ىسساپارمەن وڭىرلەردە جۇرگەن دەنساۋلىق ساقتاۋ ءمينيسترى الەكسەي تسوي الماتى وبلىسىنا بارىپ, ەركىن اۋىلىنداعى تۇرعىندارعا ارناپ سالىنىپ جاتقان دارىگەرلىك امبۋلاتوريانىڭ قۇرىلىسىمەن تانىستى. مەديتسينالىق نىسان ءبىر اۋىسىمدا 100 كەلۋشىنى قابىلداي الادى. مەديتسينالىق-سانيتارلىق العاشقى كومەك كورسەتەتىن مەكەمەنىڭ اۋماعى 1100 شارشى مەتر جانە 14 500 ادامعا ارنالعان, - دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
بۇدان كەيىن دەنساۋلىق ساقتاۋ ءمينيسترى 13 مودۋلدىك جۇقپالى اۋرۋلار اۋرۋحاناسىنىڭ ءبىرىنىڭ قۇرىلىس الاڭىنا باردى.
"مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا 13 جاڭا جۇقپالى اۋرۋلار اۋرۋحاناسىن سالۋ مىندەتىن قويدى. قازىرگى ۋاقىتتا وڭىرلەردە اكىمدىكتەر 12 مودۋلدىك ينفەكتسيالىق اۋرۋحانا قۇرىلىسىنىڭ جانە بيىل قازان ايىندا پايدالانۋعا بەرىلەتىن ءبىر اۋرۋحانانى قايتا جاڭارتۋعا كىرىستى. بۇل پاندەميانىڭ ىقتيمال ەكىنشى تولقىنىنا دايىندىق جانە حالىقتى ۋاقتىلى, ساپالى كومەكپەن قامتاماسىز ەتۋگە مۇمكىندىك بەرەدى. وسىلايشا, قوسىمشا 2 700 ينفەكتسيالىق توسەك-ورىن اشىلادى", - دەدى ا.تسوي.
الماتى وبلىسى دەنساۋلىق ساقتاۋ باسقارماسىنىڭ باسشىسى ومىرزاق نيازبەكوۆتىڭ ايتۋىنشا, مەديتسينالىق مەكەمە سەگىز بولىمنەن تۇرادى جانە بيىل قازان ايىندا پايدالانۋعا بەرىلەدى. اۋرۋحانا 200 توسەك-ورىنعا ارنالعان, مۇندا 400-دەن استام ادام جۇمىس ىستەيدى.
دەنساۋلىق ساقتاۋ باسقارماسى باسشىسىنىڭ مالىمەتىنشە, بۇگىنگى تاڭدا ينفەكتسيالىق توسەك سانى 520-دان 180-گە دەيىن, ال پروۆيزورلىق توسەك-ورىن سانى 3 560-تان 707-گە دەيىن قىسقاردى. وبلىستا كوروناۆيرۋس ينفەكتسياسى انىقتالعان ادامدارعا ارنالعان 100 رەانيماتسيالىق توسەك بار. اۋرۋحانالاردا 303 ءوجج اپپاراتى بار, 15 قىركۇيەككە قاراي ولاردىڭ سانى 507 بىرلىككە جەتەدى. مەديتسينالىق ۇيىمداردا 634 وتتەگى كونتسەنتراتورى بار, جەرگىلىكتى بيۋدجەت ەسەبىنەن تاعى 100 دانا جانە دەمەۋشىلىك كومەك ەسەبىنەن 90 دانا ساتىپ الۋ ءراسىمى جۇرگىزىلۋدە.
مەديتسينالىق ۇيىمدارعا وتتەگى ستانتسياسىن جانە 15 رەنتگەن اپپاراتىن ورناتۋ ءۇشىن جەرگىلىكتى بيۋدجەتتەن قوسىمشا 763 ملن تەڭگە بولىنەدى. مەديتسينالىق ۇيىمداردا ءدارى-دارمەك پەن دەزينفەكتسيالىق قۇرالداردىڭ قورى جەتكىلىكتى. وڭىردەگى ينفەكتسيالىق جانە پروۆيزورلىق ستاتسيونارلاردا 215 150 انتيپيرەتيكالىق, 45 535 ۆيرۋسقا قارسى پرەپارات, سونداي-اق 255 157 انتيبيوتيك بار.
ايماقتا 8 پتر-زەرتحانا جۇمىس ىستەيدى. وبلىستىق ۆەتەريناريالىق قىزمەتتىڭ پتر-زەرتحاناسىنىڭ پوتەنتسيالىن پايدالانۋ ارقىلى جانە 1 تامىزدان باستاپ جەكە مەنشىك زەرتحانالارمەن جاسالعان شارت ەسەبىنەن تەستىلەۋ كولەمى تاۋلىگىنە 3 مىڭعا دەيىن ارتادى.
ا. تسوي ءىسساپار سوڭىندا تالدىقورعان قالاسىنداعى كوپبەيىندى اۋرۋحانا بازاسىندا بيىل شىلدە ايىندا اشىلعان COVID -ورتالىعىنىڭ جۇمىسىمەن تانىستى. COVID-ورتالىعىنىڭ ماماندارى اۋىر جانە وتە اۋىر جاعدايداعى ناۋقاستارعا كەڭەس بەرەدى, ولاردى ەمدەۋدىڭ ادىستەرىن قاراستىرادى.