ كولەمى 3,7%-عا, ءسۇت 3%-عا ۇلعايدى", — دەدى مينيستر.
كورسەتىلگەن مەرزىمدە تاماق ونىمدەرىن ءوندىرۋ كولەمى 3,6%-عا ءوسىپ, 1 229,3 ملرد تەڭگەنى قۇرادى. اتاپ ايتقاندا, وڭدەلگەن كۇرىش ءوندىرۋ كولەمىنىڭ 61,1%-عا, شۇجىق ونىمدەرىنىڭ 22,8%-عا, سارى مايدىڭ 12,9%-عا, قۇس ەتىنىڭ 12,3%-عا, جارمانىڭ 12,2%-عا, ماكاروننىڭ 8,4%-عا, ۇننىڭ 6,4%-عا, قىشقىل ءسۇت ونىمدەرىنىڭ 4,7%-عا, وسىمدىك مايىنىڭ 1,8%-عا ارتقانى بايقالدى.
"اۋىل شارۋاشىلىعىنىڭ نەگىزگى كاپيتالىنا سالىنعان ينۆەستيتسيالار 9,1%-عا ۇلعايىپ, 292 ملرد تەڭگەنى, تاماق ونىمدەرى وندىرىسىنە سالىنعان ينۆەستيتسيالار 25,4%-عا ارتىپ, 54,7 ملرد تەڭگەنى قۇرادى", — دەپ تۇيىندەدى س. وماروۆ.