پرەزيدەنت ق.توقاەۆتىڭ جولداۋى – قوعامداعى قوردالانعان ماسەلەلەردى اشىق ايتىپ قانا قويماي, ونى جويۋ جولدارىن كورسەتتى. ازاماتتاردىڭ ءومىر ساپاسىن جاقسارتۋعا بايلانىستى ناقتى مىندەتتەردى بەلگىلەپ بەردى.
جولداۋداعى بالا قۇقىقتارىن, جالپى ادام قۇقىقتارىن قورعاۋعا, مەملەكەتتىك اپپاراتتى قىسقارتۋعا بايلانىستى تاپسىرمالارىن مۇقيات تىڭدادىم. پرەزيدەنت «حالىققا تۇراقتى جۇمىس ورىندارى, ىڭعايلى جول, اۋرۋحانالار مەن مەكتەپتەر, ساپالى ازىق-ت ۇلىك كەرەك», دەپ انىق كورسەتتى. بۇل – الەۋمەتتىك ساياساتتاعى جاڭا پاراديگمالارعا جول اشادى. مەملەكەتتىك ورگانداردىڭ جاۋاپكەرشىلىگى كۇشەيتىلىپ, ءار سالاداعى باسشىلاردىڭ جۇمىس ناتيجەلەرى تۇرعىنداردىڭ ءومىر ساپاسى جاقسارعاندا انىق كورىنەتىن بولادى.
كوروناۆيرۋس ىندەتىنىڭ سالدارىنان دۇنيەجۇزىندەگى مەكتەپ وقۋشىلارى مەن ستۋدەنتتەردىڭ باسىم كوپشىلىگى قاشىقتان وقىتۋعا كوشكەن كەزدە, ەلىمىزدە ورتاق ونلاين پلاتفورما جوقتىعى انىق بايقالدى. پرەزيدەنت وسى كەمشىلىكتەردى اشىق كورسەتە وتىرىپ, ەلىمىزدە وقۋ ۇدەرىسى ءۇشىن قاجەتتى بارلىق فۋنكتسيالارى بار بىرىڭعاي ونلاين پلاتفورماسىن شۇعىل ازىرلەۋدى تاپسىردى. بۇل ءدال قازىرگى جاعدايدا بالالارىمىزدىڭ وقۋى مەن دەنساۋلىعىنىڭ قاۋىپسىزدىگى ءۇشىن جاسالاتىن ەڭ ۇتىمدى جول. ازاماتتىق قوعام وكىلدەرى دە بيلىك پەن حالىق اراسىنداعى جاڭا فورماتتاعى بايلانىسقا دايىن بولىپ, وڭىرلەردەگى كۇردەلى ماسەلەلەردى اشىق كورسەتكەنى دۇرىس دەپ ويلايمىن. ويتكەنى ەلىمىزدىڭ العا باسۋى ءۇشىن قوعامنىڭ بارلىق وكىلدەرىنىڭ اراسىندا اشىق ءارى بۇكپەسىز ديالوگ قاجەت.
ايگۇل دۇيسەنوۆا,
اقتوبە وبلىسىنىڭ ۇكىمەتتىك ەمەس ۇيىمدار قاۋىمداستىعىنىڭ پرەزيدەنتى, قازاقستاننىڭ ازاماتتىق اليانس بىرلەستىگىنىڭ مۇشەسى