مەملەكەت باسشىسى قاسىم-جومارت كەمەل ۇلى توقاەۆ ءوز جولداۋىندا مەديتسينانىڭ دامۋىنا تىڭ سەرپىن بەرىلەتىنىن اتاپ ءوتتى. اسىرەسە, اۋىلدىق ەلدى-مەكەندەردەگى ءتيىمدى دەنساۋلىق ساقتاۋ جۇيەسىن جەتىلدىرۋگە 3 جىلداي ۋاقىت قاجەت دەدى. شىن مانىندە, بۇل يگى باستاما. مەملەكەتىمىزدىڭ قۇندىلىعى – حالىق دەسەك, حالىق ءۇشىن باستىسى – دەنساۋلىق. ەلدى-مەكەندەردەگى حالىق دەنساۋلىعى, اسىرەسە, وزەكتى.
مۇنى مەن دارىگەر رەتىندە عانا ەمەس, اۋىلدا تۋىپ-وسكەن, ەڭبەك ەتىپ جۇرگەن ازامات رەتىندە ايتىپ وتىرمىن. كوپشىلىك اۋىلدارداعى تۇرعىندار قاراپايىم مەديتسينالىق كومەككە مۇقتاج. ونىڭ ۇستىنە, ءدارىحانالاردىڭ جوقتىعى قينالتادى.
مەنىڭ دارىگەر رەتىندەگى ارمانىم ەلدى-مەكەندە كابينەت اشۋ بولاتىن. وسىدان 4-5 جىل بۇرىن سول ارمانعا قول جەتكىزىپ, قىزىلوردا وبلىسى, ماحامبەت اۋىلىنان كىشكەنە عانا كلينيكا مەن ءدارىحانا اشتىق. وتكەندە عانا كورونوۆيرۋس پاندەمياسىنىڭ ۋشىعىپ تۇرعان كەزىندە قانشاما اۋىل ادامى ءدارى ىزدەپ شارلاپ كەتتى. سول كەزدە حالىق ءۇشىن ءدارىحانانىڭ قاجەتتىلىگىنە تاعى ءبىر كوز جەتكىزدىم.
سونىمەن قاتار, پرەزيدەنت الىس ەلدى-مەكەندەردە كولىكتىك مەديتسينانى جاڭعىرتۋدى قولعا الۋدى اتاپ ءوتتى. بۇرىندارى ول سالا جاقسى دامىعان ەدى. قازىر قايتا جاڭعىرتار بولسا نۇر ۇستىنە نۇر بولار ەدى.
جالپى, مەملەكەتىمىزدەگى بيلىكتىڭ حالىقتىڭ مۇڭ-مۇقتاجىن تىڭداپ, زامان اعىمىنا سايكەس وزگەرە ءبىلۋى قۋانتادى.
قازىرگى رەسپۋبليكا دەڭگەيىندە دەنساۋلىق ساقتاۋ جۇيەسىنىڭ ءماز ەمەس ەكەنى بارشاعا ءمالىم. اسىرەسە, ماتەريالدى-تەحنيكالىق بازانىڭ جەتكىلىكسىزدىگى, بىلىكتى مامانداردىڭ ازدىعى, مەديتسينالىق قىزمەت ساپاسىنىڭ تومەندىگى, ال ەڭ باستىسى دارىگەرلەردىڭ ايلىعىنىڭ ازدىعى مەديتسينا سالاسىنا جاڭا كادرلاردىڭ بارۋىنا كەدەرگى.
مىسالى, اقش مەديتسينا سالاسىنا جىلىنا جالپى ىشكى ءونىمىنىڭ (ۆۆپ) 16,4 پايىزىن جۇمسايدى ەكەن, ال, شۆەيتساريا 12,1%. ءبىزدىڭ ەلىمىزدەگى بۇل كورسەتكىش 3,4% شاماسىندا.
جالپى, كەز كەلگەن ەلدىڭ دەنساۋلىق ساقتاۋ جۇيەسىن سول ەلدەگى ادام ءومىرىنىڭ ۇزاقتىعىمەن ولشەيدى. ادەتتە. بۇل جاعىنان كەلگەندە قازاقستان جاعدايى ءماز ەمەس. ادام ءومىرىنىڭ ۇزاقتىعى بويىنشا قزااقستان الەمدە 111 ورىندا. بۇعان ادامعا دەر كەزىندە شۇعىل كومەك بەرۋ, ەمنىڭ كوپتەگەن تۇرلەرىن جەرگىلىكتى جەرلەردە كورسەتۋ, تاعى باسقا فاكتورلار اسەر ەتەرى ءسوزسىز.
ارينە, حالىقتىڭ دا ءومىر ءسۇرۋ سالتىنا وزگەرىس ەنگىزۋ قاجەت. سالاۋاتتى ءومىر سالتى, تازا اۋا, دەنە شىنىقتىرۋ, دۇرىس تاماقتانۋ دەگەن سياقتى.
مەملەكەت مەديتسينا سالاسىنىڭ ينفراقۇرىلىمىن دامىتۋعا, وسى سالاعا ءمان بەرۋدى قولعا الدى. ەندەشە, ءبىز دە ءوز تاراپىمىزدان بارىنشا قولدان كەلگەندى ايامايتىن بولامىز.
ماحمۋد ەسەنگەلديەۆ, دارىگەر