ينجەنەرلىك جەلىلەردى تسيفرلاندىرۋ جوندەۋ جۇمىستارىن ۋاقتىلى جۇرگىزۋگە, قاجەت بولعان جاعدايدا قۋاتتى ۇلعايتۋعا مۇمكىندىك بەرەدى. بۇل تۋرالى نۇر-سۇلتان قالاسىنىڭ اكىمى التاي كولگىنوۆ Instagram پاراقشاسىندا جازدى.
"ەلوردا كوشەلەرى مەن داڭعىلدارىنىڭ استىندا مىڭداعان شاقىرىم ينجەنەرلىك جەلىلەر جاتىر. ولار: سۋ, ەلەكتر, كارىز, بايلانىس جەلىلەرى. قالالىقتاردىڭ تۇرمىس ساپاسى وسى جەلىلەردىڭ ۇزدىكسىز جۇمىس ىستەۋىنە تىكەلەي بايلانىستى. قازىر جەلىلەردى تسيفرلاندىرۋمەن اينالىسىپ جاتىرمىز. بۇل جۇمىستاردىڭ وزەكتىلىگى سول, قاعاز جۇزىندە ينجەنەرلىك جەلىلەردىڭ ورنالاسقان جەرى مەن جاي-كۇيى تۋرالى مالىمەتتەر ءاردايىم سايكەس كەلە بەرمەيدى. وسىعان بايلانىستى تۇرعىندار ۋاقىتشا سۋسىز, ەلەكترسىز وتىرۋعا ءماجبۇر بولعان كەزدە اپاتتى جاعدايلار بولىپ جاتادى.
تسيفرلاندىرۋ بارلىق ينجەنەرلىك جەلىلەردى اشىق كورۋگە مۇمكىندىك بەرەدى. ولارعا تۇسەتىن سالماق پەن احۋالى انىق كورىنەدى. بۇل جوندەۋ جۇمىستارىن ۋاقتىلى جۇرگىزۋگە, قاجەت بولعان جاعدايدا قۋاتتى ۇلعايتۋعا, تاۋەكەلدەردى ازايتۋعا جانە جاڭا وبەكتىلەردى ينجەنەرلىك جەلىلەرگە قوسۋ پروتسەسىن جەڭىلدەتۋگە مۇمكىندىك بەرەدى. عيماراتتاردى سالۋ كەزىندە ۇزاق ءارى ماڭىزدى پروتسەستەردىڭ ءبىرى – ينجەنەرلىك جەلىلەرگە قوسۋ.
سونىمەن قاتار, عيماراتتاردى, جەر ۋچاسكەلەرىن تسيفرلاندىرامىز (جەر ۋچاسكەلەرى ماسەلەلەرى بويىنشا مەملەكەتتىك قىزمەتتەردى كورسەتۋ ونلاين رەجيمىندە وتەدى), بۇل جەر ۋچاسكەلەرىنىڭ يگەرىلۋىن ونلاين باقىلاۋعا مۇمكىندىك بەرەدى. سونداي-اق قالانىڭ 3D مودەلىن قۇرۋ بويىنشا جۇمىس ىستەپ جاتىرمىز. قازىرگى ۋاقىتتا قالانىڭ 50% تسيفرلاندىرىلدى. گەواقپاراتتىق پورتال جىلدام قارقىنمەن كەڭەيىپ كەلە جاتقان قالا ءۇشىن ماڭىزدى. ءارى قۇرىلىس پروتسەستەرىن بولجاۋعا جانە مودەلدەۋگە مۇمكىندىك بەرەدى. اۋدانداردى مەكتەپتەرمەن, بالاباقشالارمەن, اۋرۋحانالارمەن جانە باسقا دا ماڭىزدى وبەكتىلەرمەن قامتاماسىز ەتۋ قاجەتتىلىگى بىركەلكى بولىنەتىن بولادى.
پورتال سونداي-اق بىرنەشە كارتا جاساۋعا مۇمكىندىك بەرەدى. مىسالى, تجد قاجەتتىلىكتەرى ءۇشىن قاۋىپ قاتەرلەردى بولجاۋ كارتالارى, كاسىپكەرلەر ءۇشىن – ينۆەستكارتا, پيك (وسي) ءۇشىن-شاتىردى, كوممۋنيكاتسيا جەلىلەرىن جوندەۋ بويىنشا جۇمىستاردى جوسپارلاۋ جانە ت.ب. بۇل ارقىلى جەردىڭ استىندا نە بولىپ جاتقانىن كورۋگە بولادى.
مەملەكەت باسشىسى قازاقستان حالقىنا جولداۋىندا "تسيفرلاندىرۋ-بارلىق رەفورمالاردىڭ نەگىزگى ەلەمەنتى", – دەپ اتاپ ءوتتى. تسيفرلاندىرۋ پروتسەسى باقىلاۋىمىزدا تۇر», – دەپ جازدى التاي كولگىنوۆ.