مەملەكەت باسشىسى «جاڭا جاعدايداعى قازاقستان: ءىس-قيمىل كەزەڭى» اتتى جولداۋىندا «اۋىل شارۋاشىلىعىن دامىتپاي, باسەكەگە قابىلەتتى ەكونوميكا قۇرۋ مۇمكىن ەمەس. بۇل سالادا شەشىمىن تاپپاي كەلە جاتقان وزەكتى ماسەلەلەر بار.
اتاپ ايتقاندا, جۇرتتىڭ جەرگە قول جەتكىزە الماۋى, ۇزاق مەرزىمگە بەرىلەتىن «ارزان نەسيەنىڭ» بولماۋى, كاسىبي مامانداردىڭ تاپشىلىعى» دەپ شارۋالاردىڭ ويىندا جۇرگەن ءتۇيىندى ماسەلەلەردى ءتىزىپ شىقتى.
راس, جەر-جەرلەردە فەرمەرلەردىڭ شارۋاشىلىق ماقساتتاعى جەردەن تارشىلىق كورىپ وتىرعانى بەلگىلى. ماسەلەن, ەگىستىك القابىڭدى كەڭەيتىپ, ەل ەكونوميكاسىنا ۇلەس قوسقىڭ-اق كەلەدى. الايدا ەگىستىككە قولايلى اۋماقتى جەر قويناۋىن پايدالانۋشىلار راسىمدەپ الىپ قويادى. ولارعا باسىمدىق كوپ بەرىلەتىنى دە شىندىق. سونىمەن قاتار شۇرايلى جەرلەردى كەڭەس وكىمەتى تۇسىندا يەلەنىپ الىپ, وسى كۇنگە دەيىن يگەرمەي جاتقان ازاماتتار دا بار. سونداي-اق پرەزيدەنت ايتىپ وتكەن ۇزاق مەرزىمدى «ارزان نەسيە» كاسىپكەرلەر ءۇشىن وتە ءتيىمدى بولار ەدى. قازىرگى تاڭدا پايىزى جوعارى نەسيەنىڭ ءوزىن جىل ءجۇرىپ ازەر الامىز. قاعازباستىلىق كوپ. مەملەكەت باسشىسى ءمان بەرگەن نەسيە ماسەلەسى ءبىر تەرەزە ارقىلى, از عانا قۇجاتپەن راسىمدەلسە دۇرىس بولار ەدى. ال سۋبسيدياعا بولىنەتىن قارجىنى دا بانكتەر ارقىلى از پايىزبەن نەسيە رەتىندە كاسىپكەرلەرگە بەرسە ەكونوميكانىڭ ارتۋىنا ىقپالىن تيگىزەر مە ەدى؟! ولاي بولاتىن بولسا, شارۋا قوجالىعىنىڭ باسشىسى العان نەسيەسىمەن كاسىبىن دوڭگەلەتىپ, جۇمىسشىلارعا جاعداي جاساپ بەرەر ەدى. ايتپەسە جىلىنا بەرىلەتىن سۋبسيدياعا تەحنيكانى جاڭارتۋ, جۇمىسشىلاردى باسپانامەن قامتۋ مۇمكىن ەمەس. سوندىقتان پرەزيدەنت جولداۋىندا ايتىلعان ماسەلەلەردىڭ جۇزەگە اسۋى – ءسىز بەن بىزگە بايلانىستى.
قۋانىش سۇلەيمەنوۆ,
«شالاباي» جشس ديرەكتورى
شىعىس قازاقستان وبلىسى,
جارما اۋدانى